កំពង់ចាម ៖ យុវជនម្នាក់ ដោយសារតែតូចចិត្តម្តាយរបស់ខ្លួន ស្រឡាញ់កូនមិនស្មើគ្នា បានផឹកទឹកអាស៊ីត បញ្ចប់ជីវិតត្រឹមអាយុ ២២ឆ្នាំ ស្ថិតនៅភូមិ ប្រសំ ឃុំរអាង ស្រុកកំពង់សៀម ខេត្តកំពង់ចាម កាលពី វេលាម៉ោង ៣រសៀល ថ្ងៃទី២០ ខែមេសា ឆ្នាំ២០១៥ ។

អធិការនគរបាលស្រុកកំពង់សៀម លោក ប៉ាក់ ជាតិ បានឲ្យដឹងថា យុវជនរងគ្រោះឈ្មោះ អឿ សំបូរ អាយុ ២២ឆ្នាំ រស់នៅភូមិឃុំ កើតហេតុ។

តាមប្រភពព័ត៌មានពីលោកអធិការបានបញ្ជាក់ថា ជនរងគ្រោះតូចចិត្តម្តាយស្រឡាញ់រូបគេ តិចជាង បងប្អូន ផ្សេងទៀត ស្រាប់តែខូចចិត្ត រហូត ទៅយក ទឹកអាស៊ីតមកផឹកសម្លាប់ខ្លួនតែម្តង ។ លោកបន្តថា ភ្លាមៗនោះ ក្រុមគ្រួសារបានជួយដឹកបញ្ជូន ទៅសង្រ្គោះនៅមនី្ទរពេទ្យ ផងដែរ ប៉ុន្តែបានដាច់ខ្យល់ ស្លាប់ទៅហើយ។

ក្រោយកើតហេតុ មន្រ្តីនគរបាលមូលដ្ឋាន និងមន្រ្តីនគរបាលផ្នែកបច្ចេកទេស បានចុះទៅពិនិត្យសព និង អះអាងថា ជនរងគ្រោះ ពិតជាស្លាប់ដោយសារផឹកទឹកអាស៊ីតប្រាកដមែន រួចប្រគល់ទៅឲ្យក្រុមគ្រួសារ យក ទៅធ្វើបុណ្យតាមប្រពៃណី៕

ផ្តល់សិទ្ធដោយ ដើមអម្ពិល