រាជធានីភ្នំពេញ ៖ និស្សិតនារីជនជាតិខ្មែរអ៊ិស្លាមម្នាក់បានអះអាងថា ដោយសារតូចចិត្តខ្លួនឯងដែល  វិទ្យាស្ថានប៊ែធី អន្តរជាតិផ្តាច់ អាហារូបករណ៍ និងអត់ទីជម្រក ក៏បានជិះម៉ូតូទៅ លោតទឹកសម្លាប់ខ្លួន ពីលើស្ពាន ជ្រោយចង្វារ តែត្រូវបានកម្លាំង នគរបាលឃាត់ទាន់ ។

ការប៉ុនប៉ុងសម្លាប់ខ្លួននេះបានធ្វើឱ្យមានការភ្ញាក់ផ្អើល កាលពីវេលាម៉ោង១ និង៤០នាទីរសៀល ថ្ងៃទី៧ ខែមីនា ឆ្នាំ២០១៥ នៅលើស្ពាន ជ្រោយចង្វារចាស់ ផ្នែកខាងលិច ក្នុងសង្កាត់ស្រះចក ខណ្ឌដូនពេញ ។

និស្សិតដែលគិតខ្លីប៉ងលោតទឹកសម្លាប់ខ្លួននោះមានឈ្មោះយ៉ា រ៉ស់ ភេទស្រី អាយុ២០ឆ្នាំ ជានិស្សិត  វិទ្យាស្ថានប៊ែរធីអន្តរជាតិ ស្នាក់នៅ ផ្ទះជួលផ្លូវលេខ៣៦០ សង្កាត់បឹងកេងកងទី២ ខណ្ឌចំការមន និងមានស្រុកកំណើត នៅក្រុងព្រះសីហនុ ខេត្តព្រះសីហនុ ។

តាមនគរបាលការពារស្ពានជ្រោយចង្វារបានឱ្យដឹងថា នៅមុនពេលកើតហេតុនិស្សិតរូបនោះបានជិះម៉ូតូ ម៉ាកឆាលីមួយគ្រឿង ធ្វើដំណើរ ឡើង ស្ពានជ្រោយចង្វារ ក្នុងទិសដៅពីលិចទៅកើត ។ នៅពេលជិតដល់ កណ្តាលស្ពានក៏បានឈប់ ហើយតោងបង្កាន់ ដៃស្ពានប្រុង លោត ទឹកសម្លាប់ខ្លួន ។ ដោយឃើញដូច្នេះ កម្លាំងនគរបាលដែល ប្រចាំការនៅស្ពានបានស្ទុះ ទៅចាប់ឃាត់ខ្លួន បញ្ជូន មកសាកសួរ ។

នៅចំពោះមុខសមត្ថកិច្ច និស្សិតអ៊ិស្លាមរូបនោះបានឱ្យដឹងថា មូលហេតុដែលនាងពុំចង់រស់ដោយសារ តែពិបាកចិត្ត ដែលសាលា ផ្តាច់ អាហាររូបករណ៍ ហើយអ្នកដែល ឱ្យប្រាក់ជួលស្នាក់ នៅរៀនសូត្រក៏ បានផ្តាច់លែងឱ្យទៀត ។

និស្សិតរូបនោះបានឱ្យដឹងទៀតថា នាងមានគ្រួសារមានជីវភាពក្រីក្រ ប្រមាណជាង៣ឆ្នាំមកហើយត្រូវ បានបុរសម្នាក់ដែល ជាអ្នកមាន មុខមាត់ នៅក្នុងសង្គមបាន យកនាងមកភ្នំពេញ រៀននៅវិទ្យាស្ថាន ប៊ែធីអន្តរជាតិ នៅម្តុំមេភ្លើង ដោយទទួល បានអាហាររូបករណ៍ ។ ក្រៅពីនោះក៏មាន ឪពុកមាម្នាក់នៅ ប្រទេសកូរ៉េក៏បាន ជួលផ្ទះឱ្យ ស្នាក់នៅក្នុង១ខែ ៨៥ដុល្លារ ព្រមទាំងប្រាក់ មួយចំនួន ទៀតរៀនសូត្រ ។

នៅពេលថ្មីៗនេះឪពុកមាលែងផ្តល់ប្រាក់ឱ្យធ្វើឱ្យនាងមានការ ពិបាកក្នុងជីវភាព និងអត់ទីជំរក ដោយ សារពិបាកចិត្តពេក ក៏បានឈប់ សម្រាកប្រមាណ ១សប្តាហ៍ដោយពុំបាន សុំច្បាប់ ។ និស្សិតរូបនោះបានបន្តទៀតថា នៅពេលថ្មីៗនេះសាលា ក៏បានផ្តាច់អាហារូបករណ៍ ធ្វើឱ្យនាងពិបាក ចិត្តកាន់តែខ្លាំង ក៏គិតខ្លីជិះម៉ូតូ ទៅលោតទឹកសម្លាប់ខ្លួន តែត្រូវបាននគបាល ចាប់ឃាត់ទាន់ ។

បន្ទាប់ពីសាកសួរ និងធ្វើការអប់រំរួច នគរបាលក៏បានឱ្យនិស្សិតរូបនោះត្រឡប់ទៅវិញ ៕

ផ្តល់សិទ្ធដោយ កោះសន្តិភាព