ម៉ាឡេស៊ី៖ កាលពីពេលថ្មីៗ កន្លងទៅនេះ មានការភ្ញាក់ផ្អើលមួយ បានផ្ទុះឡើង បន្ទាប់ពីកម្មករ នៅក្នុងប្រទេសម៉ាឡេស៊ី បានប្រទះឃើញ សត្វចម្លែក គួរឲ្យខ្លាចមួយក្បាល ដែលគេសន្មតថា គឺជាពពួក Alien។

យោងតាមប្រភពព័ត៌មាន បានឲ្យដឹងថា សត្វចម្លែក ដែលមិនធ្លាប់បានឃើញនេះ ត្រូវបានប្រទះឃើញ ដោយកម្មករ នៅឯចំការដូងប្រេង មួយកន្លែង ដែលស្ថិតនៅក្នុងព្រៃ ក្នុងប្រទេសម៉ាឡេស៊ី។ ដោយសារតែវា មានរូបរាងចម្លែក ធ្វើឲ្យកម្មករ នៅឯចំការដូងប្រេងនោះ គិតថា វាជាសត្វចម្លែក ដែលមកពីភពក្រៅ។

សត្វខ្លាឃ្មុំព្រះអាទិត្យ ឬ Sun Bear ដែលស៊ីអាហារមិនគ្រប់គ្រាន់ មានរូបរាងស្គមខ្លាំង ត្រូវគេច្រលំ ស្មានថា ជាសត្វចម្លែក Alien

ផ្ទុយមកវិញ អ្វីដែលកម្មករទាំងនោះគិត គឺខុសស្រឡះតែម្តង ដោយសារតែ វាមិនមែនជា សត្វចម្លែកនោះទេ វាគឺជា សត្វខ្លាឃ្មុំព្រះអាទិត្យ (Sun Bear) ដែលស៊ីអាហារ មិនគ្រប់គ្រាន់ រហូតមានរូបរាង ស្គមខ្លាំង ដូចជាសត្វចម្លែក ស្ទើរចំណាំ មិនបាន។

ទោះបីជាយ៉ាងណាក៏ដោយ មុនពេលដែល កម្មករទាំងនោះ បានដឹងថា វាគឺជាសត្វខ្លាឃ្មុំ ពួកគេបាន វាយវានឹងដំបង ថែមទាំង ថតសកម្មភាព របស់វាទៀតផង ខណៈសត្វខ្លាឃ្មុំនោះ បានវាលថ្នមៗ ចូលទៅក្នុងព្រៃវិញ ដែលមើលទៅ គួរឲ្យអាណិតមែនទែន។

កម្មករនៅឯ ចំការដូងប្រេងម្នាក់ វ័យ៣៣ឆ្នាំ មានឈ្មោះថា Herman Tutu បាននិយាយថា «ពួកយើងមានការ ភ្ញាក់ផ្អើលយ៉ាងខ្លាំង ដោយសារតែ មិនធ្លាប់បានឃើញ សត្វចម្លែក បែបនេះ ពីមុនមក។ ក្រញ៉ាំជើងរបស់វា ចម្លែកខ្លាំងណាស់ ហើយនៅពេលដែលវា បានឃើញពួកយើង វាក៏ដើរសំដៅ មករកពួកយើង។ ពេលនោះ មានកម្មករម្នាក់ បានយកដំបងឈើ វាយទៅលើវា ជាច្រើនដង ធ្វើឲ្យវា ដេកស្តូកស្តឹង នៅនឹងកន្លែង។ ប៉ុន្តែក្រោយមក ទើបពួកយើង បានដឹងថា វាគឺជាសត្វខ្លាឃ្មុំ។»

គួរបញ្ជាក់ផងដែរថា ខ្លាឃ្មុំព្រះអាទិត្យ គឺជាប្រភេទសត្វ ដែលជិតផុតពូជ ដោយសារតែ ការកាប់បំផ្លាញព្រៃឈើ ជាលក្ខណៈទ្រង់ទ្រាយធំ នៅក្នុងជម្រកធម្មជាតិ របស់ពួកវា៕

សូមទស្សនាវីដេអូខាងក្រោម៖

សត្វខ្លាឃ្មុំព្រះអាទិត្យ ឬ Sun Bear

ប្រភព ៖ មេត្រូ

កែសម្រួលដោយ ៖ ប៊ី

ខ្មែរឡូត