ក្រចេះ៖ រថយន្តសាំងយ៉ុង ដឹកឈើមួយគ្រឿង រត់គេចពីការ តាមប្រដេញ របស់សមត្ថកិច្ច នៅតាមដងផ្លូវជ្រុល ចង្កូតទៅបុកផ្ទះ ប្រជាពលរដ្ឋ បណ្តាលឱ្យខូចខាត ស្ទើតែទាំងស្រុង ស្ថិតនៅក្នុងភូមិ ព្រែកតាអាំ ឃុំបុស្សលាវ ស្រុកចិត្របុរី ខេត្តក្រចេះ កាលពីវេលាម៉ោង ៦និង១០នាទី ព្រឹកថ្ងៃទី១២ ខែមីនា ឆ្នាំ២០១៥។

ប្រភពព័ត៌មានពី ប្រជាពលរដ្ឋដែលបាន ឃើញហេតុការណ៍ឱ្យដឹងថា រថយន្តសាំងយ៉ុង មួយគ្រឿង បើកបោះពួយ យ៉ាងលឿន ដោយមានការតាម ប្រដេញពីសំណាក់ សមត្ថកិច្ច ដែលឈរជើង នៅតាមដងផ្លូវ លុះដល់ចំណុច ផ្លូវកោង រថយន្តសាំងយ៉ុង មួយនោះ បានបែកកង់ហើយ ក៏បានរេចង្កូត ទៅបុកផ្ទះស្ត្រី មេម៉ាយម្នាក់ឈ្មោះ ទឿ លេន អាយុ ៦២ ឆ្នាំ បណ្តាលឱ្យខ្ទេចផ្នែក ខាងក្រោយនៃផ្ទះបាយ តែមិនបង្កឱ្យ មានអ្នករងរបួស។

ប្រភពដដែលបានបន្តថា ក្រោយពីហេតុការណ៍ បានកើតឡើងម្ចាស់ រថយន្តសាំងយ៉ុង ខាងលើបាន រត់គេចខ្លួនបាត់ បន្សល់ទុកតែរថយន្ត និងឈើជា ច្រើនកំណាត់ នៅក្នុងផ្ទះរបស់ស្រ្តី ជនរងគ្រោះ ដើម្បីប្រគល់ជូន សមត្ថកិច្ចជំនាញ ធ្វើការវាស់វែង និងកសាងសំណុំរឿង។

យោងតាមប្រភពពី មន្ត្រីជំនាញរដ្ឋបាល ព្រៃឈើសង្កាត់ កន្ទួត បានឱ្យដឹងថា ក្រោយពីមាន សេចក្តីរាយការណ៍ ពួកគាត់ក៏បានចុះ ទៅធ្វើការវាស់វែង ឈើទាំងនោះមាន ចំនួន៣១កំណាត់ ស្មើរនឹង១ម៉ែត្រគូប ប្រាំមួយផ្លាន ហើយរថយន្ត និងឈើទាំងនោះ ត្រូវម្ចាស់ផ្ទះឱ្យរក្សា ទុកនៅកន្លែងកើតហេតុ ដើម្បីរង់ចាំម្ចាស់រថយន្ត ដោះស្រាយសងថ្លៃ ខូចខាតរួចទើប ប្រគល់ជូនរដ្ឋបាល ព្រៃឈើ ចាត់ការបន្តតាមច្បាប់៕

ផ្តល់សិទ្ធដោយ ដើមអម្ពិល