ជប៉ុន៖ បេក្ខនារីជនជាតិជប៉ុន ស្បែកខ្មៅ ដំបូងគេបង្អស់ ដែលឈ្នះជ័យលាភី បវរកញ្ញាឯកជប៉ុន បានឆ្លងកាត់នូវ ឧបសគ្គជាច្រើន រហូតទទួលបាន ជ័យជំនះ ប៉ុន្តែបានទទួលរង ការរិះគន់ ពីទស្សនិកជន ដោយសារតែនាង មិនទាន់ដូច ជនជាតិជប៉ុន ១០០ភាគរយ។

នាង Ariana Miyamoto

យោងតាមប្រភពព័ត៌មាន បានឲ្យដឹងថា បេក្ខនារី ដែលឈ្នះជ័យលាភី បវរកញ្ញាឯកជប៉ុន វ័យ២០ឆ្នាំ មានឈ្មោះថា Ariana Miyamoto ដែលមានស្បែកខ្មៅ ដំបូងគេបង្អស់ របស់ប្រទេសជប៉ុន បានទទួលរង នូវការរិះគន់ យ៉ាងខ្លាំង ពីសំណាក់ទស្សិកជន និងអ្នកប្រើប្រាស់ អ៊ីនធឺណែត នៅលើបណ្តាញសង្គម នានា ហើយត្រូវបង្ខំ ឲ្យការពារខ្លួនឯង ប្រឆាំងនឹងការ ចោទប្រកាន់ថា “នាងមិនមែនជា ជនជាតិជប៉ុន ១០០ភាគរយ” ព្រោះឪពុករបស់នាង គឺជាជនជាតិ អាហ្វ្រិក-អាមេរិក។

ប្រភពដដែល បានឲ្យដឹងទៀតថា Ariana Miyamoto ជាកូនកាត់ ដែលម្តាយ របស់នាង គឺជាជនជាតិ ជប៉ុន រីឯឪពុក របស់នាង គឺជាបុរស ស្បែកខ្មៅ ជនជាតិ អាហ្វ្រិក-អាមេរិក។ នាង Miyamoto បាននិយាយប្រាប់ ឲ្យដឹង នៅក្នុងកិច្ចសម្ភាសន៏ ជាមួយនឹង សារព័ត៌មាន ជប៉ុន ថា “ទោះបីជា សម្បកក្រៅនាង មើលទៅមិនដូចជា ជនជាតិជប៉ុន ១០០ភាគរយ ក៏ពិតមែន ប៉ុន្តែនៅក្នុង ខ្លួននាង គឺជាជនជាតិជប៉ុន ១០០ភាគរយ។”

គួរបញ្ជាក់ផងដែរថា នៅក្នុងប្រទេសជប៉ុន នាង Miyamoto ត្រូវបានគេហៅថា “Hafu” ដែលមានន័យថា មនុស្សដែលមានសាច់ឈាម ពាក់កណ្តាល ជាជនជាតិជប៉ុន។

យ៉ាងណាមិញ នាង Miyamoto ដែលជាបេក្ខនារី ស្បែកខ្មៅ មកពីទីក្រុង Nagasaki នៃប្រទេសជប៉ុន ដែលឈ្នះជ័យលាភី បវរកញ្ញាឯកជប៉ុន រូបនេះ បានទទួលរង នូវការរិះគន់ និងការមិនសប្បាយចិត្ត ពីទស្សនិកជន និងអ្នកប្រើប្រាស់ បណ្តាញសង្គម នានា ដោយសារតែ នាងមិនមានរូបរាង ដូចជនជាតិជប៉ុន ពេញលេញ ១០០ភាគរយ និងដោយសារតែ ឪពុកនាង គឺជាជនជាតិ អាហ្វ្រិក-អាមេរិក៕

ប្រភព ៖ Asiantown

កែសម្រួលដោយ ៖ ប៊ី

ខ្មែរឡូត