ភ្នំពេញ ៖ ក្រោយពីបញ្ចេញ ប្រតិបត្ដិការ ជួយបាញ់ពន្លត់ របស់សមត្ថកិច្ច ពន្លត់អគ្គិភ័យ នៃស្នងការ ដ្ឋាននគរបាល រាជធានីភ្នំពេញ សហការជាមួយ អាជ្ញាធរ និងប្រជាពលរដ្ឋ នៅកន្លែងកើតហេតុនោះ រហូតមកដល់ វេលាម៉ោង ១១និង៣០នាទី ព្រឹកថ្ងៃទី១០ ខែកុម្ភៈនេះ អគ្គិភ័យដែលឆេះ ផ្ទះប្រជាពលរដ្ឋ នៅក្បែរទីស្នាក់ការ ប៉ុស្ដិ៍នគរបាលនោះ បានរលត់ហើយ ។

មន្ដ្រីនគរបាល ពន្លត់អគ្គិភ័យ បានឱ្យដឹងថា ម្ចាស់ផ្ទះឈ្មោះ កូប តឹកសាអ៊ី អាយុ៣២ឆ្នាំ ជាខ្មែរឥស្លាម មុខរបរលក់ សាច់គោ ហើយគាត់បាន ចាក់សោទ្វារផ្ទះ រួចចេញទៅ លក់បាត់ បណ្ដាលឱ្យមាន ករណីទុស្សេ ខ្សែភ្លើងឆាបឆេះ បំផ្លាញទាំង ស្រុងតែម្ដង ។ សមត្ថកិច្ចបញ្ចេញ រថយន្ដ ពន្លត់អគ្គិភ័យ ចំនួន៨គ្រឿង បានបាញ់ពន្លត់ ជាបន្ដបន្ទាប់នៅ កន្លែងកើតហេតុ ។ ដោយឡែកទ្រព្យ សម្បត្ដិនិង សម្ភារៈវិញ មិនដឹងថាមាន ការខូចខាតអស់ ប៉ុន្មាននៅ ឡើយទេ ។

សួមបញ្ជាក់ថា អគ្គិភ័យនេះ បានឆេះផ្ទះ ប្រភេទឈើលើថ្មក្រោម តាំងពីវេលាម៉ោង ១១ព្រឹក ស្ថិតនៅជិត ប៉ុស្ដិ៍នគរបាល ជ្រោយចង្វារ ក្នុងក្រុមទី៣ ភូមិ៣ សង្កាត់ជ្រោយចង្វារ ខណ្ឌជ្រោយចង្វារ ។ សេចក្តីរាយការណ៍ ពីសមត្ថកិច្ច បានឲ្យដឹងថា នៅក្នុងហេតុការណ៍នេះ បានបណ្តាលឲ្យ ក្មេងប្រុសម្នាក់ ឈ្មោះ វ៉ា យុ អាយុ៣ឆ្នាំ ដែលជាកូន ម្ចាស់ផ្ទះរងរបួស រលាកពេញខ្លួន ដោយសារតែ នៅក្នុងផ្ទះ តែត្រូវបាន ប្រជាពលរដ្ឋ និងសមត្ថកិច្ចជួយយកទៅ សង្គ្រោះនៅមន្ទីរពេទ្យ គន្ធបុប្ផា ទាន់ពេលវេលា៕

ផ្តល់សិទ្ធដោយ ដើមអម្ពិល