រវាងទ្រនំចាស់ និង ទ្រនំថ្មីអ្នកគិតថា តារាទាំង ៤ ដួងនេះ នរណាខ្លះធ្លាក់ចុះ ឬកើនប្រជាប្រិយភាពជាងមុន?

រវាងទ្រនំចាស់ និង ទ្រនំថ្មីអ្នកគិតថា តារាទាំង ៤ ដួងនេះ នរណាខ្លះធ្លាក់ចុះ ឬកើនប្រជាប្រិយភាពជាងមុន?

ពេលជ្រកកោនក្នុងទ្រនំចាស់តារាទាំង ៤ ដួងខាងក្រោមនេះ តែងតែមានបទចម្រៀងលេចធ្លោដែលជាទីចាប់អារម្មណ៍ពីអ្នកគាំទ្ររបស់ខ្លួន។ ចុះពេលពេលវត្តមានមកដល់ទ្រនំថ្មីប្រិយមិត្តគិតថា ប្រជាប្រិយភាពតារាទាំង៤ រូបខាងក្រោមធ្លាក់ប្រជាប្រិយភាពជាងមុន ឬមួយក៏កើនឡើងជាងមុន?

តារាចម្រៀងទាំង ៤ រូបដែល Sabay លើកមកឱ្យទស្សនិកជនបញ្ចេញមតិព្រឹកនេះមានដូចជា លោក ឆាយ វីរៈយុទ្ធ ចេញពីផលិតកម្ម Bigman ទៅសាន់ដេ កញ្ញា សុគន្ធ និសា ចេញពីផលិតកម្មរស្មីហង្សមាសទៅ ផលិតកម្ម Town លោក ខាន់ ជែមន៍ ចេញពីផលិតកម្ម Rock ទៅសាន់ដេ និង លោក នីកូ ចេញពីផលិតកម្ម M ទៅសាន់ដេ។

អាចនិយាយថា ជាស្ដេចត្រាញ់ក៏ថាបាន ព្រោះពេលនៅផលិតកម្មចាស់តារាទាំង ៤ ដួងនេះ តែងមានបទចម្រៀងលេចធ្លោជាបន្តបន្ទាប់ និងមានទីផ្សារខ្ពស់ទៀតផង។ តែទោះជាយ៉ាងណាក៏ដោយវត្តមានក្នុងផលិតកម្មថ្មីតារាល្បីៗទាំងនេះក៏នៅតែមានបទចម្រៀងល្បីៗជាទីចាប់អារម្មណ៍ពីប្រិយមិត្តដូចគ្នា។

chhay vireakyuth

លោក ឆាយ វីរៈយុទ្ធ ល្បីតាំងពីនៅផលិតកម្ម M មកម្ល៉េះ ប៉ុន្តែ អ្វីដែលធ្វើឱ្យទស្សនិកជនចាប់អារម្មណ៍តារាចម្រៀងរូបនេះកាន់តែខ្លាំងគឺពេលលោកបោះជំហានទៅកាន់ផលិតកម្ម Bigman។ នៅក្នុងផលិតកម្ម Bigman ឆាយ វីរៈយុទ្ធ អាចចាត់ទុកថា ជាស្ដេចក៏ថាបាន ព្រោះបទចម្រៀងណាដែលជាទីចាប់អារម្មណ៍ពីទស្សនិកជនមិនអាចរំលងដៃលោកបាននោះទេ។ ទោះជាយ៉ាងណាក៏ដោយក្រោយពីផលិតកម្មមួយនេះ មានបញ្ហារអាក់រអួលនៅឆ្នាំ២០១២ លោកបានប្ដូរទ្រនំមកកាន់ផលិតកម្ម សាន់ដេ។

