រាជធានីភ្នំពេញ ៖ យុវជនម្នាក់ មានសង្សារ ជាកម្មការិនី រោងចក្រកាត់ដេរ ដោយសារតែ នឹកនាងពេក បានធ្វើដំណើរ ពីស្រុកកំណើត មកលេងនាង ដល់ផ្ទះជួល ដែលនាងស្នាក់នៅ មុនដំបូងនាង បានស្វាគមន៍ជាធម្មតា ហើយយុវជននោះ បានស្នាក់នៅ ក្នុងបន្ទប់ផ្ទះជួលនោះរយៈពេល មួយអាទិត្យ ទើបនាង ដេញឲ្យត្រឡប់ ទៅផ្ទះវិញ ដោយប្រាប់ថា «ចាំថ្ងៃក្រោយ ចាំមកលេងទៀត ព្រោះមកស្នាក់នៅ អត់ធ្វើការចឹង ខ្មាសគេ»។ ពេលដែលនាង ជាសង្សារដេញ បែបនេះ បានធ្វើឲ្យយុវជននោះ មានការខឹងសម្បា និងតូចចិត្ត ព្រមទាំងមាន ទំនាស់ពាក្យសម្ដី ជាមួយនាង រួចបានចេញទៅចង.ក សម្លាប់ខ្លួន នៅលើដើមក្រសាំង កណ្តាលវាលស្រែ មួយកន្លែង បណ្ដាលឲ្យស្លាប់តែម្ដង។

ហេតុការណ៍នោះ បានបង្កឱ្យមាន ការភ្ញាក់ផ្អើល កាលពីវេលាម៉ោង ៥ និង៣៥នាទី ព្រឹក ថ្ងៃទី២ ឧសភា ២០១៥ ស្ថិតនៅចំណុច កណ្តាលវាលស្រែ ក្នុងភូមិត្រពាំងជ្រៃ សង្កាត់កាកាប ខណ្ឌពោធិ៍សែនជ័យ ។ យុវជនម្នាក់នោះ ឈ្មោះ ផុន ផល្លា  អាយុ២៤ឆ្នាំ ជាកម្មករចាំចំការនៅខេត្តរតនៈគិរី និងមានស្រុកកំណើត នៅភូមិឈើតូច ឃុំឈើខ្មៅ ស្រុកកោះធំ ខេត្តកណ្តាល ។ ចំណែកនារីជាសង្សារ ឈ្មោះឈី ចិន្តា អាយុ២០ឆ្នាំ ជាកម្មការិនីកាត់ដេរ មានលំនៅផ្ទះជួល ក្បែរកន្លែងកើតហេតុ ។

ប៉ូលិសប៉ុស្តិ៍កាកាប បានឱ្យដឹងថា មុនពេលភ្ញាក់ផ្អើល ប្រជាពលរដ្ឋម្នាក់ នៅក្នុងភូមិខាងលើ ឈ្មោះឈុន យាន ភេទប្រុស អាយុ៥៨ឆ្នាំ បានដើរទៅមើល ដី ដើម្បីដាំបន្លែ ស្រាប់តែប្រទះឃើញ យុវជនម្នាក់ចង.ក ដោយក្រមាភ្ជាប់នឹង ដើមក្រសាំង កណ្តាលវាលស្រែ ស្លាប់បាត់ទៅហើយ ក៏ប្រាប់អ្នក នៅក្នុងភូមិ ជាមួយគ្នា ឲ្យទៅមើលទើបមាន ការភ្ញាក់ផ្អើលតែម្ដង៕

ផ្តល់សិទ្ធដោយ កោះសន្តិភាព