រដ្ឋកាលីហ្វញ៉ា, សហរដ្ឋអាមេរិក៖ ក្មេងប្រុសឈាមត្រជាក់ វ័យ១៥ និង១៦ឆ្នាំ ២នាក់ ត្រូវជាប់គុក រយៈពេល ៣០ឆ្នាំ បន្ទាប់ពី ប្រព្រឹត្តិនូវទង្វើ ដ៏ព្រៃផ្សៃបំផុត ទៅលើយាយ ចំណាស់ ៨៧ឆ្នាំម្នាក់។

យោងតាមប្រភពព័ត៌មាន បានឲ្យដឹងថា ជនបង្ក ចំនួន២នាក់ មានឈ្មោះថា Raymond Miranda អាយុ១៥ឆ្នាំ និង Ruben Melanson អាយុ១៦ឆ្នាំ បានវាយទៅលើ លោកយាយ វ័យ៨៧ឆ្នាំម្នាក់ ហើយថែមទាំង ចាប់បញ្ច្រកថ្នាំ និងចាប់រំលោភ គាត់ទៀតផង។

ជនបង្កឈ្មោះ Raymond Miranda អាយុ១៥ឆ្នាំ

ប្រភពដដែល បានបន្តទៀតថា ចាប់តាំងពីពេល កើតហេតុនោះមក លោកយាយរងគ្រោះ ត្រូវអង្គុយ នៅលើ កៅអីរុញរហូត ហើយត្រូវ ប្រឈមមុខ នឹងជនបង្ក ដែលមានចិត្ត ឃោរឃៅរ និងព្រៃផ្សៃ ២នាក់នោះ នៅចំពោះមុខ តុលាការ ទៀតផង។

បើតាមសម្តី របស់លោកយាយ វ័យ៨៧ឆ្នាំរូបនោះ បាននិយាយថា “ខ្ញុំចង់ឲ្យពួកគេ មើលមកខ្ញុំ និងចងចាំខ្ញុំ។ ពួកគេបានធ្វើបាបខ្ញុំ រហូតធ្លាក់ខ្លួន បែបនេះ ប្រៀបដូចជា ពួកគេយក ឯករាជ្យភាព របស់ខ្ញុំ ទៅបាត់អីចឹង។”

បើតាមសម្តី របស់ប៉ូលីស បានឲ្យដឹងថា នៅមុនពេលកើតហេតុ ស្រ្តីរងគ្រោះ គឺកំពុងតែ ដេកលង់លក់ ខណៈក្មេងប្រុស ទាំង២នាក់នោះ បានលួចចូល ទៅក្នុងផ្ទះ របស់គាត់ នៅក្នុងទីក្រុង Hemet នៃរដ្ឋកាលីហ្វញ៉ា សហរដ្ឋអាមេរិក បន្ទាប់មក ក៏បានចាប់ផ្តើម វាយ បញ្ច្រកថ្នាំ និងចាប់រំលោភ ស្រ្តីរងគ្រោះ តែម្តង។ តាមរបាយការណ៏ បានបញ្ជាក់ទៀតថា ក្មេងប្រុស ទាំង២នាក់នោះ បានយកថ្នាំ ចំនួន២ដប ទៅចាក់លើផ្ទៃមុខ និងបញ្ច្រក ចូលមាត់ របស់ស្រ្តីរងគ្រោះ។

ក្រោយកើតហេតុ ជនបង្កឈ្មោះ Melanson ត្រូវបានប៉ូលីស ឃាត់ខ្លួន រីឯ ជនបង្កឈ្មោះ Miranda ក៏ត្រូវបានប៉ូលីស ឃាត់ខ្លួនផងដែរ បន្ទាប់ពីបាន បិទសេចក្តីប្រកាស តាមចាប់ខ្លួន។

យ៉ាងណាមិញ ជនបង្កទាំង ២នាក់នេះ ត្រូវបានចោទប្រកាន់ និងផ្តន្ទាទោស ពីបទ លបលួចចូលផ្ទះ, រំលោភបំពាន មនុស្សចាស់ (ធ្វើឲ្យមាន របួសស្នាមធ្ងន់ធ្ងរ នៅលើខ្លួនប្រាណ), ចាប់បង្ខំ និងចាប់រំលោភ ផ្លូវភេទ។

ជនបង្កឈ្មោះ Miranda អាយុ១៥ឆ្នាំ បានធ្វើការសុំទោស ស្រ្តីរងគ្រោះ នៅក្នុងតុលាការ ដោយបាន និយាយាថា “ខ្ញុំសុំទោស ដែលបាន លបចូល ក្នុងផ្ទះ របស់អ្នក។ ខ្ញុំមិនសង្ឃឹមថា អ្នកនឹងអភ័យទោស ឲ្យខ្ញុំឡើយ។” ជាមួយគ្នានេះដែរ ស្រ្តីរងគ្រោះ ក៏បានអរគុណ ចំពោះ Miranda ដែរ ហើយបាននិយាយាថា “នេះគឺជាអ្វី ដែលអ្នកត្រូវសង ចំពោះទង្វើ ដ៏អាក្រក់ និង ព្រៃផ្សៃបំផុត របស់អ្នក មកលើខ្ញុំ”៕

ប្រភព ៖ Asiantown

កែសម្រួលដោយ ៖ ប៊ី

ខ្មែរឡូត