ស្ទឹងត្រែង៖ ករណីប្តីបាញ់សម្លាប់ប្រពន្ធ ដ៏សាហាវមួយ បានផ្ទុះឡើងនៅក្នុងទឹកដី ខេត្តស្ទឹងត្រែង កាលពីថ្ងៃទី៧ ខែមិនា កន្លងទៅ បានឈានទៅដល់ការ ចាប់ខ្លួន បុរសជាប្តីបានសំរេច កាលពីថ្ងៃទី៨ ខែមិនា ឆ្នាំ២០១៥ ដែលជននេះ បានរត់គេចខ្លួនទៅដល់ខេត្តរតនគីរី។ តែយ៉ាងណាមិញ មិនទាន់មានព័ត៌មានលម្អិតណាមួយ បញ្ជាក់ឲ្យដឹងពីមូលហេតុ ពិតប្រាកដ ដែលបង្កឲ្យជននេះ សំរេចចិត្តបាញ់ប្រហារ ឆក់យកជីវិតប្រពន្ធខ្លួននៅឡើយ។

ទើបតែមកទល់ថ្ងៃទី ១០ ខែមិនា ឆ្នាំ២០១៥នេះ ខ្មែរឡូត បានប្រទះឃើញ ការបង្ហោះនូវវីដេអូឃ្លីប ជាសាធារណ:មួយ ពីសំណាក់គណនីអ្នកលេងហ្វេសប៊ុកម្នាក់ បង្ហាញពីការស្រាយបំភ្លឺត្រួសៗ អាចឲ្យយើងដឹងបានខ្លះ អំពីមូលហេតុ ដែលនាំឲ្យកើតមាន អំពើបាញ់សម្លាប់ប្រពន្ធខ្លួនឯងយ៉ាងសាហាវបែបនេះ។

បើតាមប្រភពព័ត៌មាន ក្នុងស្រុក ចុះផ្សាយកន្លងទៅ បានឲ្យដឹងថា ស្ត្រីជាភរិយាបានបដិសេធ និងមិនចង់រស់នៅជាមួយ ទើបធ្វើឲ្យជនសង្ស័យ ជាប្តីបាញ់សម្លាប់យ៉ាងដូច្នេះ ខណ:ដែលសមត្ថកិច្ច បានបញ្ជាក់ដែរថា ក្រោយពីបែកគ្នាអស់រយ:ពេល ១ឆ្នាំមកនោះ បុរសជាប្តីបានមករកប្រពន្ធវិញ ដោយចង់រួមរស់នៅជាមួយគ្នាវិញ។

គួរបញ្ជាក់ដែរថា ជនរងគ្រោះ ជាប្រពន្ធ មានឈ្មោះ រស្មី ស្រីខួច អាយុ ២២ឆ្នាំ ត្រូវបានជនសង្ស័យ បាញ់ប្រហារ ដោយអាវុធខ្លី ចំនួន ៣គ្រាប់។ រីឯ ប្តី មិនទាន់ ត្រូវបានបញ្ជាក់ពីអត្តសញ្ញាណនៅឡើយ។

ចំពោះវីដេអូខាងក្រោម អាចជាការស្រាយចម្ងល់ បានមួយចំនួន ហើយព័ត៌មានលម្អិតបន្ថែម យ៉ាងណានោះ ខ្មែរឡូត នឹងចុះផ្សាយជាបន្តបន្ទាប់ នៅពេលក្រោយ៕

ជនសង្ស័យជាប្តីត្រូវបានចាប់ខ្លួន

ទស្សនាវីដេអូខាងក្រោម៖

ប្រភព៖ Facebook

ដោយ សី