ស្រ្តីម្នាក់ រំភើបចិត្តយ៉ាង ខ្លាំង ពេលប្រទះ ឃើញ គុជ ៥០គ្រាប់ ក្នុងអយស្ទើរ

ស្រ្តីម្នាក់ រំភើបចិត្តយ៉ាង ខ្លាំង ពេលប្រទះ ឃើញ គុជ ៥០គ្រាប់ ក្នុងអយស្ទើរ

អាមេរិក៖ ស្រ្តីម្នាក់មានការ ភ្ញាក់ផ្អើលយ៉ាងខ្លាំង នៅពេល ប្រទះឃើញ គុជជា ច្រើនគ្រាប់ នៅក្នុងអយស្ទើរ (Oyster) បន្ទាប់ពីគាត់ បានកម្មុង់ ពីភោជនីយដ្ឋាន មួយកន្លែង។

លោកស្រី Toni Elliot អាយុ៥៣ឆ្នាំ បានកម្មុង់អយស្ទើរ សម្រាប់អាហារពេលល្ងាច ពីភោជនីយដ្ឋាន មួយកន្លែង ដែលមាន ឈ្មោះថា Pucket Boat House ស្ថិតក្នុងរដ្ឋ Tennessee សហរដ្ឋអាមេរិក កាលពីថ្ងៃ ព្រហស្បតិ៍ កន្លងទៅថ្មីៗនេះ។ ខណៈពេល ដែលគាត់ញ៉ាំ អយស្ទើរ ទាំងនោះ ស្រាប់តែគាត់ មានអារម្មណ៍ថា ដូចជាឈឺធ្មេញ នៅពេល ទំពារវា។ ភ្លាមៗនោះ គាត់ក៏បានហៅ អ្នកបំរើនៅ ក្នុងហាង ដើម្បីឲ្យជួយពិនិត្យ។ ប៉ុន្តែអ្វីដែល ភ្ញាក់ផ្អើល គឺ Elliot បានប្រទះឃើញ គុជនៅ ក្នុងអយស្ទើរ ចំនួន ៥០គ្រាប់ បន្ទាប់ពី គាត់បានខ្ជាក់វា ចេញពី ក្នុងមាត់។

អ្នកគ្រប់គ្រង ក្នុងភោជនីយដ្ឋាន លោក Greg Hargest បាននិយាយថា "នៅពេលមាន រឿងហេតុនោះ ខ្ញុំក៏បាន ទៅមើលនាង ថាតើនាងមានបញ្ហា រឺក៏អត់ ប៉ុន្តែស្រាប់តែលឺនាង និយាយថា នាងបាន រកឃើញ គុជក្នុងមាត់ របស់នាង។ ពួកយើងមិនដែល ជួបប្រទះឃើញ រឿងបែបនេះទេ ពីមុនមក គឺធ្លាប់មាន តែករណីខ្លះ មានអ្នករកឃើញ គុជតែមួយ គ្រាប់ប៉ុណ្ណោះ ប៉ុន្តែនេះជាលើក ទីមួយហើយ ដែលមានមនុស្ស រកឃើញគុជ ដល់ទៅ ៥០គ្រាប់ បែបនេះ"។

យ៉ាងណាមិញ បុគ្គលិកក្នុងហាង ក៏បានប្រមូលគុជទាំងនោះ ដាក់ចូលទៅក្នុងពែង រួចឲ្យទៅ លោកស្រី Elliot ដើម្បីយក ទៅផ្ទះ។

លោក Greg Hargest បានឲ្យដឹងទៀតថា "វាជាអយស្ទើររបស់នាង ហើយគុជទាំងនោះ នៅក្នុងអយស្ទើរ។ វាដូចជាការ ឈ្នះឆ្នោតអីចឹង នាងរំភើប ខ្លាំងណាស់ នៅពេលទទួលបាន គុជទាំងនោះ"។

យ៉ាងណាមិញ ចំពោះគុជតូចៗ ទាំងនោះ គឺមិនត្រូវបានគេដឹងថា វាមានតម្លៃ ប៉ុន្មាននោះទេ៕

គុជជាច្រើន ក្នុងចានរបស់លោកស្រី Toni Elliot