អាមេរិក៖ ក្រុមវេជ្ជបណ្ឌិត នៅក្នុងរដ្ឋ Nebraska បានពន្យារជីវិតរបស់ នារីវ័យក្មេងម្នាក់ ចំនួន ៥៤ថ្ងៃ ដែលខួរក្បាលរបស់នាង បានស្លាប់ ទៅហើយនោះ ដើម្បីឲ្យនាង អាចឲ្យនាងសម្រាល កូនប្រុស ក្នុងពោះ ដែលវា មានឈ្មោះថា Angel។

នាង Karla Perez ដែលមាន អាយុ ២២ឆ្នាំ បានស្លាប់ ក្រោយពី បង្កើតកូន បាន២ថ្ងៃ នេះបើតាម របាយការណ៍របស់ វ៉ាស៊ីនតោនផុស បានចុះផ្សាយ កាលពីថ្ងៃុសុក្រ។ ទារកដែល កើតចេញ មកនេះ មានទំងន់ ត្រឹមតែ ១.២៧គ.ក ប៉ុណ្ណោះ និងមានឈ្មោះថា Angel។ នៅក្នុងនោះ ក៏បាន បញ្ជាក់ទៀតថា កាលពីមុន គឺ ក្នុងឆ្នាំ ១៩៩៩ ក៏ធ្លាប់ មានស្ដ្រី អាមេរិកម្នាក់ (ខួរក្បាលលែង ដំណើរការ ឬស្លាប់នោះ) ក៏បាន សម្រាលកូន បានម្នាក់ផងដែរ។

យ៉ាងណាមិញ ទារក Angel បានចាត់កំណើត កាលពីដើមខែមុននេះ។ នៅក្នុងនោះ មាន ក្រុមវេជ្ជបណ្ឌិត ច្រើនជាង ១០០នាក់ ,គិលានុដ្ឋាយិកា និង បុគ្គលិក បានជួយព្យាយាម ពន្យារជីវិត ម្ដាយរបស់ Angel ឲ្យអាចតស៊ូ រហូតដល់ ៥៤ថ្ងៃ ដែលជា ពេលគ្រប់គ្រាន់ អាចឲ្យ គ្រូពេទ្យ ធ្វើការវះកាត់ យក  Angel ចេញមកបាន។ គួរបញ្ជាក់ថា នាង Karla Perez បានដួល សន្លប់ភ្លាមៗ នៅក្នុងផ្ទះរបស់ខ្លួន នៅ Waterloo កាលពីថ្ងៃទី ០៨ ខែ កុម្ភៈ បន្ទាប់ពី នាងរអ៊ូថា អាការៈឈឺក្បាល ដែលក្រោយមក វេជ្ជបណ្ឌិត បានពិនិត្យ និងឲ្យដឹងថា នាងទទួលរង ជំងឺឈាម ក្នុងខួរក្បាល ខណៈដែលនាង ពរពោះ  Angel បាន ២២សប្ដាហ៍។ ជាមួយគ្នានោះ លោកវេជ្ជបណ្ឌិត Andrew Robertson បានធ្វើការ សម្រេចចិត្ដ ដោយពន្យារពេល ជីវិតម្ដាយ ដោយសារតែ Angel មានវ័យនៅ ក្មេងពេក ក្នុងការរស់នៅ ក្រៅស្បូន។ ជាក់ស្ដែងណាស់ គ្រូពេទ្យសង្ឃឹមថា នឹងអាច ជួយ នាង អាចបង្កើតកូន ក្នុងវ័យ ៣២សប្ដាហ៍ តែបែរជា មិនអាចទៅរួច ដោយសារតែ ស្ថានភាពនាង កាន់តែអន់ខ្សោយ ដូចនេះ  Angel ត្រូវចេញមុន ២សប្ដាហ៍ គឺកាលពីថ្ងៃទី ០៤ ខែមេសា។ ក្រោយពីឃើញ ព្រះអាទិ្យ Angel ត្រូវរស់នៅក្នុង កែវចិញ្ចឹម សម្រាប់ទារកកើត មិនគ្រប់ខែ និង ផ្ដល់អាហារ តាមបំពង់។ 

ទោះជាយ៉ាងណា មកដល់ពេលនេះ Angel គឺនៅតែ ស្ថិតនៅក្នុង បន្ទប់ NICU និងក្រុមគ្រួសាររបស់នាង Karla Perez បានដាក់ របស់ប្រើប្រាស់ ផ្សេងៗរបស់នាង Karla Perez នៅក្បែរទារកនេះ ដើម្បីសង្ឃឹមថា ក្លិន ឬដួងវិញ្ញាណ ម្ដាយរបស់ Angel នឹងជួយ ថែរក្សាវា ឲ្យ សុខសប្បាយ។ អ្វីដែលជាក្ដី កោតសរសើរនោះ គឺសរីរាង្គរបស់ នាង Karla Perez  បានជួយដល់ មនុស្ស ៣នាក់ ផ្សេងទៀត ដែលរងចាំ នូវ របស់ទាំងនោះ ដើម្បីធ្វើការវះកាត់។ 

រូបភាពរបស់  Angel

រូបភាពនាង  Karla Perez 

ប្រភពពី បរទេស

កែសម្រួលដោយ ម៉ា

ខ្មែរឡូត