ភ្នំពេញ៖ បុរសជនជាតិចិនម្នាក់ បើករថយន្តម៉ាក sienna មួយគ្រឿងក្នុង ល្បឿនលឿន ជ្រុលបុករថយន្ត ម៉ាកកាមរីបាឡែន ខណៈកំពុង ឈប់ទិញបាយឆា បណ្តាលឲ្យរងការ ខូចខាតដាច់កញ្ចក់ម្ខាង ហើយរថយន្តបង្ក បានព្យាយាម បើករត់ពីចំណុច ផ្លូវលេខ៦៣ ស្ថិតក្នុងសង្កាត់ បឹងកេងកង់ទី១ រហូតដល់ខាងលិច និងរង្វង់មូលព្រះសង្ឃ ជួន ណាត ត្រូវបានរថយន្ត រងគ្រោះដេញឃាត់ជាប់។

ហេតុការណ៍នេះ បានកើតឡើងកាលពី វេលាម៉ោង ២៣និង១០នាទី យប់ថ្ងៃទី២ ខែមេសា ឆ្នាំ២០១៥ ស្ថិតក្នុងសង្កាត់ ទន្លេបាសាក់ ខណ្ឌចំការមន។ តាមសម្តីជនរងគ្រោះ បានឲ្យដឹងថា មុនពេលកើតហេតុ រូបគេបានបើករថយន្ត ម៉ាកកាមរីបាឡែន ពណ៌ស ពាក់ស្លាកលេខ ភ្នំពេញ 2AD-8329 ធ្វើដំណើរតាម បណ្តោយផ្លូវលេខ ៦៣ ក្នុងទិសដៅពីត្បូងទៅជើង ខណៈមកដល់ ចំណុចកើតហេតុ ក៏បានអែបខាង ឈប់ទិញបាយឆា ភ្លាមនោះ ស្រាប់តែមានរថយន្តម៉ាក sienna ពណ៌ស ពាក់ស្លាកលេខ ភ្នំពេញ 2AA-9058 បើកបរដោយ បុរសជនជាតិ ចិនម្នាក់ ធ្វើដំណើរស្របទិសគ្នា ក្នុងល្បឿនលឿន បានរេចង្កូតបុកចំ ពីចំហៀង បណ្តាលឲ្យដាច់ កញ្ចក់ម្ខាងខាងឆ្វេង និងរងការខូចខាត ហើយរថយន្តបង្ក បានព្យាយាមបើករត់ រហូតដល់ចំណុច ខាងលិច និងរង្វង់មូលព្រះសង្ឃ ជួន ណាត ក៏ត្រូវជនរងគ្រោះ ដេញឃាត់ បានតែម្តង។

ក្រោយពេលកើតហេតុ ភាគីទាំងសងខាង បានធ្វើការសម្របសម្រួលគ្នា ដោយភាគីខាងរថយន្តបង្ក ព្រមទទួលកំហុស ចេញថ្លៃខូចខាតទៅលើ រថយន្តរងគ្រោះ ចំនួន២០០ដុល្លារ ដើម្បីបញ្ចប់រឿង កុំឲ្យរំខានដល់សមត្ថកិច្ច៕

ផ្តល់សិទ្ធដោយ ដើមអម្ពិល