បរទេស៖ យោងតាមប្រភព សារព័ត៌មាន CNN បានចុះផ្សាយថា អ្នកបើកបររង (co-pilot) ដែលបើកយន្តហោះ Germanwings អ៊ែរបឺស A320  បីេកយន្តហោះ ទៅបំបុកភ្នំ Alps ក្នុងប្រទេសបារាំងតែម្តង ដែលបណ្តាលឲ្យមនុស្ស ១៥០នាក់ លើយន្តហោះ បាត់បង់ជីវិតទាំងអស់ ដោយមាន ចេតនា  នេះបើតាមការបញ្ជាក់ ជាផ្លូវការ ពីក្រុមអ្នកស៊ើបអង្កេត។

តាមប្រភពដដែល បានឲ្យដឹងថា យោងតាមវេបសាយ Flightrader24 ដែលតាមដានទិន្នន័យផ្លូវអាកាស រកឃើញថា យន្តហោះនេះ ត្រូវបានបញ្ជាដោយនរណាម្នាក់ នៅខាងក្នុងបន្ទប់កាប៊ីន ដោយមានការផ្លាស់ប្តូរ រយៈកំពស់យន្តហោះពី ៣៨,០០០ ហ្វីត (១១,៥៨២ម៉ែត្រ) ទៅកាន់ ១០០ ហ្វីត (៣០ម៉ែត្រ) ។

ប្រភព CNN បានបញ្ជាក់ទៀតថា អ្នកបើកបររង ដែលបញ្ជាយន្តហោះនោះ មានឈ្មោះ Andreas Lubitz វ័យ ២៨ឆ្នាំ សញ្ជិតអាល្លឺម៉ង់។ បើតាម ខ្សែអាត់សម្លេង ពីប្រអប់ខ្មៅ ដែលត្រូវបានរកឃើញ ឲ្យដឹងថា អ្នកបើកបររង រូបនេះ បានចាក់សោរមិនឲ្យ អ្នកបើកយន្តហោះ ម្នាក់ទៀត ចូលទៅកាន់ ក្នុងបន្ទប់បញ្ជបើកបរ ឡើយ។

យ៉ាងណាមិញ ពេលនេះអាជ្ញាធរ ប្រទេសអាល្លឺម៉ង់ បានថ្លែងថា «យើងត្រូវតែ សន្មត់ថា ឧបទ្ទវហេតុធ្លាក់ យន្តហោះ A320 ជើងហោះហើរ 4U 9592 នេះ កើតឡើងដោយមានចេតនា» ។ ខណៈ លោក Carsten Spohr ជានាយកប្រតិបត្តិ ក្រុមហ៊ុនអាកាសចរណ៍ Germanwings នេះបាន និយាយថា «យើងគ្មាន ពាក្យអ្វីដែលត្រូវនិយាយផ្សេងទៀត ដែលយន្តហោះជួបឧបទ្ទវហេតុនេះ កើតឡើងដោយ អ្នកបើកបររង ជាអ្នកមានចេតនា ធ្វើឲ្យយន្ត ហោះធ្លាក់ » ។

តែទោះបីជាយ៉ាងណា ពេលនេះ ក្រុមអ្នកស៊ើបអង្កេត មិនទាន់ដឹងថា តើមូលហេតុអ្វីបានជា អ្នកបើកបររង  Andreas Lubitz មានចេតនា បង្កឲ្យមាន ឧបទ្ទវហេតុនោះឡើយ ប៉ុន្តែក្រុមអ្នកស៊ើបអង្កេត បានទៅឆែកឆេរ ផ្ទះរបស់អ្នកបើកបររងនោះ ដើម្បីស្វែងរក មូលហេតុ ពិតប្រាកដ ផងដែរ ។ គួរបញ្ជាក់ដែរថា ពេលនេះ រដ្ឋាភិបាលបារាំង បានស្នើឲ្យ FBI ជួយស៊ើបអង្កេត លើហេតុការណ៍នេះ ខណៈក្រុមអ្នកស៊ើបអង្កេត កំពុងស្វែងរក ប្រអប់ខ្មៅទី២ ដើម្បីអាចដឹងសកម្មភាព ដែលកើតឡើង នានាទីចុងក្រោយមុន ពេលយន្តហោះ បានធ្លាក់៕

អ្នកបើកបររង Andreas Lubitz ត្រូវបានបញ្ជាក់ថា មានចេតនាធ្វើឲ្យយន្តហោះធ្លាក់


ក្រុមអ្នកស៊ើបអង្កេតបានចុះទៅត្រួតពិនិត្យ ផ្ទះ របស់ អ្នកបើកបររង Andreas Lubitz


ក្រុមស៊ើបអង្កេត បន្តស្វែងរកប្រអប់ខ្មៅទីពីរ

រូបភាព បញ្ជាក់ពីសកម្មភាពដែលបានលឺចេញពីប្រអប់ខ្មៅ

ប្រភព CNN | Dailymail

ដោយ ៖ទីន

ខ្មែរឡូត