កោះកុង ៖ នាយឧត្ដមនាវី ទៀ វិញ អគ្គមេបញ្ជាការរង នៃកងយោធពល ខេមមរភូមិន្ទ និង ជាមេបញ្ជាការ កងទ័ពជើងទឹក សហការ ជាមួយកម្លាំងនគរបាល និងអាជ្ញាធរពាក់ព័ន្ធ កាលពី រសៀលថ្ងៃទី៨ ខែមេសា ឆ្នាំ២០១៥ បានដឹកនាំកម្លាំង ចុះទៅ ដុតបំផ្លាញចោល អាស្រម របស់ជនជាតិ វៀតណាម ដែលទៅ តាំងសមាធិ នៅលើកោះកុង ក្រៅ ត្រង់ចំណុច ចំការដូងទី៤ ក្នុងឃុំកាពិ ស្រុកកោះកុង ខេត្ដកោះកុង ដែលមាន ចម្ងាយប្រមាណ ២០ គីឡូម៉ែត្រ ពីទីរួម ខេត្ដកោះកុង ។

ប្រតិបត្ដិការចុះទៅ ដុតបំផ្លាញអាស្រម របស់ជនជាតិវៀតណាម ដូចជា ការបោះតង់ ស្នាក់នៅ និងរូប សំណាកព្រះនាង គង់ស៊ីអ៊ីម កម្ពស់ ៨ម៉ែត្រនោះ បានធ្វើឡើង ក្រោយពី មានបទ បញ្ជារបស់ សម្ដេចនាយករដ្ឋមន្ដ្រី ហ៊ុន សែន មិនឱ្យ មានសកម្មភាព បែបសាសនា ណាមួយកើត ឡើងនៅលើកោះ នោះឡើយ ហើយនៅលើ កោះនោះ ក៏មិនត្រូវបាន អាជ្ញាធរ អនុញ្ញាតផងទេ ។

យោងតាមប្រភពព័ត៌មានពី មន្ដ្រីយោធា ជើងទឹក ដែលចូលរួម ក្នុងប្រតិបត្ដិការដុត បំផ្លាញ ទីអាស្រម និងដេញជនជាតិ វៀតណាម ចេញពីលើ កោះកុងក្រៅ ខាងលើនេះ បានបញ្ជាក់ថា ក្រោយពី ទទួលបាន បទបញ្ជាពី នាយករដ្ឋមន្ដ្រីរួចមក នាយ ឧត្ដមសេនីយ៍ ទៀ វិញ ដោយមាន ការចូលរួម ពីស្នងការ នគរបាលខេត្ដកោះកុង និង មន្ដ្រីមន្ទីរធម្មការ និងសាសនាខេត្ដ ព្រមទាំង អាជ្ញាធរពាក់ព័ន្ធ បានធ្វើដំណើរ តាមអូរប័រ ជិត២ ម៉ោងចេញពី រួមខេត្ដកោះកុង ឆ្ពោះទៅកាន់ កោះកុងក្រៅ ដើម្បីដុត បំផ្លាញទីអាស្រម ទាំងនេះ និងដេញ ជនជាតិវៀតណាម ចេញពីលើកោះនោះ។

មន្ដ្រីយោធាជើងទឹកដដែលនេះ បាន បញ្ជាក់ទៀតថា ពេលធ្វើដំណើរទៅដល់កោះ កណ្ដាល សមុទ្រនោះ ក៏ប្រទះឃើញ មានទី អាស្រម សម្រាប់រៀបចំពិធីសាសនា និងរូបសំណាក ព្រះនាង គង់ស៊ីអ៊ីម ដែលមានកម្ពស់ ៨ម៉ែត្រ និងប្រទះឃើញ ជនជាតិវៀតណាម ជាសង្ឃ ចំនួន៧អង្គ និងសមាជិកជា ឧបាសក ចំនួន៣នាក់ ស្រីម្នាក់ ប្រុសពីរនាក់ ។

តាមមន្ដ្រីយោធាជើងទឹក ដដែលនេះបាន បញ្ជាក់ទៀតថា ចំពោះជនជាតិវៀតណាម ទាំងព្រះសង្ឃ និងឧបាស កទាំងនេះ មានលិខិត ឆ្លងដែនត្រឹមត្រូវ ហើយ ជាសមាជិកនៅក្នុង សមាគម សាសនាអន្ដរជាតិ ដែលមានទីតាំ ងស្ថិតនៅសង្កាត់ដង ទង់ ក្រុងខេមរភូមិន្ទ ។ តាមមន្ដ្រីយោធា ដដែលនេះ ជនជាតិ វៀតណាមទាំងនេះ ត្រូវបាន នាំខ្លួនមកកាន់ សមាគមរបស់ ពួកគេវិញហើយ និងមិនអនុញ្ញតឱ្យ ធ្វើដំណើរទៅ កាន់កោះ នោះទៀតឡើយ៕

ផ្តល់សិទ្ធដោយ ដើមអម្ពិល