ចិន៖ យុវជនម្នាក់ មកពីខេត្ត Zhejiang បានជិះកង់ ក្នុងចំងាយផ្លូវជាង ៣,០០០ គីឡូម៉ែត្រ ដើម្បីទៅ សុំមិត្តស្រីរបស់ខ្លួន រៀបការ។ គូស្នេហ៍ទាំងពីរបាន ជួបគ្នាដំបូង នៅក្នុងឆ្នាំ ២០០៤ គ្រាដែលពួកគេ រៀននៅមហាវិទ្យាល័យ ក្នុងខេត្ត Heilongjiang ជាមួយគ្នា។ 

យុវជនមកពីខេត្ត Zhejiang ដែលជិះកង់ក្នុងចំងាយផ្លូវជាង ៣០០០ គីឡូម៉ែត្រសុំមិត្តស្រីរៀបការ

យ៉ាងណាមិញ ក្នុងឆ្នាំ២០១២ នារីដែលជាសង្សារបាន បដិសេធសំណើររបស់មិត្តប្រុស ដែលចង់ឲ្យនាង ទៅផ្ទះរបស់គេ នៅក្នុងខេត្ត Zhejiang ដើម្បីរៀបមង្គលការ ដោយសំអាងលើហេតុផលថា នាងមានភាពស្ទាក់ស្ទើរ ក្នុងការប្តូរទៅនៅឆ្ងាយ ពីឪពុកម្តាយ ដែលរស់នៅក្នុងខេត្ត Liaoning។

នាងបានដាក់លក្ខខណ្ឌថា ខ្លួននឹងយល់ព្រមទៅតាម មិត្តប្រុសដរាបណា ទីកន្លែងដែលនាងទៅនៅនោះ គឺជិតគ្នានឹងស្រុករបស់នាង ដែលអាចធ្វើដំណើរដោយជិះកង់បាន។ លក្ខខណ្ឌត្រង់ចំនុចនេះហាក់ ធ្វើឲ្យស្នេហារបស់ពួកគេ ទាំងពីរកាន់តែយ៉ាប់យឺនទៅៗ។ ដោយមិនបណ្តោយខ្លួនឲ្យលិច លង់ទៅ ក្នុងភាពអស់សង្ឃឹម បុរសជាសង្សារ បានប្តេជ្ញាយកឈ្នះឧបសគ្គ តាមរយៈការ ចាប់ផ្តើមបេសកកម្មជិះកង់៣១ថ្ងៃ ដោយជិះចេញពីទីក្រុង Harbin ខេត្ត Heilongjiang ទៅទីក្រុង Taizhou ខេត្ត Zhejiang។ គាត់បានផ្ញើរ រូបថត ដោយមានកាន់សៀវភៅ សរសេរពាក្យសុំរៀបការ ឲ្យទៅមិត្តស្រី នៅរៀងរាល់២ថ្ងៃម្តង។ 

ដោយសារការលះបង់ និងខិតខំតស៊ូបែបនេះហើយ ទីបំផុតឪពុកម្តាយខាងស្រី បានអង្វរឲ្យកូនរបស់ពួកគាត់ ព្រមរៀបការ និងទៅរស់នៅជាមួយ មិត្តប្រុសរបស់នាង ក្នុងទីក្រុង Taizhou ខេត្ត Zhejiang។ បន្ទាប់ពីបុរសជាសង្សារ ជិះកង់ជាង ៣ពាន់គីឡួម៉ែត្រ ដើម្បីសុំនាងរៀបការរួចមក គូស្នេហ៍ទាំងពីរ ទីបំផុតបានរៀបការ ក្រោយស្រលាញ់គ្នាជាង១០ឆ្នាំ ហើយក៏នឹងទទួលបាន កូនជាចំណងដៃលើកដំបូង នៅក្នុងខែមិថុនាខាងមុខនេះផងដែរ៕

បេសកកម្មនេះត្រូវជិះកង់៣១ថ្ងៃ ដោយជិះចេញពីទីក្រុង Harbin ទៅទីក្រុង Taizhou 


ផែនទីបង្ហាញផ្លូវពីទីក្រុង Harbin ខេត្ត Heilongjiang ទៅទីក្រុង Taizhou ខេត្ត Zhejiang

ប្រភព៖ បរទេស

ដោយ៖ Roth

ខ្មែរឡូត