ចិន៖ ថ្មីៗនេះលោក Jaycee Chan ដែលជាកូនប្រុស បង្កើតរបស់លោកឈិន ឡុង បានបង្ហោះ រូបថតមួយសន្លឹកនៅលើ បណ្តាញ សង្គម Weibo បង្ហាញពី សកម្មភាពរបស់កំពូលតារាសម្តែង ឈិន ឡុង ដែលជាឪពុក កំពុងកាត់សក់ឲ្យ ក្រោយពេលរូបគេទើបតែ ចេញពីពន្ធនាគារ។

កំពូលតារាសម្តែងឈិន ឡុង កំពុងកាត់សក់ឲ្យកូនប្រុស

ក្នុងរូបភាពគេឃើញ លោក ឈិនឡុង ក្នុងទឹកមុខញញឹម កំពុងកាត់សក់ ឲ្យកូនប្រុសដែល មានសក់មិនសមរម្យ បន្ទាប់ពីចំនាយពេល ជាច្រើនខែនៅក្នុងពន្ធនាគារ។ ចំនែក នៅក្នុងរូបភាពដែលបង្ហោះ មួយសន្លឹកផ្សេងទៀតគេ ឃើញរូប Jaycee បង្ហាញពីម៉ូដសក់ថ្មីរបស់គេ ដែលមានអ្នកគាំទ្រ ជាច្រើនពាន់នាក់ចុច Upvote (គាំទ្រ)។

គួរបញ្ជាក់ផងដែរថា Jaycee Chan វ័យ៣២ ឆ្នាំបានចាប់ខ្លួនកាលពីខែសីហាឆ្នាំមុន នៅពេលដែល រូបគេ និងមិត្តភក្តិម្នាក់ឈ្មោះ Kai Ko ត្រូវប៉ូលិសរកឃើញមាន ទុកថ្នាំញៀនប្រភេទ កញ្ឆា ចំនួន ១០០ ក្រាម ក្នុងផ្ទះនៅទីក្រុងប៉េកាំង។ Jaycee ត្រូវបានកាត់ទោស ឲ្យជាប់ពន្ធនាគារ ចំនួន ៦ខែ ពីបទផ្តល់ទីតាំង សំរាប់ជក់កញ្ឆា។

បើយោងតាមប្រភព ព័ត៌មានមួយបានឲ្យដឹងថា នេះគឺជាលើកដំបូងហើយ ដែល Jaycee និងឈិន ឡុង ជួបគ្នាតាំងពីពេលដែល Jaycee ត្រូវដោះលែងពីពន្ធនាគារមក ដោយសារតែលោក ឈិន ឡុង ជាប់រវល់ ក្នុងការផ្សព្វផ្សាយរឿងថ្មី ដែលមានចំណងជើងថា Dragon Blade។ “ខ្ញុំខានជួបមុខកូនជាយូរមកហើយ ខ្ញុំមានអារម្មណ៍ថាគេហាក់ចាស់ទុំជាងមុនច្រើន។ ពួកយើងមិនបានជជែកគ្នាពីរឿងដែលមិន សប្បាយចិត្តនោះទេ គឺនិយាយតែពីរឿងរីករាយប៉ុណ្ណោះ យើងទាំងពីរនិយាយដល់យប់ ថែមទាំងមិន បានគេងទៀតផង” លោកឈិន ឡុងបានប្រាប់ដូច្នេះ៕

Jaycee ជាមួយនឹងម៉ូដសក់ថ្មី ដែលកាត់ឲ្យដោយផ្ទាល់ពីឪពុក

ប្រភព៖ បរទេស

ដោយ៖ Roth

ខ្មែរឡូត