វណ្ណ ស៊ីដារ៉ូ យុវជនដែលចាត់ទុកបរាជ័យការប្រកួត Film Camp មែន តែជាឱកាសធំ!

វណ្ណ ស៊ីដារ៉ូ យុវជនដែលចាត់ទុកបរាជ័យការប្រកួត Film Camp មែន តែជាឱកាសធំ!

កុនខ្លីរបស់យុវជន វណ្ណ ស៊ីដារ៉ូ ដែលបានចូលរួមប្រកួតប្រជែងក្នុងកម្មវិធី Film Camp កន្លងមក មានចំណងជើងថា “The Signal” ដែលមានន័យថា “សញ្ញា” និយាយអំពីស្នេហារបស់បុរសម្នាក់។ ប៉ុន្តែ កុនខ្លី ដែលមានរយៈពេលប្រមាណ ៩ នាទីនេះ មិនបានទទួលជយលាភីក្នុងការប្រកួតនោះឡើយ។

ទោះបីជាម្ចាស់ស្នាដៃបានត្រឹមពោលពាក្យថា សោកស្ដាយក៏ពិតមែន ប៉ុន្តែបរាជ័យនេះមិនបានឲ្យគេ រាថយឡើយ ផ្ទុយទៅវិញបែរជាគិតថា នោះជាឱកាសថ្មីសម្រាប់រូបគេទៅវិញ ។ “ក្រៅពីទទួលបានបទពិសោធន៍ល្អៗហើយនោះ មានខាងផលិតកម្មមួយ ហៅឲ្យទៅចូលរួមផលិតកុនខ្នាតធំជាមួយអ្នកជំនាញភាពយន្ត”។

វណ្ណ ស៊ីដារ៉ូ រំពឹងថា អាចនឹងទទួលបានការគាំទ្រ ពីមហាជនក្នុងស្រុក ព្រោះមានការយកចិត្តទុកដាក់លើគុណភាពជាចម្បង។ ម្យ៉ាងទៀត ប្រសិនបើមានឱកាសនោះ នឹងនាំភាពយន្តនោះទៅចាក់បញ្ចាំងទៅបរទេសទៀតផង ខណៈចំណងជើងរឿងកំពុងស្ថិតនៅក្នុងការលាក់លៀមយ៉ាងណាក្ដី។

“ចង់ឲ្យគេដឹងថា ខ្មែរក៏មានសមត្ថភាពផលិតកុនប្រកបដោយគុណភាព មិនចាញ់បរទេសឡើយ”។

ទោះបីជាយ៉ាងណា រូបគេនៅតែមានបំណងចូលរួមក្នុងកម្មវិធី Film Camp ម្ដងទៀត ដែលមិនមែនក្នុងនាមជាបេក្ខភាពប្រកួតប្រជែងដូចពីមុននោះទេ។ យុវជនរូបនេះ រំពឹងថា ប្រឹងប្រែងធ្វើយ៉ាងណាឲ្យបានក្លាយជាផ្នែកមួយ នៃការរៀបចំនៅក្នុងកម្មវិធីនេះទៅវិញ និង បំពេញតាមក្ដីស្រមៃរបស់គេ ដែលចង់ក្លាយជាផលិតករភាពយន្តម្នាក់នោះឲ្យបាន។

វណ្ណ ស៊ីដារ៉ូ ដែលមានប្រភពមកពីខេត្តកំពង់ឆ្នាំងនោះ ទើបតែបញ្ចប់ថ្នាក់បរិញ្ញាបត្រច្បាប់ ពីសាកលវិទ្យាល័យនីតិសាស្ត្រ និង វិទ្យាសាស្ត្រសេដ្ឋកិច្ច កាលពីពេលថ្មីនេះ។ ក្រៅពីការចូលរួមធ្វើកុននាពេលបច្ចុប្បន្ន រូបគេក៏កំពុងត្រៀមប្រឡងបញ្ចប់ជំនាញអក្សរសាស្ត្រអង់គ្លេស សម្រាប់ធុរកិច្ចពាណិជ្ជកម្មអន្តរជាតិ។

បើក្រឡេកទៅក្រោយបន្តិច វណ្ណ ស៊ីដារ៉ូ ជាកីឡាកររត់ប្រណាំងម៉ារ៉ាតុងវ័យក្មេង និង ជាបេក្ខភាពជយលាភីកម្មវិធី “ពេជ្រកំពុងច្នៃ” នៃស្ថានីយទូរទស្សន៍អាស៊ីអាគ្នេយ៍ផងដែរ។ ជំហានថ្មីរបស់គេ គឺការស្វែងយល់ពីកុនទាំងខ្មែរ និង បរទេសឲ្យបានច្រើន ដើម្បីស្វែងយល់ពីបទពិសោធន៍ទាំងនោះ ក្នុងការអភិវឌ្ឍន៍ខ្លួនឯង។

ស្របពេលដែលមិនទាន់មានសមត្ថភាពគ្រប់គ្រាន់នៅឡើយក៏ពិតមែន តែរូបគេកំពុងត្រៀមខ្លួនក្លាយខ្លួនជាអ្នកផលិតកុនដ៏ល្អម្នាក់នាពេលអនាគត ដោយព្យាយាមស្វះស្វែងរកការណែនាំបន្ថែមពីអ្នកជំនាញផ្នែកភាពយន្ត ដូចជា លោក ម៉ៅ អាយុទ្ធ, លោក រិទ្ធី ប៉ាន់, លោក ឆាយ បូរ៉ា និង លោក សុខ វិសាល ជាដើម៕

ប្រភព Sabay

មុន បន្ទាប់

មតិយោបល់