ព្រះសីហនុ៖ កម្លាំងនគរបាល ក្រុងព្រះសីហនុ បានធ្វើការស្រាវជ្រាវ រហូតឈានទៅ ដល់ការឃាត់ខ្លួនជន សង្ស័យម្នាក់ ដែលពាក់ព័ន្ធ ទៅនឹងសកម្មភាព លួចទ្រព្យសម្បត្ដិរបស់ ជនជាតិបរទេស ស្ថិតនៅផ្ទះសំណាក់ ហ៊ាន ហ៊ាន លើកោះរ៉ុង កាលពីល្ងាច ថ្ងៃទី២៣ ខែមេសា ឆ្នាំ២០១៥ ។

យោងតាមប្រភពព័ត៌មាន ពីមន្ដ្រីនគរបាល ព្រហ្មទណ្ឌក្រុង ព្រះសីហនុ បានបញ្ជាក់ថា ជនសង្ស័យដែល ត្រូវចាប់ខ្លួនពាក់ព័ន្ធទៅ នឹងការលួចទ្រព្យសម្បត្ដិ ខាងលើនេះ ឈ្មោះ សែម ចាន់លក្ខ័ អាយុ២៣ឆ្នាំ រស់នៅឃុំ រនាម ស្រុកទ្រាំ ខេត្ដតាកែវ ដោយឡែកជន បរទេសវិញ ឈ្មោះ JORRIT MICHIEL ស្នាក់នៅផ្ទះ សំណាក់ខាងលើ ជាអ្នកទេសចរ នៅខេត្ដព្រះសីហនុ ហើយទ្រព្យសម្បត្ដិរបស់ ខ្លួនរួមមានកាមេរ៉ា និងទូរស័ព្ទដៃត្រូវបាន ជនសង្ស័យរូបនេះ ចូលលួច ។

មន្ដ្រីនគរបាលបាន បញ្ជាក់ថាក្រោយពី ទទួលបានពាក្យបណ្ដឹង របស់ជនបរទេសរួច កម្លាំងនគរបាល ជំនាញព្រហ្មទណ្ឌ និងកម្លាំង នគរបាលមូលដ្ឋាន បានធ្វើការស្រាវជ្រាវ រហូតឈានទៅដល់ការ ចាប់ខ្លួនជន សង្ស័យ រូបនេះ កាលពីល្ងាច ថ្ងៃទី២៣ ខែមេសា ។
ក្រោយការចាប់ខ្លួនភ្លាមៗ នោះជនសង្ស័យ មិនបានសារភាព ពីទោសកំហុស និងសកម្មភាពរបស់ខ្លួន នោះឡើយ ពោលរហូតដល់ម៉ោង ៦ល្ងាច ថ្ងៃដដែលនោះ ទើបជនសង្ស័យសារភាព ដោយយកទ្រព្យ សម្បត្ដិរបស់ជនរង គ្រោះទាំងនេះ ទៅកប់ក្នុងដីខ្សាច់ រុំស្បោង ខ្មៅនៅក្រោម ដើមស្ងាវហួស បឹងកាឡូ ម៉ឹងឃី។

ក្រោយពីសារភាព ពីទោសកំហុសរបស់ ខ្លួនរួចមក បច្ចុប្បន្នជនសង្ស័យ រូបនេះត្រូវ បានយកទៅសួរនាំនៅ អធិការដ្ឋាននគរបាល ក្រុងព្រះសីហនុ ដើម្បីកសាង សំណុំរឿង បញ្ជូនទៅកាន់ សាលាដំបូងខេត្ដ ព្រះសីហនុ ដើម្បីបន្ដការសួរនាំ និងចាត់វិធានការ តាមផ្លូវច្បាប់ ។

សូមបញ្ជាក់ថា នៅលើកោះរ៉ុង ដែល ភាគច្រើនបំផុតជា កន្លែងស្នាក់នៅនិងដើរ លេងកំសាន្ត របស់ជនបរទេសនោះ ស្នងការ នគរបាលខេត្ដ ព្រះសីហនុ លោកឧត្ដមសេនីយ៍ ជួន ណារិន្ទ បានពង្រាយនិងដាក់ កម្លាំងនគរបាល យាមកាមតាមគោលដៅ ជាប្រចាំ នៅតំបន់ ទេសចរណ៍មួយនេះ ដើម្បីងាយស្រួលជួយ អន្ដរាគមន៍ទាន់ពេលវេលា ពេលដែលមាន បទល្មើសអ្វី មួយកើតឡើង ពីព្រោះកាលពី ពេលកន្លងទៅ សកម្មភាពប្លន់និង លួចទ្រព្យសម្បត្ដិ ជនបរទេស ព្រមទាំងការ វាយគ្នាទៅវិញ ទៅមក បានកើតឡើង នៅទីនោះ មិនចេះចប់ មិនចេះហើយ ។

ផ្តល់សិទ្ធដោយ ដើមអម្ពិល