កម្ពុជា៖ លោកស្រី Michelle Obama នឹងនាំកូនស្រីទាំងពីរនាក់ ឈ្មោះ Malia និង Sasha មកកាន់ ប្រទេសជប៉ុន និងកម្ពុជានៅពាក់កណ្តាល ខែមិនានេះ សំរាប់ដំណើរកំសាន្ត វិស្សមកាលនិទាឃរដូវ (Spring Break trip)។

លោកស្រី Michelle Obama និងកូនស្រីទាំងពីរ 

លោកស្រី Obama នឹងទៅកំសាន្តនៅ ទីក្រុង Tokyo និង Kyoto ចាប់ពីថ្ងៃទី ១៨ ដល់ថ្ងៃទី ២០ ខែ មិនា ហើយនឹងបញ្ចប់ដំណើរ កំសាន្តរបស់លោកស្រី នៅថ្ងៃទី ២១ ដល់ថ្ងៃទី ២២ ខែមិនា ក្នុងទឹកដី ខេត្តសៀមរាប ប្រទេសកម្ពុជា នេះបើតាមប្រភពព័ត៌មានពី សេតវិមាន បានឲ្យដឹងកាលពីថ្ងៃអង្គារ ម្សិលមិញ។ យ៉ាងណាមិញ សេតវិមាន មិនបានបញ្ជាក់ពីវត្តមានកូនស្រីទាំងពីររបស់លោកស្រី Obama ក្នុងទស្សនកិច្ចនេះទេ ប៉ុន្តែសារព័ត៌មានជប៉ុនឈ្មោះ The Asahi Shimbun បានស្រង់សំដីរបស់ប្រភពព័ត៌មានផ្លូវការ របស់ជប៉ុនកាលពីខែមុន ដែលបានផ្សាយថា កូនៗទាំងពីរ ក៏នឹងចូលរួមក្នុងដំណើរកំសាន្តនេះដែរ ប៉ុន្តែមិនមានវត្តមាន របស់លោកប្រធានាធិបតី អាមេរិកនោះទេ។

កាលពីខែមិនាឆ្នាំមុន លោកស្រី Obama និងកូនៗ បានទៅកំសាន្តនៅប្រទេសចិន ហើយកាលពីពេលថ្មីៗនេះលោកស្រី និងកូនៗក៏ទើបនឹងត្រលប់មកពី ប្រទេស អៀឡង់ និងអាល្លឺម៉ង់ផងដែរ។ Malia និង Sasha ដែលរៀននៅសាលា Sidwell Friends ស្ថិតនៅរដ្ឋវ៉ាស៊ីនតោន នឹងចាប់ផ្តើមសំរាក វិស្សមកាលនៅថ្ងៃ ទី២០ ខែមិនានេះ។ ទោះជាយ៉ាងណាក៏ដោយ មិនមានប្រភពព័ត៌មានណាមួយ បញ្ជាក់ពី ការចំនាយរបស់លោកស្រី Obama ក្នុងដំណើរកំសាន្ត នៅប្រទេសទាំង២ នេះទេ ប៉ុន្តែ បើយោងតាមប្រភពព័ត៌មានពី Washington Examiner បានឲ្យដឹងថា កាលពីដំណើរកំសាន្តនៅចិន ក្នុងឆ្នាំ ២០១៤ លោកស្រី បានចំនាយអស់ជាង ២២២,០០០ ដុល្លារអាមេរិក សំរាប់ការស្នាក់នៅ ចំនួន ២ថ្ងៃនៅសណ្ឋាគារ។

លោកស្រី Obama ចង់ចំនាយពេល បង្រៀនកូន ក្នុងដំណើរកំសាន្ត មកកាន់ប្រទេសជប៉ុន និងកម្ពុជា ជាពិសេស ប្រទេសកម្ពុជាគឺជាជំរើសគួរឲ្យ ចាប់អារម្មណ៍បំផុតសំរាប់គាត់។ គួរបញ្ជាក់ផងដែរថា លោកប្រធានាធិបតី Obama បានក្លាយជាប្រធានាធិបតី ក្នុងតំណែងរបស់អាមេរិក ដំបូងគេ ដែលមក កាន់ប្រទេសកម្ពុជា កាលពីចុងឆ្នាំ ២០១២ បន្ទាប់ពីគាត់បាន ជាប់ឆ្នោតជាប្រធានាធិបតីអាមេរិក ជាលើកទី២។ លោកប្រធានាធិបតី និងភរិយា ដែលកូនស្រីចំនួនពីរនាក់ បានផ្តល់អនុសាសន៍ថា ភាពជោគជ័យរបស់ពួកគាត់ទាំងពីរ គឺបានមកពីការអប់រំ ហើយគ្រប់ពេលដែលពួកគាត់ធ្វើដំណើរ ទៅកាន់ គ្រប់ទីកន្លែង ពួកគាត់តែងតែលើកទឹកចិត្ត យុវជនរៀនឲ្យបានចប់ចុងចប់ដើម៕

លោក Obama និងសម្តេចតេជោ ហ៊ុន សែនក្នុងកិច្ចប្រជុំកំពូលអាស៊ាន កាលពីចុងឆ្នាំ ២០១២


ខេត្តសៀមរាប ដែលលោកស្រី Michelle Obama ចាប់អារម្មណ៍បំផុត


លោកស្រី Michelle Obama និងកូនៗក្នុងដំណើរកំសាន្តទៅចិនកាលពីឆ្នាំ២០១៤

រូបភាពបន្ថែម នៃសេចក្តីជូនព័ត៌មាន

ខាងក្រោមជាវីដេអូ កាលពីលោកស្រី  Michelle Obama ទៅកំសាន្តនៅប្រទេសចិន៖

ប្រភព៖ បរទេស

ដោយ៖ Roth

ខ្មែរឡូត