ភ្នំពេញ ៖ ជនសង្ស័យ៣នាក់ ត្រូវបាន នគរបាលប៉ុស្ដិ៍ ជ័យជំនះ ឃាត់ខ្លួនបានបន្ទាប់ ពីធ្វើសកម្មភាព យកឡាមគំរាម អារ-កប្លន់ យកលុយ កាលពីវេលាម៉ោង ៣ទាបភ្លឺ ថ្ងៃទី ០៤ ខែកុម្ភៈ ឆ្នាំ២០១៥ នៅចំណុចមាត់ទន្លេ តាមបណ្ដោយផ្លូវ ព្រះស៊ីសុវត្ថិ សង្កាត់ជ័យជំនះ ខណ្ឌដូនពេញ ។

នគរបាលមូលដ្ឋាន បានឱ្យដឹងថា ជនរងគ្រោះ មានឈ្មោះ តុង សារឿន ភេទស្រី អាយុ ៦៤ឆ្នាំ មានមុខរបរនៅផ្ទះ ស្នាក់នៅភូមិស្ពឺ ឃុំ ស្ពឺ ស្រុកចំការលើ ខេត្ដកំពង់ចាម បាត់លុយ ៦០០ដុល្លារ និងលុយខ្មែរ ១២ម៉ឺនរៀល។ ចំណែក ជនសង្ស័យមាន គ្នា៣នាក់ រួមមានឈ្មោះ រឿន មាស ភេទប្រុស អាយុ២៣ឆ្នាំ មានមុខរបរ និងទីលំនៅ មិនពិតប្រាកដ ធ្លាប់ជាប់គុកនៅ ព្រៃស ម្ដងរួចមកហើយ ពីបទលួចកាបូប កាល ពីឆ្នាំ២០១៣ ទី២ឈ្មោះ ណា ណាត ភេទប្រុស អាយុ១៨ឆ្នាំ មានមុខរបរ និងទីលំនៅ មិនពិតប្រាកដ ទី៣ឈ្មោះ ចេក រតនា ភេទប្រុស អាយុ២១ឆ្នាំ មានមុខរបរ មិនពិតប្រាកដ ។

មន្ដ្រីនគរបាលមូលដ្ឋាន បានឱ្យដឹងថា មុនពេលកើតហេតុ ជនរងគ្រោះបាន មកពីខេត្ដកំពង់ចាម គោលបំណងមក ព្យាបាលជំងឺ ហើយក៏បានមក ដេកនៅលើបង់ កន្លែងកើតហេតុ ស្រាប់តែមាន ជនសង្ស័យ៣នាក់ មកធ្វើសកម្មភាព ដើរមកជិត រួចជនសង្ស័យម្នាក់ បានយកឡាម មកវះហោបៅអាវ ពេលជនរងគ្រោះ ភ្ញាក់ដឹងខ្លួន ហើយពេលនោះជន សង្ស័យ បានយកឡាម មកគំរាមអារ-កមិន ឱ្យស្រែក ហើយជនសង្ស័យ បានឆែកយក លុយពីក្នុង ហោប៉ៅហើយបាន ដើរចេញបំរុង គេចខ្លួន ក៏ត្រូវកម្លាំងល្បាត ឃើញក៏ជួយអន្ដរាគមន៍ ឃាត់ខ្លួនជនសង្ស័យ បានទាំង៣នាក់ តែម្ដង ។

ក្រោយឃាត់ខ្លួន សមត្ថកិច្ចឆែករកឃើញ លុយចំនួន ១២ម៉ឺនរៀល តែប៉ុណ្ណោះ ហើយមកសាកសួរ នៅនគរបាលប៉ុស្ដិ៍ជ័យជំនះ ដើម្បី កសាងសំណុំរឿង បញ្ជូនទៅកាន់អធិការដ្ឋាន នគរបាលខណ្ឌដូនពេញ ចាត់ការបន្ដ ៕

លោកយាយរងគ្រោះ ត្រូវជនសង្ស័យប្លន់លុយ ពេលនៅលើបង់មាត់ទន្លេ

ផ្តល់សិទ្ធដោយ ដើមអម្ពិល