កំពង់ចាម ៖ ក្នុងប្រតិបត្ដិការ បង្ក្រាបល្បែង ស៊ីសងកន្ទុយលេខ ស្ថិតនៅភូមិបឹងកុក២ សង្កាត់បឹងកុកក្រុង កំពង់ចាម កាលពីវេលាម៉ោង ២និង ៣០នាទី រសៀលថ្ងៃទី១៨ ខែមីនា ឆ្នាំ២០១៥នោះ កម្លាំងនគរបាល ក៏បានចុះមក ឃាត់ខ្លួនបុរសម្នាក់ ដែលបានរារាំង មិនឱ្យ ចាប់ខ្លួនមេ កន្ទុយលេខ ។

មន្ដ្រីនគរបាល ក្រុងកំពង់ចាម បានបញ្ជាក់ ថា ក្រោយពីមាន ករណីបង្ក្រាបកន្ទុយលេខ និងមានការ ឃាត់ខ្លួន ស្ដ្រីជាមេកន្ទុយលេខម្នាក់ ផងនោះ ស្រាប់តែលេច មុខបុរសម្នាក់ មកកាង និងរារាំង មិនឱ្យសមត្ថកិច្ចបំពេញ ប្រតិបត្ដិការ របស់ខ្លួននោះឡើយ ។

ដោយមានហេតុការណ៍នេះ កើតឡើងទើបស្នងការ នគរបាល ខេត្ដកំពង់ចាម លោកឧត្ដមសេនីយ៍ បែន រត្ន័ ដោយមានការឯកភាពពី ព្រះរាជអាជ្ញា អមសាលាដំបូង ខេត្ដកំពង់ចាម លោក ជៀវ ចាន់ដារ៉ា បានបញ្ជាក់ឱ្យ នគរបាល ជំនាញ និង នគរបាលមូលដ្ឋាន ក្រុងកំពង់ចាម ចុះទៅចាប់ខ្លួនបុរសរូបនេះ នៅវេលា ម៉ោង៣និង៤០នាទី រសៀលថ្ងៃទី១៨ ខែមីនា ឆ្នាំ២០១៥ ។

តាមមន្ដ្រីនគរបាល ក្រុងកំពង់ចាម បញ្ជាក់ថា បុរសរូបនេះ ឈ្មោះ មិន រ៉េត អាយុ៥៥ឆ្នាំ មានមុខរបរ ជាអ្នកនេសាទ ហើយបច្ចុប្បន្ន ស្ថិតក្រោមការឃុំខ្លួន នៅស្នងការដ្ឋាន នគរបាលខេត្ដកំពង់ចាម ដើម្បីកសាងសំណុំរឿង បញ្ជូនទៅ កាន់ តុលាការចាត់ការតាមផ្លូវច្បាប់៕

ផ្តល់សិទ្ធដោយ ដើមអម្ពិល