ក្រោយបានតំណែងតួឯក នីកូ រំពឹងប្រជាប្រិយភាពឡើងខ្ពស់វិញ!

ក្រោយបានតំណែងតួឯក នីកូ រំពឹងប្រជាប្រិយភាពឡើងខ្ពស់វិញ!

ក្រោយបានតំណែងតួឯកក្នុងរឿង “សង្សារខ្មោច” ក្នុងផលិតកម្មសាន់ដេ ដោយសម្ដែងរួមគ្នានឹងកញ្ញា សុខ ពិសីលោក នីកូបង្ហាញអារម្មណ៍សប្បាយរីករាយ ហើយរំពឹងខ្ពស់ថាប្រជាប្រិយភាពខ្លួននឹងងើបខ្លាំងឡើងវិញ។ មានចំណុចសំខាន់ៗអ្វីខ្លះធ្វើឱ្យលោក នីកូ លើកឡើងដូច្នេះ?

ខាងក្រោមនេះគឺជាបទសម្ភាសន៍រវាង Sabay និង លោក នីកូ ជុំវិញការក្លាយជាតួឯកលើកដំបូងនៅ Sunday ក៏ដូចជាការរំពឹងសំឡេងគាំទ្រពីទស្សនិកជនចំពោះខ្សែភាពយន្តខាងលើ។

នីកូ និង សុខ ពិសី ក្នុងពិធីក្រុងពាលីរឿង”សង្សារខ្មោច” កាលពីសប្ដាហ៍មុន

Sabay៖ តើ នីកូរំពឹងទទួលបានការគាំទ្រពីទស្សនិកជនបែបណា ពីការសម្ដែងតួឯករួមនឹងកញ្ញា សុខ ពិសី?

នីកូ៖ តាមរយៈការរៀបចំយ៉ាងយកចិត្តទុកដាក់ពីអ្នកគ្រប់គ្រង និង អ្នកដឹកនាំទាំងអស់នៅក្នុងផលិតកម្ម សាន់ដេខ្ញុំគិតថាខ្សែភាពយន្ត “សង្សារខ្មោច” នេះ នឹងទទួលបានការគាំទ្រពីប្រិយមិត្ត និងមិត្តៗយុវវ័យពេលដាក់បញ្ចាំង។

ម្យ៉ាងទៀតអ្វីធ្វើឱ្យខ្ញុំរំពឹងកាន់តែខ្លាំងគឺការចូលរួមសម្ដែងគ្រប់តារាទាំងអស់គ្នាផលិតកម្ម លើកលែងតែលោក ខេមរៈ សិរីមន្ត និងលោក ឆាយ វីរៈយុទ្ធ។ ទាំងខ្ញុំ ក៏ដូចជាកញ្ញា សុខ ពិសី នឹងប្រឹងសម្ដែងឱ្យអស់ពីសមត្ថភាពទោះជាមានការលំបាកបែបណាក៏ដោយដើម្បីឱ្យខ្សែភាពយន្តដំបូងរបស់ខ្ញុំចេញទៅទទួលបានការចាប់អារម្មណ៍ពីប្រិយមិត្ត។

Sabay៖ តើ នីកូគិតថាចំណុចត្រង់ណាខ្លះធ្វើឱ្យផលិតកម្មសាន់ដេ ជ្រើសរើសលោកឱ្យសម្ដែងជាតួឯកក្នុងខ្សែភាពយន្តនេះ?

នីកូ៖ តាមពិតខ្សែភាពយន្តនេះ ខាងផលិតកម្មសាន់ដេបានទាក់ទងខ្ញុំ តាំងពីខ្ញុំចូលមកលើកដំបូងម្ល៉េះ។ នេះជាការផ្ដល់ឱកាសសម្រាប់ខ្ញុំ ទោះជាការសម្ដែងនៅមានកម្រិតក្ដីតែខ្ញុំនឹងធ្វើវាឱ្យបាបល្អ។ ខ្ញុំមិនសូវដឹងច្បាស់ទេចំពោះការជ្រើសរើសខ្ញុំរួមនឹងកញ្ញា សុខ ពិសីឱ្យសម្ដែងជាតួឯកនេះ ប៉ុន្តែខ្ញុំគិតថាប្រហែលជាម្ចាស់ផលិតកម្ម ក៏ដូចជាអ្នកដឹកនាំមើលឃើញពីចំណុចល្អអ្វីមួយរបស់ខ្ញុំ ទើបគាត់ជ្រើសរើសខ្ញុំឱ្យសម្ដែងជាតួឯកក្នុងរឿង”សង្សារខ្មោច”។

Sabay៖ នីកូ ធ្លាប់ជាអ្នកផលិត និងដឹកនាំកម្មវិធីមួយរូបដែរនាពេលកន្លងមក តើសមិទ្ធផលសាច់រឿងនេះមានការចូលរួមពីលោកដែរឬយ៉ាងណា?

នីកូ៖ ទាំងការដឹងនាំសម្ដែង រួមទាំងការនិពន្ធក្រុមហ៊ុនជាអ្នករៀបចំទាំងអស់ ក៏ប៉ុន្តែយើងមានការពិភាក្សាគ្នាច្រើនមុននឹងខ្សែភាពយន្តនេះលេចចេញជារូបរាងឡើង។ ប្រការធ្វើបែបនេះដើម្បីឱ្យសាច់រឿងទាំងមូលចេញទៅទទួលការចាប់អារម្មណ៍ពីមហាជន។

Sabay៖ តើអ្វីជាឧបសគ្គចម្បងរបស់ នីកូក្នុងការសម្ដែងខ្សែភាពយន្តខ្នាតធំលើកដំបូងនេះ?