នៅក្នុងទ្រនំថ្មីលោក ឆាយ វីរៈយុទ្ធ នៅតែទទួលបានការចាប់អារម្មណ៍ពីទស្សនិកជនដដែល។ បទចម្រៀងមួយបទគឺ “សង្សារលួចលាក់” បានក្លាយជាបទប្រចាំត្រកូលរបស់តារាចម្រៀងរូបនេះក្នុងទ្រនំថ្មី ដោយទទួលបានការគាំទ្រជាខ្លាំងពីទស្សនិកជន។ តែអ្វីដែលប្រិយមិត្តឃើញជាក់ស្ដែងតារាចម្រៀងមានប្រភពមកពីខេត្ត កំពង់ចាមខាងលើ មិនមែនជាស្ដេចត្រាញ់ដូចនៅផលិតកម្មចាស់នោះទេ ព្រោះឧបសគ្គដ៏ធំនៅចំពោះមុខគឺលោក ខេមរៈ សិរីមន្ត និង តារាចម្រៀងដទៃទៀត។

sokun nisa

កញ្ញា សុគន្ធ និសា ក៏មិនសូវខុសពី លោក ឆាយ វីរៈយុទ្ធ ប៉ុន្មានដែរកាលនៅផលិតកម្មរស្មីហង្សមាស កញ្ញាក៏ជាទីចាប់អារម្មណ៍ពីមហាជនផងដែរ ព្រោះបទចម្រៀងល្បីៗជាហូរហែតែងស្ថិតក្នុងដៃនាងជានិច្ច។ ស្ថិតក្នុងដៃក៏ដោយសារតែតារាចម្រៀងស្រីស្រគត់ស្រគំរូបនេះមានខ្នងបង្អែកធំមួយដែរគឺលោក សុខ ជំនោរ ដែលជាសង្សារសំណព្វជាង ១០ ឆ្នាំ របស់ខ្លួន។

យ៉ាងណាក៏ដោយក្រោយពីចែកផ្លូវគ្នាដើរជាមួយលោក សុខ ជំនោរ នៅដើមឆ្នាំ២០១២កញ្ញា សុគន្ធ និសា បានផ្លាស់មកច្រៀងក្នុងផលិតកម្មថ្មីគឺ ថោន។ គ្រាន់តែវត្តមានមកដល់ ថោនភ្លាមទាំងអ្នកគ្រប់គ្រង ក៏ដូចជាអ្នកនិពន្ធបានយកចិត្តទុកដាក់ជាខ្លាំងដល់តារាចម្រៀងរូបនេះក្នុងការរកបទចម្រៀងថ្មីៗដើម្បីជួយលើកប្រជាប្រិយភាពរបស់នាងឱ្យខ្ពស់ជាងមុន។ បទ “បងនឹកគេដល់ថ្នាក់ចង់ឈឺ” និង បទ “លៀសហាល៥រយ” បានទទួលការចាប់អារម្មណ៍ជាច្រើនពីទស្សនិកជន។

អ្នកគ្រប់គ្រងក៏ដូចជាអ្នកនិពន្ធក្នុងផលិតកម្មនេះថែមទាំងព្រលយពាក្យថា កញ្ញា សុគន្ធ និសា ឡើងប្រជាប្រិយភាពជាងនៅផលិតកម្មចាស់។ ប៉ុន្តែក៏មានការលើកឡើងថា កញ្ញាធ្លាក់ប្រជាប្រិយភាពជាងមុនផងដែរពេលប្ដូរមកកាន់ទ្រនំថ្មី។

khan chem

ងាកមកមើល លោក ខាន់ ជែមន៍ វិញអ្នកណាៗក៏ដឹងថា លោកជាតារាចម្រៀងលេចធ្លោជាងគេដែរពេលមានវត្តមានក្នុងផលិតកម្ម Rock។ ក៏ប៉ុន្តែក្រោយពីផលិតកម្មនេះផ្អាកដំណើរការណ៍ផលិតបទចម្រៀងលោកបានបោះជំហានទៅក្នុងផលិតកម្ម សាន់ដេ។

