-ជនរងគ្រោះ ជាក្រឡាបញ្ជីរបស់ លោក គឹម ម៉េង ចៅក្រមស៊ើបសួរ សាលាដំបូងខេត្តកណ្តាល
ភ្នំពេញ៖ ប្រភពព័ត៌មានពីមន្ដ្រី នគរបាល ខណ្ឌមានជ័យ បានឱ្យដឹងថា នៅវេលាម៉ោង ១និង៣០នាទី រសៀលថ្ងៃទី២៨ ខែមេសា ឆ្នាំ២០១៥នេះ មានករណីភ្ញាក់ផ្អើលមួយ បានកើតឡើង បន្ទាប់ពីឃើញ បុរសម្នាក់ចង-ក សម្លាប់ខ្លួន នៅក្នុងផ្ទះរបស់ខ្លួន ដែលជនរងគ្រោះ គឺជាក្រឡាបញ្ជី នៅសាលាដំបូង ខេត្ដកណ្ដាល ពោលជាក្រឡាបញ្ជី របស់លោក គឹម ម៉េង ចៅក្រមស៊ើបសួរ ។

ការភ្ញាក់ផ្អើលបាន កើតឡើងនៅផ្ទះ ជនរងគ្រោះ ស្ថិតនៅសង្កាត់ ចាក់អង្រែលើ ខណ្ឌមានជ័យ រាជធានីភ្នំពេញ ។ តាមមន្ដ្រីនគរបាល រូបនេះ ជនរងគ្រោះ ឈ្មោះ កែវ សុខា មានតួនាទីជា ក្រឡាបញ្ជី នៅសាលាដំបូង ខេត្ដកណ្ដាល និងមានកូនស្រី ម្នាក់អាយុ៨ឆ្នាំ ។

ចំពោះមូលហេតុ ពិតប្រាកដ ដែលនាំឱ្យជនរងគ្រោះ ចង-កសម្លាប់ខ្លួននោះ នៅមិនទាន់ដឹងនៅឡើយទេ ដោយបច្ចុប្បន្ន នគរបាលមូលដ្ឋាន និងនគរបាលផ្នែក បច្ចេកទេសរាជធានី ភ្នំពេញ បានចុះទៅផ្ទះ ជនរងគ្រោះ ស្ថិតនៅខាងក្រោយ រោងចក្រ បារីសេក។

បើតាមស្ដ្រីជាភរិយា បានប្រាប់សមត្ថកិច្ចថា ខ្លួនក៏មិនដឹងពី មូលហេតុពិត ប្រាកដដែរ ពីព្រោះក្នុង រយៈពេលចុងក្រោយនេះ ពួកគេ មិនដែលមាន រឿងរកាំរកូស ក្នុងគ្រួសារឡើយ រីឯការងាររបស់ប្ដី ក៏ខ្លួនមិនសូវជា បានសួរនាំនោះទេ ។ ការស្លាប់របស់ ជនរងគ្រោះ បានធ្វើឱ្យ កុមារីអាយុ៨ឆ្នាំ នៅកំព្រាឪពុក និងម្ដាយក្លាយជា ស្ដ្រីមេម៉ាយ ៕

ផ្តល់សិទ្ធដោយ ដើមអម្ពិល