ខេត្តកំពង់ស្ពឺ ៖ យ៉ាងហោចណាស់ មនុស្ស២នាក់បានស្លាប់ និង៣នាក់ទៀតរបួសធ្ងន់-ស្រាល ក្នុងហេតុការណ៍ គ្រោះថ្នាក់ចរាចរណ៍រថយន្ត ដឹកថ្មបុករះម៉ូតូ៣គ្រឿង កាលពីវេលាម៉ោង៨ និង៥០នាទីព្រឹក ថ្ងៃទី១៥ កុម្ភៈ ២០១៥ នៅតាមបណ្តោយ ផ្លូវជាតិលេខ៤ចន្លោះ គីឡូម៉ែត្រលេខ៣៧-៣៨ ស្ថិតក្នុងភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ ។

សមត្ថកិច្ចបាន ស្រង់សម្តីសាក្សីនៅក្បែរ កន្លែងកើតហេតុឱ្យដឹងថា មុនពេលកើតហេតុគេ បានឃើញរថយន្តបែនមួយ គ្រឿងម៉ាកហ៊ីយ៉ាន់ ដាយ ពណ៌ស ធ្វើដំណើរពីលិចទៅកើត លុះមកដល់ចំណុចកើត ហេតុស្រាប់តែបុកម៉ូតូមួយ គ្រឿងម៉ាកស៊ុយហ្ស៊ុយគីស្មាស់ ពណ៌ខ្មៅ បើកដោយស្ត្រីម្នាក់ធ្វើដំណើរពីត្បូង ទៅជើងបណ្តាលឱ្យរបួសស្រាល ស្រាប់តែរថយន្តរេចង្កូតទៅ បុកម៉ូតូហុងដាវ៉េវអេស មួយគ្រឿងទៀតជិះគ្នា៣នាក់ឈប់ស្ងៀម បណ្តាលឱ្យនារី២នាក់ស្លាប់ ភ្លាមៗនៅនឹងកន្លែង ចំណែកម្នាក់ទៀតរបួសធ្ងន់ ភ្លាមៗនោះរថយន្តបានរេ ចង្កូតទៅបុកម៉ូតូមួយគ្រឿងទៀតម៉ាកវ៉េវ អាល់ហ្វា ពណ៌ខ្មៅ គ្មានស្លាកលេខ បណ្តាលឱ្យអ្នកបើកបរ រងរបួសធ្ងន់។

ក្រោយបង្កហេតុរួច អ្នកបើកបររថយន្ត បានចុះរត់គេចខ្លួនបាត់ ស្រមោល៕

ផ្តល់សិទ្ធដោយ កោះសន្តិភាព