ម៉ារី ណែត តួឯក ២ រឿង ក្នុងពេលតែមួយ

ម៉ារី ណែត តួឯក ២ រឿង ក្នុងពេលតែមួយ

តារាសម្ដែង កញ្ញា ម៉ារី ណែត បានបង្ហើបប្រាប់ថា បច្ចុប្បន្ននាងកំពុងតែគ្រប់គ្រងតំណែងតួឯក ២ រឿង ក្នុងពេលតែមួយ ដោយសាច់រឿងពីរនេះ កំពុងតែដំណើរការថតព្រមគ្នាតែម្ដង។

ម៉ារី ណែត បាននិយាយថា រឿងទាំងពីរ ដែលនាងកំពុងតែ ថតនោះ រឿងមួយជាប្រភេទរឿងខ្នាតធំ និង រឿងមួយទៀតជាប្រភេទរឿងភាគ។ រឿងខ្នាតធំដែលកំពុងតែ ថត មានឈ្មោះថា រឿង “ឆ្នាំវក ឬ The year of Monkey” ចំណែករឿង ភាគមានឈ្មោះថា “Smart girl ឬ ស្ត្រីឆ្លាត” ដោយទាំងពីររឿងនេះ នាងបានគ្រងតំណែងជាតួឯក។

ម៉ារី ណែត បញ្ជាក់ថា រឿង “ឆ្នាំវក ឬ The year of Monkey” គឺជាខ្សែភាពយន្តមួយដែលនិយាយពីការសងសឹក បាញ់បោះ ក្នុងនោះក៏មានបញ្ចូលក្បាច់គុនខ្មែរ ល្បុកក្តតោ ផងដែរ។នាងបន្តថា រឿងមួយនេះ គឺជាខ្សែភាពយន្ត ដែលថតដោយជនបរទេសឈ្មោះ លោក Jimmy Henderson ហើយមានការសហការជាមួយក្រុមហ៊ុនផលិតកុនល្បីឈ្មោះមួយលើពិភពលោក។

តារាស្រីសម្បុរស្រអែមនេះ បានប្រាប់ទៀតថា រឿង “ឆ្នាំវក ឬ The year of Monkey” នេះ បានចេញថត កាលថ្ងៃទី ១៩ ខែ មេសា កន្លងទៅថ្មីៗនេះ ដោយគ្រោងបញ្ចប់នៅថ្ងៃទី ១១ ខែ ឧសភា ឆ្នាំ ២០១៤ ខាងមុខ។

រីឯការចាក់បញ្ចាំងវិញ គ្រោងធ្វើនៅចុង ខែ កញ្ញា ឬ ដើមខែ តុលា ឆ្នាំ២០១៤ តាមរោងភាពយន្តទាំងអស់ក្នុងរាជធានីភ្នំពេញ និង តាមបណ្ដាខេត្ត។ ទន្ទឹមនឹងគ្នានេះដែរ ខ្សែភាពយន្តមួយនេះ ក៏គ្រោងយកទៅចាក់បញ្ចាំងនៅបទេសថែមទៀតផង។

ចំពោះរឿងភាគ “Smart girl ឬ ស្ត្រីឆ្លាត” ដែលនាងបានគ្រងតំណែងតួឯកដែរនោះ ម៉ារី ណែត ប្រាប់ថា គឺជាវណ្ណកម្មរបស់ផលិតកម្មខ្មែរមេគង្គ។ សាច់រឿងមួយនេះ មានចំនួន ២៧ ភាគ ដោយបច្ចុប្បន្នទើបតែថតបានប្រហែលពីរភាគប៉ុណ្ណោះ ហើយគ្រោងបញ្ចប់នៅខែ សីហា ឆ្នាំ ២០១៤ ខាងមុខនេះ។

ម៉ារី ណែត មិនបានពន្យល់លំអិតពីសាច់រឿងទាំងអស់បានឡើយ ព្រោះខ្លាចប៉ះពាល់ដល់ផលិតកម្ម ដោយនាងស្នើឲ្យទស្សនិកជនតាមដានវិញចុះ ។ នាងថា រឿង “Smart girl ឬ ស្ត្រីឆ្លាត “ គ្រោងចាក់បញ្ចាំងនៅ ស្ថានីយទូរទស្សន៍ CTN។

ទោះបីជា សាច់រឿងទាំងពីរចេញថតដំណាលគ្នាយ៉ាងណាក្ដី ប៉ុន្តែពេលវេលា នៃការចេញថត មិនជាន់គ្នាឡើយ ព្រោះនាងបានរៀបចំពេលវេលាច្បាស់លាស់ណាស់ មុននិងចុះកុងត្រា។

បើរាប់បញ្ចូលរឿងទាំង ២ ខាងលើ គឺជារឿងទី ៦ ហើយ ដែលតារាស្រីម្នាក់នេះបានថត។ ៤ រឿងផ្សេងទៀតដែល កញ្ញា ម៉ារី ណែត បានថតមានដូចជា រឿង “រលកសំលេង” របស់ផលិតកម្មខ្មែរមេគង្គ កាលពីឆ្នាំ ២០១០ ។ រឿង”សេដ្ឋីវ័យក្មេង” របស់ស្ថានីយទូរទស្សន៍ប៉ុស្រិ៍លេខ ៥ កាលពីឆ្នាំ ២០១១។ រឿង “ក្រមុំស្រុកស្រែ” របស់ស្ថានីយទូរទស្សន៍បាយ័ន កាលពីឆ្នាំ ២០១៣។ រឿង The Last Reel របស់ផលិតកម្មហូលីវូត កាលពីឆ្នាំ២០១៣ ។ ទាំង៦រឿងដែលនាងបានថតនោះ កញ្ញា ម៉ារី ណែត បានគ្រងដំណែងតួឯកស្ទើរតែទាំងអស់។ តារាស្រីម្នាក់នេះ ក្រៅពីអាជីពជាតារាសម្ដែង នាងក៏ជា តារាម៉ូដែលក្នុងក្រុម Sun Super Model ផងដែរ៕

ប្រភព Sabay

មុន បន្ទាប់

មតិយោបល់