ភ្នំពេញ ៖ យុវជនម្នាក់ត្រូវ បានស្លាប់ភ្លាមៗ នៅនិងកន្លែងកើតហេតុ ដោយសារជិះ ម៉ូតូមួយគ្រឿង ក្នុងល្បឿនលឿន បានជ្រុល ទៅបុករ៉ឺម៉ក ដឹកបន្លែ កាលពីវេលាម៉ោង ២៣និង០០នាទី ថ្ងៃទី១៨ ខែមីនា ឆ្នាំ២០១៥ ស្ថិតនៅតាមបណ្តោយ ផ្លូវជាតិលេ២១បេ ភូមិទួលក្រសាំង ឃុំរកាខ្ពស់ ស្រុកស្អាង ខេត្តកណ្តាល ។

នគរបាលបានឲ្យដឹងថា មុនពេលកើតហេតុ មានម៉ូតូមួយគ្រឿង ម៉ាកស្កុបពី ពណ៌ក្រហម ពាក់ស្លាកលេខ ភ្នំពេញ 1BY.5950 បើកបរដោយ បុរសម្នាក់ មិនស្គាល់អត្តសញ្ញាណ អាយុប្រហែល២៥ឆ្នាំ បើកបរក្នុងទិសដៅ ពីត្បូងទៅជើង លុះពេលមកដល់ ចំណុចកើតហេតុ ខាងលើ ក៏បានបុកជាមួយ នឹងរ៉ឺម៉កដឹក បន្លែមួយគ្រឿង បើកបរដោយឈ្មោះ ភឿន សឿន ភេទប្រុស អាយុ ៤៦ឆ្នាំ មុខរបរកសិករ រួមដំណើរ ដោយឈ្មោះ ផូ ម៉េង ភេទស្រី អាយុ៤៥ឆ្នាំ មុខរបរកសិករ និងអ្នករួមដំណើរ ម្នាក់ទៀត ឈ្មោះ សឿន សា ភេទស្រី អាយុ ២៣ឆ្នាំ មុខរបរកសិករ ទាំងបីនាក់ មានទីលំនៅភូមិ ផ្លូវបំបែក ឃុំទឹកវិល ស្រុកស្អាង ខេត្តកណ្តាល។ បណ្តាលឲ្យអ្នក បើកបរម៉ូតូ ស្លាប់ភ្លាមៗ នៅកន្លែងកើតហេតុ ចំណែកអ្នកបើកបររ៉ឺម៉ក និងអ្នករួមដំណើរម្នាក់ រងរបួសស្រាល ម្នាក់ទៀត រងរបួសធ្ងន់។

ក្រោយពេលកើតហេតុ នគរបាលបានចុះទៅដល់ រួចយកវត្ថុតាង ទាំងពីរគ្រឿង មករក្សាទុកនៅប៉ុស្តិ៍ នគរបាលរការខ្ពស់ និងអ្នកបើកបរ បាននាំខ្លួនមកអធិការដ្ឋាន នគរបាលស្រុកស្អាង ដើម្បីធ្វើការសាកសួរ ចំណែកសពយក ទៅតម្កល់ទុកនៅ វត្តឈូងលាភ ដើម្បីរង់ចាំ ក្រុមគ្រួសារ ទៅទទួលយកមកធ្វើបុណ្យ តាមប្រពៃណី៕

ផ្តល់សិទ្ធដោយ ដើមអម្ពិល