កំពង់ចាម ៖ មេខ្យល់ពីរនាក់ ដែលនាំគ្នា រកស៊ីនាំស្ដ្រីក្រមុំ ទៅរៀបការនៅប្រទេសចិន ដោយ ខុសច្បាប់នោះ ត្រូវ បានកម្លាំង នគរបាល ស្រុកចំការលើ ខេត្ដកំពង់ចាមចាប់ ខ្លួន និង រំដោះស្ដ្រីរងគ្រោះ ត្រឡប់មកវិញកាល ពីវេលា ម៉ោង៧និង៣០នាទីព្រឹកថ្ងៃទី១២ ខែមីនា ឆ្នាំ២០១៥ ស្ថិតនៅឃុំស្វាយទាប ស្រុកចំការលើ ។

មន្ដ្រីនគរបាលព្រហ្មទណ្ឌ ស្រុកចំការលើ បានឱ្យដឹងថា ស្ដ្រីរងគ្រោះ ត្រូវបានជនសង្ស័យ ឱ្យលុយចំនួន ៥០០ដុល្លារ ជាថ្នូរការធ្វើ ដំណើរ ទៅរៀបការ នៅប្រទេសចិន ប៉ុន្ដែបើសិនជនរងគ្រោះក្រឡាស់សំដី មិនទៅវិញ ត្រូវសង លុយចំនួន៥០០០ដុល្លារ។

មន្ដ្រីនគរបាលរូបនេះ បានបញ្ជាក់ថា ជន សង្ស័យទី១ ឈ្មោះទិត ស្រីពៅ ភេទស្រី អាយុ៤២ឆ្នាំ រស់នៅភូមិថ្នល់បែក ខាងលិច ឃុំ ស្វាយ ទាប ស្រុកចំការលើ និងទី២ ឈ្មោះតឹង ឡុង ភេទប្រុស អាយុ៦៩ឆ្នាំ រស់នៅភូមិ៧៧ ឃុំស្វាយទាប ។

ដោយឡែក ស្ដ្រីរងគ្រោះ ឈ្មោះ ម ស ដ អាយុ៣០ឆ្នាំ។ តាមមន្ដ្រីនគរបាល ស្រុកចំការលើ បានបន្ដ ទៀតថា ជនសង្ស័យ ទាំងពីរនាក់ ដែលជាមេខ្យល់ បានទាក់ទងឈ្មួញនាំ ជួញដូរមនុស្ស ទៅរៀបការ ដោយខុសច្បាប់ នៅប្រទេសចិន ហើយពួកគេ ក៏បានលួងលោម ស្ដ្រីរងគ្រោះ ដោយ ផ្ដល់ថវិកា ៥០០ដុល្លារ ប៉ុន្ដែពួកគេ បានប្រាប់ទៅជនរងគ្រោះ សង៥០០០ដុល្លារ បើសិន ជាជនរងគ្រោះមិនព្រម ទៅវិញ ។

ដោយសារឮ ក្រុមមេខ្យល់និយាយយ៉ាងដូច្នេះ ធ្វើឱ្យ ជនរងគ្រោះដឹងខ្លួន ក៏មកប្ដឹងនគរបាល ឲ្យជួយអន្ដរាគមន៍ ។

មន្ដ្រីនគរបាល ស្រុកចំការលើ បានបន្ដ ទៀតថា ក្រោយពីជនរងគ្រោះប្ដឹងរួចមក ស្នងការនគរបាល ខេត្ដកំពង់ចាម លោកឧត្ដម សេនីយ៍ បែន រត្ន័ បានបញ្ជាឱ្យចុះស្រាវជ្រាវនិងចាប់ខ្លួនជន ល្មើសទាំងពីរនាក់ ហើយសង្គ្រោះស្ដ្រី រងគ្រោះត្រឡប់មកវិញ ។

បច្ចុប្បន្ន ជនសង្ស័យទាំងពីរនាក់ ត្រូវបានយកទៅឃុំខ្លួននៅស្នងការដ្ឋាននគរបាលខេត្ដ ដើម្បីកសាង សំណុំរឿង បញ្ជូនទៅកាន់ តុលាការ ផ្ដន្ទាទោសតាមច្បាប់៕

ផ្តល់សិទ្ធដោយ ដើមអម្ពិល