ខេត្តបន្ទាយមានជ័យ ៖ បុរសអនាថាម្នាក់ត្រូវ រថយន្តមួយគ្រឿងថយកិនរបួសធ្ងន់ ហើយបានស្លាប់ក្រោយ ពីបញ្ជូនដល់មន្ទីរពេទ្យ កាលពីវេលាម៉ោង៣ និង១០នាទីទៀបភ្លឺ ថ្ងៃទី១៥ កុម្ភៈ ២០១៥ លើបេតុងក្នុងបរិវេណ កាស៊ីណូផ្កាយ៥ ភូមិក្បាលស្ពាន០១ សង្កាត់ និងក្រុងប៉ោយប៉ែត។

ជនរងគ្រោះមិនមាន ឯកសារបញ្ជាក់ពី អត្តសញ្ញាណនោះទេ ប៉ុន្តែសមត្ថកិច្ចជំនាញ ផ្នែកចរាចរប្រាប់ថា លើដៃជនរងគ្រោះ មានសាក់ឈ្មោះ មាស សំអាត ហៅយ៉ាម អាយុជាង៤០ឆ្នាំ ពុំមានទីលំនៅពិតប្រាកដ ហើយអ្នកស្រុកប្រាប់ថា ឃើញដើរសុំទានគេ គ្រាន់ទិញបាយទឹកហូប។

អ្នកស្រុកប្រាប់សមត្ថកិច្ចថា រថយន្តបង្កហេតុម៉ាកហាយឡិនឌ័រ ពណ៌ទឹកប្រាក់គ្មានស្លាកលេខ ទំនងជាអ្នកបើកបរស្រវឹងក្រោយ ចេញពីផឹកស៊ីនៅវាលស្មៅ ក៏ថយរថយន្តស្រាប់តែកិនជនរងគ្រោះ ដែលកំពុងដេកលើបេតុងមុខក្លិបស្តាម៉ិក ក្នុងកាស៊ីណូខាងលើ ហើយបើកបរគេចទៅបាត់។

ជនរងគ្រោះក្រោយភ្ញាក់ផ្អើលថា រថយន្តថយកិន និងរងរបួសធ្ងន់ ត្រូវសមត្ថកិច្ចរួមជាមួយសន្តិសុខ កាស៊ីណូអន្តរាគមន៍ហៅ រថយន្តសង្គ្រោះរបស់ អង្គការកាំម៉ា(CAMA)ដឹកបញ្ជូនទៅកាន់ មន្ទីរពេទ្យបង្អែកក្រុងប៉ោយប៉ែតភ្លាមៗ តែជាអកុសលដោយសារ ថាជនរងគ្រោះរងរបួសធ្ងន់ក៍បាន ស្លាប់នៅមន្ទីរពេទ្យតែម្ដង។

សមត្ថកិច្ចបន្តថាសព រងគ្រោះពេលនេះបានតម្កល់នៅ វត្តប្រជាធម្មត្រ័យក្នុងភូមិប្រជាធម្ម សង្កាត់ផ្សារកណ្ដាល ហើយថាបើសិនដល់វេលាល្ងាចថ្ងៃ ដដែលនេះមិនមានសាច់ញាតិមកមើល ទេសមត្ថកិច្ចនឹងសុំគោលការណ៍ទៅ ព្រះរាជអាជ្ញាដើម្បីចាត់ចែងបូជា និងធ្វើបុណ្យតាមប្រពៃណីនៅ វត្តប្រជាធម្មត្រ័យ៕

ផ្តល់សិទ្ធដោយ កោះសន្តិភាព