ខេត្តស្វាយរៀង ៖ មានការភ្ញាក់ផ្អើលមួយ ខណៈប្រជាពលរដ្ឋបាន ប្រទះឃើញសាកសពមនុស្ស ស្រីម្នាក់ហើមស្អុយរលួយ ហើយមិនត្រូវស្គាល់អត្តសញ្ញាណទេ ដែលគេសង្សយ័ថា មានឧក្រិដ្ឋជនចាប់រំលោភ រួចសម្លាប់យកមកបោះចោល ទាំងអាក្រាតនៅក្នុងគុម្ពោធរំពាក់ ។

ហេតុការណ៍នេះ កើតឡើងកាលពីវេលាម៉ោង ៥ល្ងាចថ្ងៃទី១៧ មីនា ២០១៥ ស្ថិតនៅភូមិថ្លុកព្រីង ឃុំ ពពែត ស្រុកស្វាយទាប នៅក្នុងគុម្ពោត រំពាក់ ដែលមានសភាពហើម ស្អុយរលួយទៅហើយនិងមិនដឹងថា តើជាករណីអំពើមនុស្ស ឃាតរំលោភសម្លាប់ ដោយសមត្ថកិច្ចកំពុងធ្វើការស៊ើបអង្កេត យ៉ាងយកចិត្តទុកដាក់ និងបានអំពាវនាវដល់ ប្រជាពលរដ្ឋទាំងអស់ ដែលមានបាត់ សមាជិកគ្រួសារ ភេទស្រីដែលមានរូបភិនភាគដូចរូបថតនេះ ដែលជនរងគ្រោះស្លៀកសំពត់ខៀវ និងពាក់អាវរងាក្រឡាការ៉ូ ។ បើមានបាត់សមាជិក គ្រួសារដូចខាងលើ សូមទំនាក់ទំនងមន្ត្រី នគបាលប៉ុស្ត៍រដ្ឋបាលឃុំពពែត ។

បើតាមលោកវរសេនីយ៍ទោខឹម ឡៃ នាយការិយាល័យនគរបាល ព្រហ្មទណ្ឌកម្រិតធ្ងន់ស្នងការ នគបាលខេត្តបានឱ្យដឹងថា រហូតមកដល់វេលាម៉ោង៧ព្រឹកថ្ងៃទី១៩ មីនា ២០១៥ នេះ មានសាច់ញាតិដែល ត្រូវជាម្តាយឈ្មោះង៉ូ ធីឌិន អាយុ៤៦ឆ្នាំ ជាជនជាតិ វៀតណាមមានទីលំនៅក្នុងភូមិ២ ឃុំប៉ីមែ ស្រុកកូជី ទីក្រុង ហូជីមិញ បានបញ្ជាក់ថា បានស្គាល់គឺពិតជាកូនរបស់គាត់ឈ្មោះង៉ូ ង៉ុកហ្វូត ភេទស្រីអាយុ៨ឆ្នាំ ជាសិស្ស ជាជនជាតិវៀត ណាម ត្រូវបានគេចាប់ជម្រិតចេញ ពីសាលាកាលពីថ្ងៃទី២៦ មករា  ២០១៥ នៅប្រទេស វៀតណាម  ។

ប្រភពដដែលបន្តថា រូបគាត់ជាម្តាយបានមក ធ្វើការនៅក្នុងកាស៊ីណូក្រុងបាវិត ខេត្តស្វាយរៀង ក្នុងព្រះរាជណាចក្រកម្ពុជា ដោយទុកកូនផ្ញើតាចាស់ម្នាក់ នៅផ្ទះក្បែរគ្នាមើលថែ និងនាំជូនទៅមកពីសាលារៀន ហើយនៅថ្ងៃ២៦ មករា ២០១៥ អ្នកមើលថែទៅយក ស្រាប់ តែបាត់ពីសាលា ក្រោយមកទើបដឹងថា មានគេចាប់ជម្រិតយកប្រាក់ ដោយពួកគាត់គ្មានប្រាក់ឱ្យគេ ទើបគេសម្លាប់ចោល ហើយអ្នកចាប់ជម្រិត គឺជាជនជាតិវៀតណាម ដឹងថាប្តី-ប្រពន្ធគាត់មកធ្វើការនៅ កាស៊ីណូបាវិតនេះ ។

បើតាមការពិនិត្យឃើញថា ពិតជាជនជាតិវៀតណាមប្រាកដមែន ដោយនៅជាមួយសាកសព មានកាតាបសៀវភៅ ប៊ិច និងកាតសិស្ស ទើបសមត្ថកិច្ចប្រគល់សពឱ្យ ក្រុមគ្រួសារយកទៅប្រទេសវៀតណាម ដើម្បីធ្វើបុណ្យ និងមានសមត្ថកិច្ចភាគី វៀតណាមបានមកទទួលបញ្ជូន សពទៅប្រទេសវៀតណាម ផងដែរនៅវេលាម៉ោង ០៣រសៀលថ្ងៃ១៩ មីនា ២០១៥ នេះ និងបន្តរួមគ្នាស៊ើបអង្កេត រកជនដៃដល់យកទៅ ផ្តន្ទាទោសតាមច្បាប់។

ផ្តល់សិទ្ធដោយ កោះសន្តិភាព