សៀមរាប ៖ នាយការិយាល័យ ប្រឆាំងបទល្មើស សេដ្ឋកិច្ច នៃស្នងការដ្ឋាន នគរបាល ខេត្តសៀមរាប បានឲ្យដឹង ថា ហាងនំប៉័ង ស្ថិតនៅ ខាងក្រោយផ្សារសាមគ្គី ក្នុងក្រុងសៀមរាប ដែល ត្រូវបាន ព្រះរាជអាជ្ញាអមសាលា ដំបូងខេត្ត សៀមរាប បញ្ជាឲ្យបិទ ជាបណ្តោះអាសន្ន ជាប់ពាក់ព័ន្ធ និងករណីពុល មនុស្សជាង៥០០នាក់ កាលពីសប្តាហ៍មុននោះ ត្រូវបានព្រះរាជអាជ្ញា សម្រេចឲ្យ បើកដំណើរការ ឡើងវិញហើយ ។

លោក សឿន សេន នាយការិយាល័យ ប្រឆាំងបទល្មើសសេដ្ឋកិច្ច បានបញ្ជាក់នៅ រសៀលថ្ងៃទី៣ ខែមេសា ឆ្នាំ២០១៥នេះ «ហាងនំប៉័ង ត្រូវបានអនុញ្ញាត បើកឲ្យដំណើរការ ឡើងវិញ ហើយ កាលពី ម្សិលមិញ(ថ្ងៃទី២ខែមេសា) ក្រោយពេល ដែលសាច់នំប៉័ង រកឃើញថា មិនមាន ជាតិពុលនោះ »។

យ៉ាងណាក៏ដោយ នាយការិយាល័យរូបនេះ បានបន្តទៀតថា សម្រាប់គ្រឿងផ្សំ របស់ នំប៉័ងនោះ មិនទាន់ចេញ ពីបន្ទប់ ពិសោធន៍នៅ ឡើយទេ ដូច្នេះមិនដឹងថា មានជាតិពុល ឫមួយ យ៉ាងណាឡើយ។

សូមបញ្ជាក់ថា កាលពីថ្ងៃទី២៩ ខែមីនា ឆ្នាំ២០១៥ កម្លាំងនគរបាល ប្រឆាំងបទល្មើសសេដ្ឋកិច្ច សហការជាមួយ មន្រ្តី កាំកុងត្រូល ដឹកនាំដោយតំណាង អយ្យការ អមសាលាដំបូង ខេត្តសៀមរាប បានចុះទៅ ធ្វើការ ត្រួតពិនិត្យ និងយកនំប៉័ង និងគ្រឿងផ្សំ ទៅពិនិត្យ នៅបន្ទប់ពិសោធន៍ របស់កាំកុងត្រូល នៅទីស្នាក់ការ កណ្តាល ក្នុងរាជធានី ភ្នំពេញ ដើម្បីរកឲ្យឃើញថា តើជាតិពុល ចេញពិសាច់នំប៉័ង ឫគ្រឿងផ្សំ ហើយនៅពេលនោះដែរ ហាងនំប៉័ង ក៏ត្រូវបាន តំណាងអយ្យការ សម្រេចឲ្យបិទជា បណ្តោះ អាសន្ន ផងដែរ ។

ហាងនំប៉័ងនេះ ត្រូវបានអ្នករៀបចំកម្មវិធី របស់អង្គការទស្សនៈពិភពលោក (World Vision) ទិញចំនួន ៧៥០ដើម យកទៅចែកជូន ក្មេងសិស្សសាលា និងមនុស្សពេញវ័យ នៅស្រុក ជីក្រែង ធ្វើឲ្យ មានអាការៈពុល កើនឡើងជាង ៥០០នាក់ ជាពិសេសកុមារ៕

ផ្តល់សិទ្ធដោយ ដើមអម្ពិល