ភ្នំពេញ ៖ ក្រុមចោរមាន គ្នា៥នាក់ ជិះម៉ូតូសេ១២៥ ចំនួនពីរគ្រឿង បានធ្ចើសកម្មភាព បាញ់ជនរងគ្រោះចំនួន ពីរគ្រាប់ នៅនឹងមុខផ្ទះ ជនរងគ្រោះ បណ្តាលឲ្យស្លាប់ នៅកន្លែងភ្លាមៗ ។

ហេតុការណ៍នេះ បានកើតឡើង កាលពីវេលាម៉ោង ១និង០៥នាទី យប់ឈានចូល ថ្ងៃទី៧ ខែមេសា ឆ្នាំ២០១៥ នៅតាមបណ្តោយ ផ្លូវលំ ភូមិសន្សំកុសល៣ សង្កាត់បឹងទំពុន ខណ្ឌមានជ័យ ។ សមត្ថកិច្ចបានឲ្យដឹងថា ជនរងគ្រោះ មានឈ្មោះ ហ៊ួត គឹមហុង ភេទប្រុស អាយុ២៦ឆ្នាំ មុខរបរលក់ថ្នាំពេទ្យ ឲ្យក្រុមហ៊ុន ឯកជន មានទីលំនៅ ផ្ទះលេខ៣៣ ភូមិសន្សំកុសល៣ សង្កាត់បឹងទំពុន ជិះម៉ូតូម៉ាក MSX ពណ៌ខ្មៅ ស្លាកលេខ ភ្នំពេញ 1CC-0005 ត្រូវចំនួន២គ្រាប់ មួយគ្រាប់ចំថ្ពាល់ឆ្វេង និងមួយគ្រាប់ទៀត ក្រោមឃ្លាកខាងឆ្វេង ស្លាប់នៅនិង កន្លែងកើតហេតុ។ ចំណែកជនសង្ស័យ មានគ្នា៥នាក់ ជិះម៉ូតូពីរគ្រឿង ម៉ាកសេ១២៥ ក្រោយពី បាញ់ជនរងគ្រោះហើយ ជិះគេចខ្លួន ដោយសុវត្ថិភាព ។

នៅកន្លែងកើតហេតុ សមត្ថកិច្ចបាន រកឃើញសំបកគ្រាប់១ និងគ្រាប់k59 ចំនួន1គ្រាប់ ។ តាមសាក្សីឃើញ ហេតុការណ៍ បាននិយាយប្រាប់ សមត្ថកិច្ចថា នៅវេលាម៉ោងខាងលើ គាត់បានឃើញ ជនរងគ្រោះជិះម៉ូតូ MSX ចូលតាមផ្លូវលំ ហើយបានឃើញ ម៉ូតូ C125 ពីរគ្រឿង មានគ្នា៥នាក់ ជិះតាមពីក្រោយ ហើយក៏ឮសម្លេង ផ្ទុះចំនួន២គ្រាប់ និងឮសម្លេង ស្រែកជួយផងៗ ហើយក៏ឃើញ ម៉ូតូពីរគ្រឿងនោះ ជិះចេញទៅវិញ បាត់ទៅតែម្តង ។ នៅក្នុងហោប៉ៅខោ ជនរងគ្រោះសមត្ថកិច្ច បានរកឲ្យឃើញ មានបុងគិត លុយ១សន្លឹក មានឈ្មោះហាង សំណង់12 សប្បាយៗ ដែលជនរងគ្រោះ ទើបមកពី ផឹកស៊ី ។

ក្រោយធ្វើកោសល្យវិច័យរួច សមត្ថកិច្ចបានប្រគល់ សាកសពឲ្យទៅក្រុមគ្រួសារ ដើម្បីធ្វើបុណ្យ តាមប្រពៃណី ៕

ផ្តល់សិទ្ធដោយ ដើមអម្ពិល