នីកូ៖ ខ្ញុំបានអានសាច់រឿងទាំងអស់រួចហើយ ឃើញថាមិនមានអ្វីជាឧបសគ្គខ្លាំងចំពោះខ្ញុំទេ ព្រោះអីខ្ញុំធ្លាប់សម្ដែងខារ៉ាអូខេជាហូរហែមកហើយ ជាពិសេសឈុតកម្សត់តែម្ដង គឺជាជំនាញរបស់ខ្ញុំ។ ប៉ុន្តែខ្ញុំគិតថាការលំបាករបស់ខ្ញុំមួយនឹងកើតកើតឡើង ដោយសារតែខ្សែភាពយន្តនេះតម្រូវឱ្យថតពេលយប់ ក្នុងព្រៃជ្រៅជាដើម។ ទាំងនេះខ្ញុំគិតថាជាកត្តាតូចមួយប៉ុណ្ណោះ ខ្ញុំនឹងប្រើបទពិសោធន៍ធ្លាប់មានកន្លងមកដើម្បីឱ្យការសម្ដែងជាទីចាប់អារម្មណ៍ពីប្រិយមិត្ត។

Sabay៖ តើពីមុនមក នីកូធ្លាប់សម្ដែងរួមគ្នានឹងកញ្ញា សុខ ពិសីដែរឬទេ ហើយថា តើការសម្ដែងរួមនឹងនេះនឹងសង្ឃឹមទទួលបានសំឡេងគាំទ្រពីទស្សនិកជនប៉ុន្មានភាគរយដែរ?

នីកូ៖ តាំងពីចូលផលិតកម្មសាន់ដេមក ខ្ញុំធ្លាប់សម្ដែងខារ៉ាអូខេច្រើនបទមកហើយជាមួយកញ្ញា សុខ ពិសី ប៉ុន្តែការសម្ដែងរឿងទើបលើកដំបូងនេះទេ។ តាមរយៈបទពិសោធន៍សម្ដែងរួមគ្នាកន្លងមកខ្ញុំគិតថាការសម្ដែងរបស់ពួកយើងនឹងទទួលបានការចាប់អារម្មណ៍សំណាក់មិត្តៗយុវវ័យ។

niko

Sabay៖ តើ នីកូគិតថាការក្លាយជាតួឯកនេះនឹងធ្វើឱ្យតារាផ្សេងទៀតអាក់អន់ស្រពន់ចិត្តទេឬ ខណៈលោកទើបតែបោះជំហានចូលមួយរយៈខ្លីទទួលតំណែងតួឯកភ្លាម ដោយឡែកតារាផ្សេងទៀតចូលយូរហើយតែមិនមានឱកាសក្លាយជាតួឯក?

នីកូ៖ រឿងហ្នឹងទាល់តែបងទៅសួរខាងផលិតកម្មបានច្បាស់ ខ្ញុំមិនដឹងទេ ព្រោះអីផលិតកម្មកាត់រៀបចំឱ្យខ្ញុំសម្ដែង ខ្ញុំដឹងតែសម្ដែង។ ប៉ុន្តែខ្ញុំគិតថាមុននឹងផ្ដល់តំណែងដល់តារាណាម្នាក់ឱ្យធ្វើជាឯកគេសិក្សាមើលច្បាស់លាស់ណាស់ ព្រោះគេខ្លាចរឿងរបស់គេចេញទៅមិនមានអ្នកគាំទ្រ។

ការរំពឹងថានឹងទទួលបានការចាប់អារម្មណ៍ពីមហាជនពីសំណាក់តារាចម្រៀងវ័យក្មេងលោក នីកូ ក្នុងការទទួលតំណែងតួឯកលើកដំបូងនៅសាន់ដេ គឺកើតឡើងបន្ទាប់ពីតារាចម្រៀងរូបនេះមិនទាន់មានបទចម្រៀងមួយណាធ្វើឱ្យមិត្តយុវវ័យចាប់អារម្មណ៍ខ្លាំងនៅឡើយទេចាប់តាំងពីឈានជើងចូលផលិតកម្មនេះ។ យ៉ាងណាក៏ដោយតារាសម្ដែងទាំងអស់ក្នុងខ្សែភាពយន្តខាងលើ រួមទាំងម្ចាស់ផលិតកម្មផងសុទ្ធតែរំពឹងខ្ពស់ថានឹងជោគជ័យពេលរឿង”សង្សារខ្មោច” ដាក់បញ្ចាំងតាមរោងភាពយន្ត។

នៅក្នុងខ្សែភាពយន្ត “សង្សារខ្មោច” លោក នីកូសម្ដែងជាតួអង្គនិស្សិតកាច់កុងជាមួយនឹងកញ្ញា សុខ ពិសី ដែលជាតួឯកស្រី។ ខ្សែភាពយន្តខ្នាតធំទី៥របស់ផលិតកម្មសាន់ដេនេះនឹងដាក់បញ្ចាំងជូនទស្សនិកជនទស្សនានាឱកាសព្រះរាជពិធីបុណ្យអុំទូកខាងមុខ៕