អ្វីដែលប្រិយមិត្ត និងមិត្តៗយុវវ័យមើលឃើញម្ចាស់បទ “ស្ដាយក្រោយ” រូបនេះមិនអាចជិះសេះលែងដៃដូចមុនបានទៀតទេ ព្រោះនៅក្នុងផលិតកម្ម សាន់ដេ ប្រជុំដោយតារាល្បីៗមានសមត្ថភាពខ្ពស់ដូចជា ខេមរៈ សិរីមន្ត និង ឆាយ វីរៈយុទ្ធ ជាដើម។ ប្រការនេះតម្រូវឱ្យ ខាន់ ជែមន៍ ពង្រឹងសមត្ថភាពបន្ថែមដើម្បីប្រជែងប្រជាប្រិយភាពជាមួយតារាផ្សេងទៀត។

បើទោះជាមានបទចម្រៀងចេញលក់លើទីផ្សារជាហូរហែ ក៏ប៉ុន្តែគេមិនទាន់ឃើញបទចម្រៀងណាមួយរបស់លោក ខាន់ ជែមន៍ ផ្ទុះខ្លាំងធ្វើឱ្យទស្សនិកជនចាប់អារម្មណ៍ខ្លាំងដូចមុនទៀតទេ។ យ៉ាងណាក៏ដោយតារាចម្រៀងរូបនេះក៏មានឱកាសបានសម្ដែងខ្សែភាពយន្តធំៗរបស់ សាន់ដេដែលបានថតរួចរាល់ និងកំពុងថតបន្តផងដែរ។

niko

រីឯ លោក នីកូ ដែលបានឈានជើងទៅកាន់ផលិតកម្ម សាន់ដេ ជាមួយលោក ឆាយ វីរៈយុទ្ធ និង លោក ខាន់ ជែមន៍ ដែរក៏មិនសូវខុសគ្នាប៉ុន្មានដែរ ព្រោះកាលនៅផលិតកម្ម M លោកជាតារាចម្រៀងឈានមុនគេ និងជាទីចាប់អារម្មណ៍ពីទស្សនិកជន។ វត្តមានមកដល់សាន់ដេ មិនងាយស្រួលដូចនៅ M នោះទេលោក នីកូ ត្រូវប្រឈមមុខនឹងតារាចម្រៀងល្បីៗជាច្រើនទៀតដែលមានសមត្ថភាពប្រហាក់ប្រហែល និង ខ្ពស់ជាងខ្លួន។

មកទល់នឹងពេលនេះប្រិយមិត្ត និង មិត្តៗយុវវ័យមិនទាន់ឃើញបទចម្រៀងមួយណារបស់លោក នីកូ ធ្វើឱ្យគេចាប់អារម្មណ៍ និង ចង់ស្ដាប់ដូចមុនទៀតទេ។ យ៉ាងណាក៏ដោយអ្នកគ្រប់គ្រង ក៏ដូចជាអ្នកនិពន្ធក្នុងផលិតកម្មសាន់ដេកំពុងតែដុតដៃដុតជើងក្នុងការធ្វើឱ្យតារាចម្រៀងរបស់ខ្លួនទាំងអស់ទទួលបានការចាប់អារម្មណ៍ខ្លាំងដូចគ្នាទៅទស្សនិកជន។

ក្នុងចំណោមតារាទាំង ៤ រូបខាងលើ គឺ ៣ ដួងកំពុងជ្រកកោននៅផលិតកម្ម សាន់ដេ និង មួយដួងទៀតនៅ ថោន។ ពួកគេទាំង៤សុទ្ធសឹងតែជាតារាល្បីឈ្មោះកំពុងតែទទួលបានការគាំទ្រ ពីប្រិយមិត្ត និង មិត្តៗយុវវ័យ៕

ប្រភព Sabay

មុន បន្ទាប់

មតិយោបល់