ភ្នំពេញ ៖ យុវជនម្នាក់ បានជិះម៉ូតូសេ ១២៥ ស៊េរីឆ្នាំ ២០១៤ មួយគ្រឿង ចេញពីធ្វើការត្រូវជនសង្ស័យ ៤នាក់ ជិះ ម៉ូតូ២គ្រឿង ប្រដាប់ដោយកាំភ្លើង២ដើម បានធ្វើសកម្មភាពធាក់ផ្តួល និងដកកាំភ្លើងភ្ជង់ប្លន់ ហើយជិះគេចខ្លួនបាត់ ដោយសុវត្ថិភាព ។ ហេតុការណ៍នេះ បានកើតឡើង កាលពីវេលាម៉ោង ១និង២០នាទី រំលងអាធ្រាត្រ ឈានចូលថ្ងៃទី ២១ ខែមេសា ឆ្នាំ២០១៥ នៅចំណុចខាងត្បូង វិទ្យាល័យព្រះស៊ីសុវត្ថិ តាមបណ្តោយផ្លូវលេខ១៨៤ ស្ថិតក្នុងសង្កាត់ ផ្សារថ្មីទី៣ ខណ្ឌដូនពេញ ។

ជនរងគ្រោះឈ្មោះ សេង សម្បត្តិ ភេទប្រុស អាយុ ២៥ឆ្នាំ មុខរបរ ធ្វើការនៅណាហ្គាវើល ស្នាក់នៅសង្កាត់ចាក់អង្រែ ក្រោម ខណ្ឌមានជ័យ ជិះម៉ូតូម៉ាកសេ ១២៥ ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ បាត់ដំបង 1R-8418 ។

តាមការៀបរាប់ពីជនរងគ្រោះ បានឲ្យដឹងថា មុនពេលកើតហេតុ រូបគេ និងមិត្តភក្តិម្នាក់ទៀត បានជិះម៉ូតូ មកពីធ្វើការ ហើយបានបន្តទៅម្តុំផ្សារសូរិយា ដើម្បីរកហូបបាយ បន្ទាប់មករូបគេ បានជិះម៉ូតូចេញ ក្នុងបំណងត្រឡប់ទៅផ្ទះ ដោយ ជិះតាមបណ្តោយផ្លូវលេខ១៨៤ ក្នុងទិសដៅពីលិចទៅកើត ខណៈមកដល់ចំណុចកើតហេតុ ស្រាប់តែលេចមុខ ជន សង្ស័យ៤នាក់ ជិះម៉ូតូ២គ្រឿង មួយគ្រឿងម៉ាក ហ្វីនណូ ពាក់ស្លាកលេខភ្នំពេញ 1CS-2284 និងម៉ូតូម៉ាកសេ១២៥ ពណ៌ខ្មៅ មិនចាំស្លាកលេខ ប្រដាប់ដោយកាំភ្លើងខ្លី ២ ដើម បានជិះមកពីក្រោយ ហើយបានធ្វើសកម្មភាព ធាក់ម៉ូតូ រូបគេឲ្យដួល ហើយបានដកកាំភ្លើងខ្លីចេញពីចង្កេះ ភ្ជង់គំរាមកុំឲ្យស្រែក បន្ទាប់មកក្រុមជនសង្ស័យ ក៏បានជិះគេចខ្លួន បាត់ស្រមោលតែម្តង ។

ក្រោយពេលកើតហេតុ ជនរងគ្រោះបានទៅដាក់ពាក្យបណ្តឹង នៅប៉ុស្តិ៍នគរបាល រដ្ឋបាលផ្សារថ្មីទី៣ ដើម្បីកំណត់មុខ សញ្ញា ងាយស្រួលសមត្ថកិច្ច តាមចាប់ជនសង្ស័យ យកមកផ្តន្ទាទោស តាមផ្លូវច្បាប់ ៕

ផ្តល់សិទ្ធដោយ ដើមអម្ពិល