រាជធានីភ្នំពេញ៖ កូនខ្ទមធ្វើពីឈើប្រក់សង្ក័សីទំហំ៤ម៉ែត្រគុណ៦ម៉ែត្រមួយខ្នង ត្រូវបានម្ចាស់ផ្ទះស្រវឹង ស្រា ឈ្លោះប្រកែកជាមួយ ប្រពន្ធ ប្រមូលខោអាវ ដុតផ្ទះចោលតែម្តង បង្កឲ្យមានការភ្ញាក់ផ្អើល កាលពីវេលាម៉ោង៧ និង៤៥ នាទីយប់ ថ្ងៃទី១៦ កុម្ភៈ នៅភូមិកន្ទោក ខាងជើង សង្កាត់ចោមចៅ ខណ្ឌពោធិ៍សែនជ័យ ។

ប្រជាពលរដ្ឋរស់នៅជិតកន្លែងកើតហេតុបានឲ្យដឹងថា ម្ចាស់ផ្ទះមានឈ្មោះ ឪក ចំរើន ភេទប្រុស អាយុ ៥៥ឆ្នាំ មុខរបរកម្មករសំណង់ និង ប្រពន្ធឈ្មោះ វ៉ា ផល្លី អាយុ៤៣ឆ្នាំ មានកូន៣នាក់ ស្រី២នាក់ និងប្រុសម្នាក់នៅក្នុងបន្ទុក ។

គ្រួសារខាងលើនេះមានជីវភាពក្រីក្រណាស់រកព្រឹកខ្វះល្ងាច សូម្បីតែខ្ទមដែលសង់ក៏សង់នៅលើដី ទំនប់ ដែលជាចំណីផ្លូវដែរ មិនមែនជា ដីកម្មសិទិ្ធ របស់ពួកគាត់ទេ ។ ជារៀងរាល់ថ្ងៃ គ្រួសារនេះតែងតែ ឈ្លោះប្រកែកគ្នា ជាញឹកញាប់ ហើយមុនពេលកើតហេតុ ប្តីប្រពន្ធនោះ បានឈ្លោះប្រកែកគ្នា ទាំងបុរសជា ប្តីស្រវឹងស្រាទៀតផង ។ បន្ទាប់ពីឈ្លោះ ប្រកែកគ្នារួច ហើយស្រាប់តែប្រពន្ធ និងកូននៅផ្ទះមួយ កំណាត់ ខាងមុខ ចំណែកប្តីនៅ មួយកំណាត់ ផ្ទះបាយខាងក្រោយ ហើយចាក់គន្លឹះ ជាប់បានប្រមូល ខោអាវដុតនៅក្នុង ផ្ទះធ្វើឲ្យឆាបឆេះ ផ្ទះអស់មួយ កំណាត់ខាងក្រោយ ។

ប្រភពដដែលបន្តទៀតថា ពេលដែលភ្លើងឆាបឆេះអ្នកជិតខាងនាំគ្នាចាប់ហែកជញ្ជាំងសង្ក័សីទាញ បុរស ដែលស្រវឹងចេញពីក្នុងភ្លក់ភ្លើង និងយក ប្រពន្ធកូនចេញ ខ្លាចមានគ្រោះថ្នាក់ ហើយបានជួយពន្លត់ រលត់អស់ទៅវិញ មិនបានឆ្លងរាលដាល ឆេះខ្ទមអស់ ទាំងស្រុងទេ គឺ ឆេះអស់ពាក់កណ្តាល នៅសល់ពាក់កណ្តាល ។ បន្ទាប់ពីភ្លើងឆេះផ្ទះ និងខោអាវមុងភួយ អស់ហើយប្រពន្ធ គិតតែពីអង្គុយយំ ដោយសារ តែអត់មាន លុយកាក់ផង ភ្លើងឆេះផ្ទះអស់ទៀត មានលុយឯណា ទិញខោអាវ និងចានឆ្នាំងដាំបាយ ឲ្យកូនហូបបន្តទៀត ៕

ផ្តល់សិទ្ធដោយ កោះសន្តិភាព