ជុំ លីណូ ចង់ឲ្យទ្រនំថ្មីផ្ដល់ឱកាសស្មើគ្នា

ជុំ លីណូ ចង់ឲ្យទ្រនំថ្មីផ្ដល់ឱកាសស្មើគ្នា

ជុំ លីណូ បាននិយាយថា រូបគេមានក្ដីសង្ឃឹមក្រសោបបានប្រជាប្រិយភាពឡើងវិញ ខណៈទ្រនំថ្មីផលិតកម្ម Diamond Music ទទួលបានឱកាសឲ្យចេញបទចម្រៀងច្រើនជាបន្តបន្ទាប់គ្នា។ បទចម្រៀងមួយចំនួនចាប់ផ្ដើមចេញលក់លើទីផ្សារកាលពីពេលថ្មីនេះហើយ។

“បើយើងមានបទច្រើនអញ្ចឹងទៅ យ៉ាងហោចណាស់ក៏មានមួយបទ ដែលបងប្អូនពេញចិត្តដែរ”។ រូបគេបានបន្តថា ប្រសិនបើចេញបទចម្រៀងតិចពេកប្រសិនបើខូចនោះ គឺចប់ហើយ។

ជាក់ស្ដែងនៅក្នុងអាល់ប៊ុមដំបូងសម្រាប់ទ្រនំថ្មី រូបគេមានចម្រៀង ៤ បទ ដែលបានចេញលក់ និង ៥ បទទៀតសម្រាប់ជំហានបន្ទាប់។ អាចនិយាយបានថា ជាការផ្ដល់ឱកាស ក្នុងអាជីពជាតារាចម្រៀងរបស់គេ។

“ជឿថាឱកាសជារឿងសំខាន់ណាស់សម្រាប់តារាចម្រៀងគ្រប់រូប ដើម្បីកសាងប្រជាប្រិយភាពរបស់ខ្លួន”។ រូបគេសប្បាយចិត្តក្នុងការបំពេញការងារចាស់ នៅទ្រនំថ្មីនេះ ខណៈមានការជួយជ្រោមជ្រែងពីម្ចាស់ផលិតកម្មខាងលើ ក្រោយពីការផ្លាស់មក។

“ទោះបីជាយ៉ាងណា ខ្ញុំចង់ឲ្យមានការបែងចែកឱកាសស្មើគ្នាសម្រាប់តារាចម្រៀងទាំងអស់នៅក្នុងផលិតកម្ម”។ រូបគេនឹងស្នើដល់អ្នកគ្រប់គ្រងផលិតកម្ម ធ្វើយ៉ាងណាបែងចែកឱកាសឲ្យបានស្មើគ្នា សម្រាប់អ្នករួមទ្រនំមិនថា តារាចម្រៀងចាស់ ឬតារាចម្រៀងផ្លាស់មកថ្មីនោះទេ។

ជុំ លីណូ ទើបរកបានទ្រនំថ្មី ផលិតកម្ម Diamond Music ប្រមាណពីរខែកន្លងទៅប៉ុណ្ណោះ បន្ទាប់ពីបានចាកចេញពីផលិតសាន់ដេរ។ គេឃើញមានបទចម្រៀងរបស់ លីណូ ក្នុងទ្រនំថ្មីមួយចំនួននៅលើ YouTube កាលពីពេលថ្មីនេះ ដែលមានការគាំទ្រគួរសមពីប្រិយមិត្តអ្នកប្រើប្រាស់ Internet។ ក្នុងនោះ រួមមានបទ សុំទោសដែលបងភ្លេចអូនមិនបាន, បានត្រឹមអាណិតអូន និង បទ ឆ្នាំងណាគ្របហ្នឹង ជាដើម។

ចង់ដឹងថា លីណូ អាចស្ដារប្រជាប្រិយភាពឡើងវិញ ឬយ៉ាងណានោះ សូមស្ដាប់បទចម្រៀងរបស់ លីណូ ដូចខាងក្រោម៖

បទ៖ សុំទោសដែលបងភ្លេចអូនមិនបាន