រាជធានីភ្នំពេញ ៖ យោងតាមសេចក្តី ជូនដំណឹង របស់សាលា រាជធានីភ្នំពេញ បានឲ្យដឹងថា ស្ពានជ្រោយចង្វាចាស់ នឹងត្រូវបិទ មិនឲ្យមានការ បើកបរឆ្លងកាត់ ចាប់ពីម៉ោង ៨ព្រឹក ដល់ម៉ោង៥ល្ងាច ថ្ងៃទី១៧ កុម្ភៈ ២០១៥ ដើម្បីឲ្យ ក្រុមមន្រ្តីជំនាញ ជនជាតិជប៉ុន ត្រួតពិនិត្យ បច្ចេកទេស ពីគុណភាពស្ពាន ។

ការបិទបណ្តោះអាសន្ន រយៈពេល៩ម៉ោងនេះ បានធ្វើឡើង បន្ទាប់ពី ស្ពានជ្រោយចង្វាចាស់ បានទទួលរង ស្នាមប្រេះក្បាលស្ពាន ទំាងសងខាង ដោយអន្លើ ហើយកាលពី ដើមខែកុម្ភៈនេះដែរ ក្រុមបច្ចកទេស និងមន្រ្តីជំនាញជប៉ុន ព្រមទំាងមន្រ្តីជំនាញ សាលារាជធានីភ្នំពេញ ក៍បានចុះ ត្រួតពិនិត្យ គុណភាព ម្តងរួចមកហើយ ។

បើតាមមន្រ្តី សាលារាជធានីភ្នំពេញ បានបង្ហើប ឲ្យដឹងដែរថា អំឡុងពេល នៃការបិទបណ្តោះអាសន្ន ស្ពានជ្រោយចង្វាចាស់ នាពេលនោះដែរ ក៍មានរថយន្ត ចំណុះ២៥តោន ចំនួន២៥គ្រឿង នឹងត្រូវគេដាក់ឲ្យ បើកឆ្លងកាត់ ចុះឡើងៗ ដើម្បីត្រួតពិនិត្យ គុណភាពស្ពាន ។

ស្ពានជ្រោយចង្វាចាស់ ឬស្ពានមិត្តភាព កម្ពុជាជប៉ុន មានប្រវែង ៧០៩ម៉ែត្រ ត្រូវបានកសាងឡើង នៅសម័យសង្គម រាស្ត្រនិយម ក្នុងឆ្នាំ១៩៦៦ និងក្រោយមក បានត្រូវកាត់ផ្តាច់ នៅឆ្នាំ១៩៧២ ដោយសារ ការដាក់បង្កៃគ្រាប់មីន នៅក្នុងរថយន្ត ។

ក្រោយមក ស្ពានជ្រោយចង្វាចាស់ នេះ បានជួសជុលឡើងវិញ និងសម្ពោធដាក់ឲ្យ ប្រើសបា្រស់ នៅថ្ងៃទី២៦ កុម្ភៈ ១៩៩៤ ក្រោមជំនួយ ឥតសំណង របស់រាជរដ្ឋាភិបាលជប៉ុន ៕

ផ្តល់សិទ្ធដោយ កោះសន្តិភាព