ខេត្តបាត់ដំបង ៖ រថយន្តសង្គ្រោះបន្ទាន់របស់មន្ទីរពេទ្យអង្គការហានដា អីមេជិនស៊ី ដែលមានដឹកអ្នក  ជំងឺផង បានបុកជាមួយ រថយន្តម៉ាក វីហ្គោរបស់មន្ត្រី យោធាម្នាក់យ៉ាង ពេញទំហឹង កាលពីវេលាម៉ោង ១០ និង៣០នាទីព្រឹក ថ្ងៃទី០២ មេសា ២០១៥ ស្ថិតនៅចំណុច ផ្លូវបែកជា ៤ ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង បណ្ដាលឱ្យរថយន្ត ទាំង២គ្រឿងរងការ ខូចខាតយ៉ាង ដំណំដូចគ្នា តែមិនមាន រងគ្រោះ ថ្នាក់នោះទេ ។

សមត្ថកិច្ចចរាចរណ៍បានឱ្យដឹងថា រថយន្តទាំង២គ្រឿងបានបុកគ្នានៅត្រង់ផ្លូវបែកជាបួនជាផ្លូវដ៏ មមារ ញឹកបំផុត ។ រថយន្តពេទ្យ ដែលដឹក អ្នក ជំងឺបានបើកយ៉ាងលឿន ជាមួយនិងសំឡេងស៊ឺរ៉ែនផង ប៉ុន្តែពេលដល់ចំណុចខាងលើ ស្រាប់តែមានរថយន្តម៉ាកវីហ្គោ ពណ៌ស្ករ ពាក់ ស្លាក់លេខ ភ្នំពេញ 2AA-7929 ក្នុងគោលដៅ កាត់ទទឹងផ្លូវគ្នា ទើបត្រូវរថយន្ត ពេទ្យបុកចំក្បាលខាងមុខ បណ្ដាលឱ្យកៀប ជាប់រុញ គ្នាឡើងលើ ចិញ្ចើមផ្លូវ តែមិនបង្កគ្រោះថ្នាក់ ដល់មនុស្ស ឬអ្នកជំងឺដែល នៅក្នុងរថយន្តពេទ្យនោះទេ។

អ្នកឃើញហេតុការណ៍បានឱ្យដឹងថា រថយន្តពេទ្យបានដឹកអ្នកជំងឺធ្វើដំណើរពីទិសខាងកើតឆ្ពោះទៅលិច រីឯរថយន្តម៉ាកវីហ្គោ បើកយ៉ាង លឿនតាម បណ្ដោយផ្លូវលេខ៣ ពីជើងទៅត្បូង ក្នុងគោលដៅ កាត់ទទឹងផ្លូវគ្នា។ សាក្សីបន្តថា ពេលដល់ចំណុច កើតហេតុ រថយន្តវីហ្គោ នោះ មិនបានបន្ថយល្បឿនទេ ខណៈរថយន្តពេទ្យដែលដឹកអ្នកជំងឺបើកស៊ឺរ៉ែនមិនបង្អង់ល្បឿនដែរ ក៏បុកគ្នាពេញទំហឹងតែម្ដង ។

នៅកន្លែងកើតហេតុ គេឃើញម្ចាស់រថយន្តវីហ្គោដែលគេស្គាល់ថា ជាមន្ត្រីយោធាផង បានស្ដីបន្ទោសទៅលើអ្នកបើកបររថយន្តពេទ្យថា «អាងតែខ្លួនជារថយន្ត ពេទ្យបើកលឿន ហូសហេតុ» ប៉ុន្តែអ្នកឈរមើល មួយចំនួនបាន បញ្ចេញមតិខ្សិបខ្សៀវគ្នា ដោយរិះគន់ទៅលើ មន្ត្រីយោធា នោះវិញថា «ខុសខ្លួនឯង ដែលបើកលឿន មិនឃើញរថយន្ត ពេទ្យបើកភ្លើងស៊ឺរ៉ែន សុំផ្លូវលាន់សំឡេងកងរំពង បែរជា បន្ទោសឡានពេទ្យថា បើកលឿន»។

ទោះបីជាយ៉ាងណា ក្រោយពីពិនិត្យនិង វាស់វែងនៅកន្លែងកើតហេតុ សមត្ថកិច្ចចរាចរណ៍ខេត្ត បាននាំយករថយន្ត បង្កហេតុទាំង២គ្រឿង ទៅរក្សាទុកនៅ ការិយាល័យចរាចរណ៍ ខេត្តហើយ ដើម្បីដោះស្រាយតាមផ្លូវច្បាប់ ៕

ផ្តល់សិទ្ធដោយ កោះសន្តិភាព