បន្ទាយមានជ័យ ៖ គ្រោះថ្នាក់ចរាចរណ៍ មួយបង្កឡើង ដោយរថយន្ត ម៉ាកកាមរី ចង្កូតស្តាំ ដឹកត្រី គ្មានស្លាកលេខ បុកគោយន្តដឹកអង្កាម ពីក្រោយ កាលពីវេលាម៉ោង ៥ព្រឹក ឈានចូលថ្ងៃទី ២៥ ខែមីនា ឆ្នាំ២០១៥ នៅលើផ្លូវជាតិ លេខ៥ ត្រង់ចំនុចមុខ សាលាស្រុកអូរជ្រៅ ស្ថិតនៅភូមិ កូបលិច ឃុំកូប ស្រុកអូរជ្រៅ ខេត្តបន្ទាយមានជ័យ បណ្តាលឲ្យមនុស្ស ម្នាក់ស្លាប់ និងម្នាក់ទៀត រងរបួសស្រាល ។

លោក ឆេងអី សុខា អធិការស្រុកអូរជ្រៅ បានប្រាប់ឲ្យ ដឹងតាមទូរស័ព្ទថា ករណីគ្រោះថ្នាក់ ចរាចរណ៍នេះ គឺមូលហេតុ អ្នកបើកបរ រថយន្តកាមរីចង្កូចស្តាំ ផលិតឆ្នាំ ១៩៩៥ ដឹកត្រី គ្មានស្លាកលេខ គ្មានការប្រុងប្រយ័ត្ន និងខ្វះបច្ចេកទេស គ្រប់គ្រាន់ នៅតាមប្រព័ន្ធរថយន្ត ជាពិសេស បើករថយន្តហួស លើសល្បឿន កំណត់ផងដែរ ទើបបណ្តាលឲ្យទៅ បុកគោយន្តដឹក អង្កាមពីក្រោយ បណ្តាលឲ្យមនុស្សម្នាក់ រួមដំណើរស្លាប់ និងអ្នកបើកបរ គោយន្តរង របួសស្រាល ហើយបង្កឲ្យ គោយន្តធ្លាក់ ស្នាមភោ្លះ (ខូចខាតធ្ងន់) ផងដែរ រីឯ រថយន្តកាមរី ផ្ទុះឆាបឆេះអស់ តែសំណាង ម្ចាស់រថយន្តបាន ផុតពីសេចក្តីស្លាប់ និងរត់គេច បាត់ស្រមោល ។

លោកបានបន្តថា ជនរងគ្រោះ ឈ្មោះ កែវ សំបូរ ភេទស្រី អាយុ ២០ឆ្នាំ រស់នៅភូមិ-ឃុំ គោកទំលាប់ ស្រុកមង្គលបុរី ខេត្តបន្ទាយមានជ័យ ស្លាប់នៅកន្លែង កើតហេតុ និងឈ្មោះ សៅ សាន់ ភេទប្រុស អាយុ ៣០ឆ្នាំ អ្នកបើកគោយន្ត របួសស្រាល រស់នៅភូមិ-ឃុំ គោកទំលាប់ ស្រុកមង្គលបុរី ខេត្តបន្ទាយមានជ័យ ។ ចំណែកអ្នកបើករថយន្ត រត់បាត់ស្រមោល ពុំដឹងអត្តសញ្ញាណ នៅឡើយនោះទេ។

ក្រោយពីកើតហេតុ សមត្ថកិច្ចបានយក រថយន្តពន្លត់អគ្គីភ័យ នៃស្នងការដ្ឋានខេត្ត មកអត្តរាគមន៍ បាញ់ទឹកពន្លត់ រថយន្តបង្ក រួចស្ទូចគោយន្ត រួមទាំងរថយន្ត យកទៅរក្សាទុក នៅអធិការដ្ឋាន នគរបាលស្រុកអូរជ្រៅ ដើម្បីរង់ ចាំការមកដោះស្រាយគ្នា ចំពោះមុខច្បាប់ នាពេលក្រោយ ៕

ផ្តល់សិទ្ធដោយ ដើមអម្ពិល