លឹម រដ្ឋា រំលឹករឿងឪពុកម្ដាយទាំងអួលដើមក

លឹម រដ្ឋា រំលឹករឿងឪពុកម្ដាយទាំងអួលដើមក

“មានផ្ទះឥតមនុស្សនៅ មានផ្លូវឥតមនុស្សដើរ។ ពុក ម៉ែកូននឹកអ្នកទាំងពីរណាស់..!!! បើសិនជាអាចកូនចង់ហៅអ្នកទាំងពីរមកវិញ”។ នេះជាអារម្មណ៍ពិត នៃកូនកំព្រាម្នាក់ ដែលមានឱកាសក្លាយជាតារាសម្ដែង និង បង្ហាញម៉ូដ លោក លឹម រដ្ឋា ចំពោះអ្នកមានគុណបន្ទាប់ពីបានទៅលេងស្រុកកំណើត ដើម្បីធ្វើបុណ្យទានឧទ្ទិសកុសលជួនឪពុកម្ដាយរៀងរាល់ឆ្នាំ។

លឹម រដ្ឋា និង អ្នកជិតខាងពេលទៅ បង្សុកូលឧទ្ទិសជួនឪពុកម្ដាយ

នៅក្បែរផ្ទះពីរខ្នងបិទទ្វាជិតឈឹងគ្មានមនុស្សរស់នៅសូម្បីម្នាក់ តារាសម្ដែងរូបនេះ បានរៀបរាប់ទាំងរអាក់រអួលមកកាន់ Sabay ថា មិនមែនជាអារម្មណ៍នៃការសម្ដែងនោះទេ រាល់ការត្រឡប់មកស្រុកកំណើតម្ដងៗ គឺលោកតែងតែមានអារម្មណ៍ស្រងេះស្រងោចទឹកភ្នែកស្រក់មិនដឹងខ្លួន នឹកស្រណោះដល់អ្នកមានគុណ ដែលបានទទួលអនិច្ចកម្មបន្តបន្ទាប់ចោលរូបលោក ក្រោយពីបានចូលប្រឡូកក្នុងវិស័យសិល្បៈ។

“ជាពិសេសម៉ែខ្ញុំគាត់បានត្រឹមតែឭថា កូនចូលសិល្បៈគាត់សប្បាយចិត្តណាស់ ទោះមិនសូវឃើញមុខក្ដី ក្រោយមកក៏បានលាចាកលោកទៅ”។ រហូតមកដល់ពេលនេះ ម្ដាយរបស់លោកបានលាចាកលោកនេះ ប្រមាណជាង ១០ ឆ្នាំ ហើយ។ ក្រោយមកឪពុកក៏បានទទួលមរណភាពទៀតអំឡុង ២ ឆ្នាំមុននេះ ធ្វើឲ្យផ្ទះនេះលែងមានអ្នករស់នៅបន្តទៅទៀត។ នេះជាការរៀបរាប់របស់ លោក លឹម រដ្ឋា។

លឹម រដ្ឋា និង ផ្ទះដែលឪពុកម្ដាយធ្លាប់រស់នៅ ពេលនេះបិទទ្វាចោល

តាមពិតទៅ រដ្ឋា បានឃ្លាតឆ្ងាយពីផ្ទះ និងឪពុកម្ដាយតាំងពីក្មេងម្ល៉េះ ហើយទៅរស់នៅជាមួយអ្នកដទៃដែលមានចិត្តសប្បុរសម្នាក់ លើទឹកដីខេត្តសៀមរាប និង មានឱកាសបានសិក្សានៅទីនោះ ហើយបានជួបឪពុកម្ដាយម្ដងម្កាលប៉ុណ្ណោះ រាល់ពេលមកលេងស្រុកម្ដងៗ។ តាំងពីពេលនោះមិនដែលបានរស់នៅជួបជុំគ្នាម្ដងណាឡើយ ខណៈឈានជើងចូលសិល្បៈកាន់តែជ្រៅ។

“ទោះទៅដល់ទីណាក៏ដោយ នៅតែនឹកឃើញគុណជានិច្ច។ ពេលនេះ ខ្ញុំរកលុយបានភ្លាមទៅស្រុកភ្លែត ដើម្បីធ្វើបុណ្យជួនពូកគាត់”។ តារារូបនេះបានបន្ដថា នេះជាកាតព្វកិច្ចរបស់ខ្លួន ក្នុងនាមជាកូនម្នាក់ចំពោះឪពុកម្ដាយ ដែលមានគុណគ្មានអ្វីប្រៀបបាន។ ម្យ៉ាងទៀតទង្វើបែបនេះ រូបលោកជឿថា នឹងមកនូវសេចក្ដីសុខសប្បាយ និង ជោគជ័យក្នុងជីវិត៕

ប្រភព Sabay

មុន បន្ទាប់

មតិយោបល់