តារាល្បីៗសម្ដែងការសោកស្ដាយចំពោះមរណភាព លោក យាយ ខ្លី

តារាល្បីៗសម្ដែងការសោកស្ដាយចំពោះមរណភាព លោក យាយ ខ្លី

អ្នកស្រី នេត ផល្លី ហៅ លោកយាយ ខ្លី បានទទួលអនិច្ចកម្ម កាលពីរំលងអាធ្រាត្រយប់មិញនេះ ដោយរោគាពាធ បើទោះបីជាមានកិច្ចខិតខំប្រឹងប្រែងព្យាបាល ពីខាងមន្ទីរពេទ្យយ៉ាងណាក្ដី។ បន្ទាប់ពីទទួលបានព័ត៌មាននេះ អ្នកសិល្បៈជាច្រើនបានសម្ដែងការសោកស្ដាយចំពោះការបាត់បង់ធនធានសិល្បៈរូបនេះ។

“គួរឲ្យសោកស្ដាយគាត់ ព្រោះតែងផ្ដល់ដំបូន្មាន និង គំរូល្អដល់ក្មួយៗអ្នកសិល្បៈជំនាន់ក្រោយច្រើនណាស់”។ នេះជាលើកឡើងរបស់ លោក ខេមរៈ សិរីមន្ត ខណៈបានរួមសម្ដែងជាមួយគ្នាកន្លងមក។

ដោយចិត្តអាណិតអាសូរ រូបគេបានផ្ដល់ជំនួយដល់យាយជាហូរហែទាំងសម្ភារៈ និង ថវិកាមិនដែលខានឡើយបន្ទាប់ពីធ្លាក់ លោកយាយខ្លី ធ្លាក់ខ្លួនឈឺ។ ” ប្រសិនបើខ្វះខាតលុយកាក់ពេលណានោះ ខ្ញុំឲ្យគាត់ប្រាប់ភ្លាម ជួយបានតិចច្រើនតាមលទ្ធភាព”។ សិរីមន្ដ ក៏បានថ្លែងអំណរគុណដល់សិល្បករទាំងអស់ ដែលបានចូលរួមឧបត្ថម្ភដល់លោកយាយកន្លងមក។

លោកយាយ ខ្លី ជាអតីតគ្រូបង្ហាត់អាយ៉ៃនៅសាកលវិទ្យាល័យខេមរភូមិន្ទវិចិត្រសិល្បៈ ដែលបានចែករំលែកចំណេះដឹងលើជំនាញនេះ ដល់សិស្សជាច្រើននាក់ផងដែរ មុនពេលចូលរួមសម្ដែងកំប្លែង។ ជីវភាពរបស់យាយចាប់ផ្ដើមដុនដាបបណ្ដើរៗ ក្រោយពីការធ្លាក់ខ្លួនឈឺអំឡុង ៣ ឆ្នាំមុន តែយាយមិនដែលបោះបង់អាជីពកំប្លែងចោលនោះទេ ព្រោះជាប្រភពចំណូលតែមួយគត់។

លោក ជូង ជី ហៅ នាយ កុយ ដែលកំពុងស្ថិតនៅក្នុងវត្តញាណរង្សី ជាទីតម្កល់សពនៅឡើយឲ្យដឹងថា ធម្មតាគ្រួសារមួយរមែងចង់ឲ្យមានអ្នកចូល មិនចង់ឲ្យមានអ្នកចេញទៅនោះទេ។ ជាក់ស្ដែងក្រុមកំប្លែងរបស់លោកជាដើម ពិតជាមានការសោកស្ដាយណាស់ចំពោះការបាត់បង់លោកយាយ ដែលធ្លាប់បានរួមសម្ដែងជាមួយគ្នាយូរមកហើយ។

“គ្មានអ្វីក្រៅពីសុំឲ្យវិញ្ញាណក្ខន្ធ លោក យាយ ខ្លី បានទៅកាន់សេចក្ដីសុខ និងតែជានិមិត្តរូបសម្រាប់អ្នកសិល្បៈជំនាន់ក្រោយ”។

yeay-khley

យាយខ្លីពេលសម្រាកព្យាបាយនៅមន្ទីពេទ្យកាល់ម៉ែត្រ រូបថត៖ Facebook Sun Visa

ដោយឡែក នាយ ពែកមី បានឲ្យដឹងដែរថា នាយក៏ធ្លាប់លួចរៀនសូត្រពីលោកយាយ ខ្លី ដូចគ្នាដែរ ក្នុងនាមជាតារាកំប្លែងជំនាន់ក្រោយម្នាក់។ “សមាជិកស្រីៗក្នុងក្រុមរបស់ខ្ញុំ ក៏តែងរៀនសូត្រតាមគាត់ដែរ ក្នុងនាមគាត់ជារៀមច្បងសិល្បករម្នាក់ ដែលមានចំណេះដឹងសិល្បៈច្រើន”។ ជាពិសេសទឹកដមសំឡេងផ្នែកចម្រៀងអាយ៉ៃរបស់លោកយាយ។

ដោយសារតែបេសកកម្មសម្ដែងនៅតាមខេត្តនាយបានឲ្យភរិយារបស់ខ្លួន ទៅចូលរួមក្នុងពិធីបុណ្យសពលោកយាយ ខ្លី ជំនួសនាយ និង ស្នើឲ្យអ្នកសិល្បៈទាំងអស់ទៅចូលរួម។

សប្បុរសជន និង អ្នករួមអាជីពសិល្បៈដែលមានបំណងទៅចូលរួមពិធីបុណ្យសពរបស់ លោកយាយ នេត ផល្លី ហៅយាយ ខ្លី សូមអញ្ជើញទៅកាន់វត្តញាណរង្សីច្រកចូលក្បែរអង់តែនទួលគោក ជាទីតម្កល់សពដើម្បីធ្វើបុណ្យឧទ្ទិសកុសលជួនលោកយាយ និង ក្បែរបន្ទប់ជួលរបស់កូនចៅផង៕

ប្រភព Sabay

មុន បន្ទាប់

មតិយោបល់