ម៉ាឡេស៊ី៖ រដ្ឋមន្រ្តីក្រសួងដឹកជញ្ជូន របស់ប្រទេស ម៉ាឡេស៊ី បាននិយាយថា គាត់មានទំនុកចិត្ត និងជឿជាក់ថា យន្តហោះ MH370 ដែលបានបាត់ខ្លួន អស់រយៈពេល ជាយូរ មកហើយនោះ នឹងត្រូវរកឃើញវិញ នៅក្នុងមហាសមុទ្រឥណ្ឌា។

លោក Liow Tiong Lai ដែលជា អ្នកនយោបាយ និងជារដ្ឋមន្រ្តី ក្រសួងដឹកជញ្ជូន របស់ប្រទេស ម៉ាឡេស៊ី បាននិយាយថា អាជ្ញាធរ ម៉ាឡេស៊ី មិនបាន លាក់បាំងព័ត៌មាន ណាមួយ អំពីយន្តហោះ MH370 ឡើយ។ ពួកគេបាន និងកំពុងតែ ស្វែងរក យន្តហោះ MH370 ដែលបានបាត់ខ្លួន ជាមួយនឹង មនុស្ស ចំនួន ២៣៩នាក់។

យន្តហោះ MH370 ដែលបានបាត់ខ្លួន

ជាមួយគ្នានេះដែរ នាយកដ្ឋាន អាកាសចរស៊ីវិល របស់ប្រទេសម៉ាឡេស៊ី ក៏បានចេញផ្សាយ នូវរបាយការណ៍ បណ្តោះអាសន្ន នៅថ្ងៃសៅរ៏ នេះផងដែរ ពីការរុករក យន្តហោះ MH370 ដែលបានបាត់ខ្លួន នោះ។

គួរបញ្ជាក់ផងដែរថា យន្តហោះម៉ាឡេស៊ី MH370 បានបាត់ខ្លួន កាលពីថ្ងៃទី៨ ខែមិនា ឆ្នាំ២០១៤ ខណៈពេលដែល ធ្វើដំណើរពី ទីក្រុង កូឡាឡាំពួរ ទៅកាន់ទីក្រុង ប៉េកាំង ដែលមានមនុស្ស ២៣៩នាក់ នៅលើនោះ។

យ៉ាងណាមិញ ប្រទេសអូស្រ្តាលី ក៏កំពុងដឹកនាំ ក្រុមការងារស្វែងរក នៅឯភាគខាងត្បូង មហាសមុទ្រឥណ្ឌា ដែលមានចំងាយប្រមាណ ១,៦០០គីឡូម៉ែត្រ ពីឆ្នេររបស់វា ខណៈនាវា ដែលរុករក យន្តហោះនោះ បានផ្តោតទៅលើ តំបន់ដែលស្ថិតក្បែរ តំបន់យន្តហោះធ្លាក់ ដែលមានផ្ទៃដី ៦០,០០០គីឡូម៉ែត្រការ៉េ។

នៅក្នុងការរុករកនេះ ប្រទេសអូស្ត្រាលី និងម៉ាឡេស៊ី បានចំណាយថវិកា រួមគ្នាសរុប ជាង ៩៣លានដុល្លារ ឯណោះ៕

ប្រភព ៖ BBC

កែសម្រួលដោយ ៖ ប៊ី

ខ្មែរឡូត