កំពង់ចាម ៖ រថយន្តកុងតឺន័រ មួយគ្រឿង បានបង្កគ្រោះ ថ្នាក់ចរាចរណ៍ ទាំងស្រុង ដោយសារតែ អ្នកបើករថយន្ត មិនបានគោរពច្បាប់ ចរាចរណ៍ ហើយបើកបញ្ច្រាសទិសផ្លូវ រួចក៏ជ្រុលទៅបុក រថយន្តនីសាន់ ធុនតូចមួយគ្រឿង បណ្តាលឲ្យស្រ្តីម្នាក់ រងរបួស យ៉ាងធ្ងន់ធ្ងរ ត្រូវដឹកបញ្ជូន ទៅកាន់មន្ទីរពេទ្យភ្លាមៗ។

ហេតុការណ៍ គ្រោះថ្នាក់ចរាចរណ៍ ដែលបង្កឡើង ដោយរថយន្តធុនធំ ខាងលើនេះ បានកើតឡើង កាលពីវេលាម៉ោង ប្រមាណ ៦៖៥០ នាទីព្រឹកព្រលឹមថ្ងៃទី៥ ខែមេសា ឆ្នាំ២០១៥នេះ ស្ថិតនៅលើ ផ្លូវជាតិលេខ៦ ក្នុងភូមិបាធាយ ឃុំបាធាយ ស្រុកបាធាយ ខេត្តកំពង់ចាម ។

មន្រ្តី នគរបាលចរាចរ ស្រុកបាធាយ បានឲ្យដឹងថា មុនពេលកើតហេតុ មានរថយន្ត កុងតឺន័រ មួយគ្រឿង ក្បាលពណ៌ក្រហម ពាក់ស្លាក លេខ ភ្នំពេញ 3C-3701 បើកដោយបុរសម្នាក់ បានធ្វើដំណើរ បញ្ច្រាសផ្លូវ ស្រាប់តែ បានជ្រុលទៅបុក រថយន្តនីសាន់ មួយគ្រឿង បណ្តាលឲ្យស្រ្តីម្នាក់ ជាអ្នកបើករថយន្ត រងរបួសយ៉ាងធ្ងន់ធ្ងរ ។

មន្រ្តីនគរបាល ដដែលនេះ បានបញ្ជាក់ទៀត ក្រោយកើតហេតុ កម្លាំងនគរបាល បានចុះទៅជួយ អន្តរាគមន៍ ភ្លាមៗហើយធ្វើការឃាត់ខ្លួន អ្នកបើករថយន្ត និងទាំងរថយន្ត យកមកសួរនាំ ដើម្បីចាត់ការតាម ផ្លូវច្បាប់។

ស្នងការនគរបាល ខេត្តកំពង់ចាម លោកឧត្តមសេនីយ៍ បែន រ័ត្ន បានបញ្ជាក់ថា សម្រាប់ករណីគ្រោះថ្នាក់ ចរាចរណ៍មួយនេះ លោកបាន បញ្ជាឲ្យ នគរបាលជំនាញ កសាងសំណុំរឿងបញ្ជូន អ្នកបើករថយន្ត ទៅកាន់តុលាការ ពីព្រោះបានបង្កហេតុ ទាំងស្រុងតែម្តង ក្រោយពីបានបើករថយន្ត ច្រាសផ្លូវ ខណៈភាគី ជនរងគ្រោះ បើកតាមគន្លងផ្លូវខាងស្តាំងដៃរបស់ខ្លួនយ៉ាងត្រឹមត្រូវ ។

មន្រ្តីនគរបាល ស្រុកបាធាយ បានបន្តទៀតថា រហូតមកដល់ព្រឹកថ្ងៃដដែលនេះ អ្នកបើករថយន្តបង្ក ត្រូវបានយកទៅសួរនាំ នៅអធិការដ្ឋាន នគរបាលស្រុកបាធាយ ៕

ផ្តល់សិទ្ធដោយ ដើមអម្ពិល