រាជធានីភ្នំពេញ៖ នារីម្នាក់បាន ជិះម៉ូតូចេញពីធ្វើការ ក៏ត្រូវក្រុមចោរហារយ ចំនួន៤នាក់ជិះម៉ូតូ២គ្រឿង បានធ្វើសកម្មភាព ឆក់កាបូបតែមិនបាន សម្រេច កាលវេលាម៉ោង១១ និង៣០នាទីយប់ ថ្ងៃទី៣១ ខែមីនា ឆ្នាំ២០១៥ តាមបណ្តោយ មហាវិថីព្រះមុនីរ៉េត ក្នុងសង្កាត់បឹងសាឡាង ខណ្ឌទួលគោក ប្រមាណទល់មុខ សណ្ឋាគាអ៊ិនធឺខន។

នារីរងគ្រោះ មានឈ្មោះលីណា អាយុ២៣ឆ្នាំ ធ្វើការនៅកាស៊ីណូ ស្នាក់នៅម្តុំផ្លូវសូឡា។ នាងបានឲ្យដឹងថាមុនពេល កើតហេតុបានជិះម៉ូតូម៉ាកស្គុពី ធ្វើដំណើរតាមបណ្តោយ មហាវិថីព្រះមុនីរ៉េត ក្នុងទិសដៅពីកើតទៅលិច បំណង់ទៅផ្ទះនៅម្តុំផ្លូវសូឡា។ ស្រាប់តែជិះមកដល់ ចំណុចកើតហេតុខាងលើ ក៏លេចមុខក្រុម ជនសង្ស័យ ចំនួន៤នាក់ជិះម៉ូតូ២គ្រឿង ដោយជនសង្ស័យ២នាក់ ជិះម៉ូតូមកអែប រួចធ្វើសកម្មភាពទាញ យក កាបូប តែត្រូវនាងទាញ យកមកបានវិញ គ្រាន់តែដាច់ខ្សែកាបូបប៉ុណ្ណោះ ភ្លាមៗនោះ ក៏លេចជនសង្ស័យ២នាក់ទៀត ជិះម៉ូតូមកបំបុកពីក្រោយម៉ូតូនាង បណ្តាលឲ្យម៉ូតូជន សង្ស័យដួលក៏ត្រូវអ្នកធ្វើដំណើរ ឃើញ ហើយព្យាយាមលើម៉ូតូជិះគេច ខ្លួនបាត់ស្រមោលតែម្តង ។

ក្រោយកើតហេតុនារីរងគ្រោះ មិនបានរងរបួសអ្វីនោះទេ គ្រាន់តែមានការភិតភ័យ ហើយបានជិះម៉ូតូបន្តទៅ ផ្ទះបន្តទៀតតែម្តង ៕

ផ្តល់សិទ្ធដោយ កោះសន្តិភាព