ភ្នំពេញ៖ ពិធីការិនី មានសម្រស់លេចធ្លោជាងគេ នៅទូរទស្សន៍ ហង្សមាស កញ្ញា រស់ សុធាវី ដែលកំពុងតែក្ដោបក្ដាប់ កម្មវិធីជាច្រើន និងសុទ្ធសឹងតែជាកម្មវិធីលេចធ្លោត្រូវបានប្រភពទម្លាយឲ្យដឹងថា នាងកំពុងតែត្រៀមចូលរោងការក្រាប ក្បាលដល់កន្ទេល លាភាពក្រមុំ ក្នុងពេលឆាប់ៗខាងមុខនេះ  ខណៈដែលអ្នកសិល្បៈជាច្រើន បានរៀបការជាបន្ទាប់ យ៉ាងព្រោងព្រាត ក្នុងឆ្នាំ២០១៥នេះ ។

កញ្ញា រស់ សុធាវី ជាពិធីការិនីម្នាក់ ដែលមានសម្រស់ និងសមត្ថភាព ដោយទទួលបានកម្មវិធីជាច្រើន ដូចជា "ល្បែង មួយលានឧបសគ្គ, តំបន់យុវវ័យ"និង "វិមានសុបិន" របស់ទូរទស្សន៍ហង្សមាស ។ ចំណែកការចូលរួម ក្នុងពិធីរបស់ មិត្តភក្តិជាអ្នកសិល្បៈដូចគ្នា គឺនាង មិនសូវបាត់មុខឡើយ ពោលនាងមានវត្តមានរហូត ។ សុធាវី ក៏ជាពីធីការិនីម្នាក់ ដែលគ្មានរឿងអាស្រូវ ដិតដាមជាប់ខ្លួន ដូចពិធីការិនី ផ្សេងៗឡើយ ព្រោះនាងជាមនុស្សមិនចូលចិត្ត យកស្នេហាមក ដាក់ខ្លួន នាំឲ្យរញ៉េរញ៉ាយ ជាពិសេសគឺស្នេហាប្ដីគេ ។

ថ្មីៗនេះ ប្រភពដ៏កក់ក្ដៅមួយ បាននិយាយថា ពិធីការិនីសម្រស់ ដាច់គេនៅ ហង្សមាស បានលេចឮ ព័ត៌មានថានឹង ត្រៀមចូលរោងការ  ឆាប់ៗនេះ ហើយ  ជាមួយនឹងបុរសមានទ្រព្យស្តុកស្ដម្ភម្នាក់  តែមិនទាន់បង្ហើបពីអត្តសញ្ញាណ អនាគតស្វាមីនាងនៅឡើយ ។

កញ្ញា រស់ សុធាវី បានប្រាប់ LookingTODAY យ៉ាងខ្លីថា នាងនឹងរៀបការក្នុងពេលឆាប់ៗ ជាមួយគូស្នេហ៍ ដែលបាន ស្គាល់ចិត្តថ្លើមគ្នា ជាយូរមកហើយ ប៉ុន្តែក្រោយរៀបការរួច នាងមិនប្រាកដក្នុងចិត្តទេថា ត្រូវបន្តអាជីពសិល្បៈរហូតទៀត ឬត្រូវឈប់ត្រឹមនេះ ខណៈដែលនាងទើប តែប្រឡូកក្នុងវិស័យសិល្បៈ ក្នុងរយៈពេលខ្លីប៉ុណ្ណោះ៕

ផ្តល់សិទ្ធដោយ ដើមអម្ពិល