កំពង់ចាម ៖ ជាការធ្វេស ប្រហែសរបស់ ម្ចាស់រថយន្ដ ដែលឱ្យអ្នកជិះ ពីក្រោយលើ ភេសជ្ជៈនិងធុងមី ដោយមិនមាន ការចងខ្សែ ត្រឹមត្រូវ បណ្ដាលឱ្យ រអិលធ្លាក់ពី លើរថយន្ដ បោកក្បាលស្លាប់ ភ្លាមៗ នៅនឹងកន្លែងកើត ហេតុ នាព្រឹកថ្ងៃទី០៩ ខែកុម្ភៈ ឆ្នាំ២០១៥ នេះ ស្ថិតនៅលើ កំំណាត់ផ្លូវជាតិ ក្នុងភូមិប្រាំពីរលើ ឃុំអំពិល ស្រុកកំពង់សៀម ខេត្ដកំពង់ចាម ។

មន្ដ្រីនគរបាល ស្រុកកំពង់សៀម បានឱ្យដឹងថា មុនពេលកើតហេតុ គេបានឃើញ រថយន្ដមួយ គ្រឿងម៉ាកវីហ្គោ ពណ៌ទឹកប្រាក់ ពាក់ស្លាកលេខ ភ្នំពេញ 2W-6697 ដោយ ផ្ទុកភេសជ្ជៈនិងកេសមី ជាច្រើនកេសនៅលើ រថយន្ដនោះ ហើយក៏មាន បុរសម្នាក់ ជិះនៅលើ ទំនងជាកម្មករ ឬបុគ្គលិក ។

មន្ដ្រីនគរបាល បញ្ជាក់ទៀតថា ពេលដែល កំពុងធ្វើដំណើរ តាមបណ្ដោយផ្លូវជាតិ ក្នុងល្បឿនលឿន គួរសមនោះ បណ្ដាលឱ្យកេសមី រអិលធ្លាក់ក៏ ធ្វើឱ្យជនរងគ្រោះ ដែលជិះនៅពី លើក៏ធ្លាក់ មកជាមួយ បែកក្បាលស្លាប់ភ្លាមៗ នៅនឹងកន្លែងកើត ហេតុតែម្ដង ។យ៉ាងណា ក៏ដោយនោះ សមត្ថកិច្ចមិនទាន់ បានបញ្ជាក់ពី អត្ដសញ្ញាណរបស់ ជនរងគ្រោះ នៅឡើយទេ ។

សមត្ថកិច្ចបានធ្វើ ការស្ដីបន្ទោស ពីការធ្វេសប្រហែស របស់ម្ចាស់រថយន្ដ ដែលមិនបានចង ទំនិញឱ្យបាន ត្រឹមត្រូវ ហើយឱ្យ មនុស្សជិះពី លើ ដែលនាំឱ្យមាន គ្រោះថ្នាក់បែបនេះ ហើយ ក៏ជាបទ ពិសោធន៍សម្រាប់ ប្រជាពលរដ្ឋ ផ្សេងទៀតផងដែរ ។

ក្រោយកើតហេតុ សមត្ថកិច្ចមូលដ្ឋាន បានចុះទៅពិនិត្យ មើលនិងធ្វើ កោសល្យវិច័យ លើសព ហើយប្រគល់ទៅ ឱ្យក្រុមគ្រួសារ យកទៅធ្វើ បុណ្យតាមប្រពៃណី ហើយក៏មិន ដឹងថា ម្ចាស់រថយន្ដផ្ដល់ សំណងប៉ុន្មានទៅឱ្យ ជនរងគ្រោះនោះទេ ៕

ផ្តល់សិទ្ធដោយ ដើមអម្ពិល