ជប៉ុន៖ លោកយាយ ដែលបានបំបែក កំណត់ត្រាពិភពលោក (Guinness World Records) មានអាយុចាស់ជាងគេ ក្នុងពិភពលោក មានឈ្មោះថា Misao Okawa ជាជនជាតិជប៉ុន កើតនៅថ្ងៃទី៥ ខែមិនា ឆ្នាំ១៨៩៨ ជាកូនស្រី របស់អ្នកផលិត សំលៀកបំពាក់ ប្រពៃណីគីម៉ូណូ នៅប្រទេសជប៉ុន បច្ចុប្បន្ននេះ មានអាយុ១១៧ឆ្នាំ ហើយ។

រូបថតលោកយាយ Okawa ក្នុងពិធីអបអរសាទរអាយុ ១១៧ឆ្នាំ

នៅថ្ងៃពុធ កន្លងទៅ ក្នុងការប្រារព្ធពិធី មួយថ្ងៃមុនពេលខួបកំណើត ទី១១៧ គាត់បានពាក់អាវ គីម៉ូណូពណ៌ផ្កាឈូក លម្អដោយរូបផ្កាឈឺរី យ៉ាងស្រស់ស្អាត និងថ្លៃថ្នូរ។ "ពេលវេលា វាហាក់ដូចជាខ្លី ខ្លាំងណាស់ ហើយខ្ញុំសប្បាយចិត្ត ដែលមានអាយុ វែងដូចនេះ" លោកយាយ បានឆ្លើយដូចនេះ បន្ទាប់ពីលោក Takehiro Ogura មន្ត្រីរដ្ឋាភិបាល ទីក្រុងអូសាកា បានជូនគាត់នូវ កម្រងផ្កាមួយកន្ត្រកធំ ហើយលោកបានសួរថា តើលោកយាយ មានអារម្មណ៍យ៉ាងណា អំពីការរស់នៅសម្រាប់រយៈពេល ១១៧ ឆ្នាំមកនេះ។ លោកយាយ បានឆ្លើយយ៉ាងខ្លីថា គាត់ក៏មិនដឹងដូចគ្នា ថាហេតុអ្វី បានជាគាត់រស់នៅបាន យូរយ៉ាងនេះ។

រូបថតលោកយាយ Okawa និងវិញ្ញាបនបត្រ ឯក្កតកម្មពិភពលោក

រយៈពេលប៉ុន្មានខែមកនេះ សកម្មភាពលោកយាយ Okawa មានភាពយឺតជាងមុន និងពិបាកក្នុងការស្តាប់ ប៉ុន្តែលោកយាយ ទទួលទានបានច្រើន និងមានសុខភាពល្អ បើយោងតាមគិលានុបដ្ឋាយិកា ផ្ទាល់ខ្លួនរបស់គាត់ បានប្រាប់។

រូបថតលោកយាយ Okawa និងរូបថតពេលនៅកុមារភាព

លោកយាយ Okawa បានរៀបការ ជាមួយប្តីរបស់គាត់ លោក Yukio ក្នុងឆ្នាំ ១៩១៩ ហើយពួកគាត់ មានកូនបីនាក់ ស្រីពីរនាក់ និងប្រុសម្នាក់។ ឥឡូវគាត់ មានចៅបួននាក់ និងចៅទួតប្រាំមួយនាក់ទៀត ហើយចំពោះប្តីលោកយាយវិញ បានស្លាប់តាំងពីឆ្នាំ ១៩៣១ មកម្ល៉េះ។

គួរបញ្ជាក់ផងដែរថា ប្រទេសជប៉ុន ជាប្រទេសដែល មានប្រជាជនអាយុ ១០០ឆ្នាំ ច្រើនបំផុត នៅលើពិភពលោក ចំនួនប្រមាណជាង ៥៨ ០០០នាក់នេះបើយោង តួលេខប្រកាសដោយរដ្ឋាភិបាល និងមាន ៨៧ភាគរយ នៃពួកគេទាំងនោះ គឺជាស្ត្រី៕

ប្រភព yahoo

ដោយ Luhan