ជាអ្នកគាំទ្រ តើអ្នកដឹងអ្វីខ្លះពីកុងត្រារបស់លោក ព្រាប សុវត្ថិ នៅហង្សមាស?

ជាអ្នកគាំទ្រ តើអ្នកដឹងអ្វីខ្លះពីកុងត្រារបស់លោក ព្រាប សុវត្ថិ នៅហង្សមាស?

រាប់ទាំងការងារក្រុមហ៊ុនឯកជន ឬអង្គការមួយចំនួនផង រមែងមានកិច្ចសន្យាការងារ ឬហៅថា “កុងត្រា” ។តារាចម្រៀងតាមផលិតកម្មនានា ក៏ដូចគ្នា គឺពួកគេមានកុងត្រាជាមួយផលិតកម្មដែលពួកគេច្រៀង។ ដូច្នេះ តើអ្នកដឹងអ្វីខ្លះពាក់ព័ន្ធកិច្ចសន្យាការងារ ឬកុងត្រារបស់លោក ព្រាប សុវត្ថិ នៅហង្សមាស ខណៈមួយរយៈចុងក្រោយនេះ ទើបមានព័ត៌មានលេចមកថា ចង់ចេញពីផលិតកម្មមួយនេះផងនោះ?

ព្រាប សុវត្តិ

បញ្ហានេះ ដោយឆ្លងឆ្លើយជាមួយ Sabay សាមីខ្លួនលោក ព្រាប សុវត្ថិ ឲ្យដឹងថា អ្វីដែលលោក បាន និងកំពុងមានជាមួយហង្សមាស អាចនឹងមិនដូចគ្នានឹងតារាចម្រៀងផ្សេងៗទៀតទេ។ លោក លើកឡើងថា ដំណើរជីវិតសិល្បៈជិត២ទសវត្សរ៍កន្លងមកនេះរបស់លោកជាមួយហង្សមាស គឺលោកមិនមានចំណងផ្លូវការងារជាមួយហង្សមាសឡើយ។

“ខ្ញុំអត់ដែលមានកុងត្រាអីទេ តាំងពីដើមមក គឺខ្ញុំដែលចុះកុងត្រាអីផង សំខាន់គឺយើងធ្វើការយល់ចិត្តគ្នាប៉ុណ្ណោះ!”។ លោក ព្រាប សុវត្ថិ បញ្ជាក់។ ការមិនជាប់ចំណងការងារ(កុងត្រា) មានន័យថា បុគ្គលម្នាក់ អាចចាកចេញពីស្ថាប័នណាមួយ ឬក៏ថា តារាចម្រៀងម្នាក់អាចដើរចេញពីផលិតកម្មមួយ នៅពេលណាក៏បាន ដោយមិនគួរត្រូវបានរារាំងដោយអំណាចអ្វីមួយឡើយ។

ព្រាប សុវត្ថិ

ងាកមកលោក ព្រាប សុវត្ថិ តារាចម្រៀងខ្មែរម្នាក់គត់ ដែលទើបជាប់ឈ្មោះក្នុងកម្មវិធីប្រកួតប្រជែង “World Music Awards 2014 ” នោះក៏ដូចគ្នា ខណៈថ្មីៗនេះ លេចធ្លាយព័ត៌មានចង់ចេញពីហង្សមាស ទៅចូលរួមផលិតកម្មថោន។ យ៉ាងណាក៏ដោយពាក់ព័ន្ធចំណុចរសើបនេះ លោក ព្រាប សុវត្ថិ សុំមិនធ្វើអត្ថាធិប្បាយស៊ីជម្រៅឡើយ។

លោកលើកឡើងថា “ខ្ញុំអត់ទាន់អាចនិយាយបាន អនាគតនៅវែងឆ្ងាយ…ពេលខ្លះការនិយាយវាអត់ដូចអារម្មណ៍ ហើយពេលខ្លះទៀត អារម្មណ៍គិត ក៏អត់ដូចមាត់និយាយ!(សើច)”។ លោក ព្រាប សុវត្ថិ សង្កត់ធ្ងន់ថា ពេលនេះ លោកនៅតែជាគ្រួសារហង្សមាស ហើយរវាងលោក និងផលិតកម្មមិនមានអ្វីល្អក់កករនឹងគ្នាទេ។

ពាក់ព័ន្ធបញ្ហាខាងលើនេះ លោក អ៊ឹង សុងលាភ អ្នកគ្រប់គ្រងផលិតកម្មរស្មីហង្សមាស បានចាត់ទុកថា ព័ត៌មានកន្លងមកនោះ គ្រាន់តែជាពាក្យចចាមអារ៉ាមតែប៉ុណ្ណោះ៕

ប្រភព Sabay

មុន បន្ទាប់

មតិយោបល់