ខេត្តសៀមរាប៖ មន្ត្រីអាជ្ញាធរបានអះអាងថា ភ្លើងព្រៃបានឆេះយ៉ាងសន្ធោរសន្ធៅទៅលើតំបន់ទ្រនាប់ នៃឧទ្យានអង្គរ ដែលគ្រប់គ្រងដោយ អាជ្ញាធរជាតិអប្សរា បណ្តាលឲ្យវាលស្មៅ រួមទាំងឈើព្រៃតូចៗ ដែលកំពុងហួតហែង ដោយសារកំដៅថ្ងៃ នារដូវប្រាំង ប្រមាណជិត១០ ហិ កតាត្រូវ បានបំផ្លាញ ក៏ប៉ុន្តែពុំមានសេចក្តី រាយការណ៍អំពីចំនួនខ្នងផ្ទះ ឬទ្រព្យសម្បត្តិ របស់ប្រជាពលរដ្ឋត្រូវ បានបំផ្លាញនោះទេ។

អភិបាលក្រុងសៀមរាបលោកសូរ ប្លាតុង ដែលបានដឹកនាំកម្លាំងចុះអន្តរាគមន៍ក្នុងហេតុការណ៍នោះបាន និយាយថា ភ្លើងបានចាប់ផ្តើម ឆេះតាំងពីវេលា ម៉ោងប្រមាណជាង១០ព្រឹក រហូតដល់ម៉ោង ១២ថ្ងៃត្រង់ ថ្ងៃទី១៣ កុម្ភៈ ២០១៥ នៅក្នុងភូមិសាស្ត្រ ភូមិអរក្សស្វាយ សង្កាត់នគរធំ ក្រុងសៀមរាប ។

យ៉ាងនេះក្តីលោកមិនបានបញ្ជាក់អំពីមូលហេតុនៃការឆេះនោះទេ គ្រាន់តែអះអាងថា តំបន់ដែលរងនូវការ ឆេះនោះ មានទំហំប្រមាណ ១០ហិកតា ជាតំបន់មានផ្ទះប្រជាពលរដ្ឋ សង់នៅឃ្លាតពីគ្នាមួយៗ និងសំបូរដោយ វាលស្មៅចំរុះដោយ កូនឈើព្រៃតូចៗ ងាយនឹងឆាបឆេះ បំផុត។

តាមសេចក្តីរាយការណ៍ពីកន្លែងកើតហេតុបានបញ្ជាក់ថា នៅគ្រាកើតហេតុនោះគេបានឃើញរថយន្ត ទឹកជាច្រើនគ្រឿងរបស់អង្គភាពរដ្ឋ ដូចជាកងរាជ អាវុធហត្ថ នគរបាល និងអង្គភាពអាជ្ញាធរអប្សរា ផងដែរត្រូវបាន គេបញ្ជូនមកកាន់កន្លែងកើតហេតុ ក្រោមការបញ្ជាផ្ទាល់ របស់ លោក នូ ផល្លា ប្រធានក្រុមប្រឹក្សា ខេត្តសៀមរាប តែរថយន្តទឹកទាំងនោះ មិនបានបញ្ចេញទឹកសូម្បី តែមួយដំណក់នោះទេ ដោយសារ តំបន់ព្រៃដែលរងនូវ ការឆេះនោះមិនមាន ផ្លូវសម្រាប់ឲ្យ រថយន្តទឹកចូល។

លោកសូរ ប្លាតុង បញ្ជាក់យ៉ាងដូច្នេះថា «ការយកជ័យជំនះទាំងស្រុងទៅលើភ្លើងព្រៃនោះ គឺពឹងទាំង ស្រុងទៅលើកម្លាំង សាមគ្គីរវាងពលរដ្ឋ ព្រះសង្ឃ និងកម្មករសាលាក្រុង តាមរយៈការ វាយពន្លត់ដោយ មែកឈើផ្ទាល់»៕

ផ្តល់សិទ្ធដោយ កោះសន្តិភាព