ភ្នំពេញ ៖ ក្រុមយុវជនពីរក្រុម មិនដឹងជាមានគំនុំ និងគ្នាតាំងពី ពេលណានោះទេ ស្រាប់តែគ្រាន់ បានឃើញមុខគ្នា ភ្លាមបាន ដេញវាយគ្នា បង្កឲ្យមានការ ភ្ញាក់ផ្អើល ដល់ប្រជាពលរដ្ឋ កំពុងតែឈរ មើលគេរាំធុង បាសកំសាន្តនោះ ប៉ុន្តែបន្ទាប់ពីឆាក ប្រយុទ្ធ ដ៏ក្តៅគគុក នេះចប់នោះ ស្រាប់តែគេឃើញ យុវជនដេកសន្លប់ ក្នុងថ្លុកឈាម ក្រោយពីបញ្ជូន ទៅមន្ទីរពេទ្យ បានពាក់កណ្តាល ផ្លូវក៏ត្រូវដាច់ខ្យល់ ស្លាប់តែម្តងទៅ ។

ហេតុការណ៍នេះ បានកើតឡើង កាលពីម៉ោង ប្រហែលជា ២៣និង៣០នាទី ថ្ងៃទី៩ ខែមីនា ឆ្នាំ២០១៥ នៅចំណុចខាង ក្រោយផ្សារ កាណាស៊ីធី ស្ថិតក្នុងភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។

ប្រជាពលរដ្ឋនៅ កន្លែងកើតហេតុ បានឲ្យដឹងថា ជនរងគ្រោះ ត្រូវបានគេស្គាល់ឈ្មោះ ជុំ ស៊ីថា ភេទភេទ ប្រុស អាយុ២៧ឆ្នាំ មុខរបរ កម្មកររោងចក្រ ស្នាក់នៅផ្ទះជួលក្នុងភូមិ សង្កាត់កើតហេតុ ខាងលើ មានស្រុកកំណើត នៅភូមិព្រែកខ្សាយខ ស្រុកពាមរោរ៍ ខេត្តព្រៃវែង ។ ចំណែកមិត្តភក្តិ របស់ជនរងគ្រោះ និងក្រុមម្ខាងទៀត ពុំត្រូវបានគេ ស្គាល់ឈ្មោះទេ។

ប្រភពព័ត៌មាន បានបន្តទៀតថា មុនពេលកើតហេតុ ជនរងគ្រោះ រួមនិងមិត្តភក្តិ ៤នាក់ទៀត បាននាំគ្នា ផឹកស៊ីមួយកន្លែង លុះស្រឹងស្រឿង បាននាំគ្នាដើរ មើលកម្មវិធីគេ រាំធុងបាសលេង លុះពេលទៅ ដល់ក៏បាន ជួបនិងស្ទាវមួយក្រុមទៀត ដែលមានគ្នា ប្រហែលជា៧នាក់ មិនដឹងជាមានគំនុំ និងគ្នាតាំងពីណានោះ គ្រាន់តែបានជួបមុខគ្នា ភ្លាមនោះស្រាប់ស្ទាវ ទាំងពីរក្រុមនេះ បានយកដុំថ្ម គប់គ្នាប្រាវ ហើយខណៈ កំពុងប្រយុទ្ធគ្នានោះ គេឃើញយុវជន ដែលស្លាប់នោះ បានសម្រុកវាយ គូបក្ខដិបក្ខ របស់គេដោយ មិនញញើតដៃ បន្តិចណាសោះ ចំណែកឯមិត្តភក្តិ របស់គេ៤នាក់ បានរត់បាត់អស់ នៅសល់តែជនរង គ្រោះម្នាក់ឯងធ្វើឲ្យ ក្រុមម្ខាងទៀត មានឱកាសវាយ សន្ធាប់ទៅលើ ជនរងគ្រោះ លុះពេលដែលមានសភាព ស្ងប់បន្តិនោះ ប្រជាពលរដ្ឋ បានចេញទៅមើលស្រាប់ តែឃើញជនរងគ្រោះដេក សន្លប់ក្នុងថ្លុកឈាម ក៏នាំគ្នាលើក ជនរងគ្រោះដាក់លើរួច ហើយបានទូរស័ព្ទ ហៅកាន់រថយន្ត ឯកជនដើម្បី ឲ្យមកដឹក ជនរងគ្រោះ យកទៅ ព្យាបាល ប៉ុន្តែរថយន្តគ្លីនិកឯកជន មិនឃើញចេញមក យកជនរងគ្រោះ ទំនងជាដឹងថា ជនរងគ្រោះ មានរបួសធ្ងន់ពេក ទើបរថយន្ត គ្លីនិកឯកជន មិនចេញមកយកបែបនេះ ក្រោយមកទើបហៅ រថយន្តពេទ្យរដ្ឋ មកដឹក លុះពេលបញ្ជូន ទៅដល់ពាក់ កណ្តាលផ្លូវ ជាអកុសលជនរងគ្រោះ ក៏បានដាច់ខ្យល់ ស្លាប់តែម្តងទៅ ។

បច្ចុប្បន្ននគរបាល កំពុងតែធ្វើការ ស្រាវជ្រាវរក មុខសញ្ញាជន ដៃដល់ដើម្បី ឃាត់យកមកផ្តន្ទាទោស ទៅតាមផ្លូវច្បាប់៕

ផ្តល់សិទ្ធដោយ ដើមអម្ពិល