អ៊ីរ៉ាក់៖ បុរសជនជាតិអ៊ីរ៉ាក់ម្នាក់ បានបាញ់សម្លាប់ ក្រុមសកម្មយុទ្ធ ជ្រុលនិយម នៃរដ្ឋឥស្លាម ហៅកាត់ថា ISIS អស់ចំនួន ៧នាក់ ដោយប្រើកាំភ្លើង ប្រភេទ AK-47 ចំនួនមួយដើម មុនពេល រូបគាត់ ត្រូវបាន បាញ់តបត សម្លាប់វិញ។ លោក Basil Ramadan ដែលមានវ័យខ្ទង់ ៦០ ឆ្នាំ បានបាញ់ទៅលើក្រុម ISIS ដែលស្ថិតនៅប៉ុស្តិ៍ត្រួតពិនិត្យ ក្នុងទីក្រុង Tikrit ភាគខាងជើង រដ្ឋធានី Baghdad ដែលថ្មីៗនេះ តំបន់នោះ ត្រូវគ្រប់គ្រងដោយក្រុម ISIS ក្នុងគោលបំណង ដើម្បីសងសឹកឲ្យ កូនប្រុសរបស់គាត់ ដែលត្រូវក្រុមនេះ ប្រហារជីវិត។ 

កូនប្រុសរបស់លោក Ramadan ស្ថិតក្នុងចំណោមមនុស្ស៨នាក់ដែលត្រូវប្រហារជីវិត

កូនប្រុសរបស់លោក Ramadan មានឈ្មោះ Ahmed Basil ដែលមាន អាយុប្រមាណ ១៨ ឆ្នាំ គឺជាមនុស្សម្នាក់ ក្នុងចំណោមបុរស ៨ នាក់ផ្សេងទៀត ដែលត្រូវប្រហារជីវិត ដោយក្រុម ISIS កាលពីខែមុន ដោយពួកគេ ជាប់ចោទពីបទ លបចូលធ្វើ ចារកម្ម ដើម្បីផ្តល់ព័ត៌មានឲ្យ រដ្ឋាភិបាលរបស់ប្រទេសអ៊ីរ៉ាក់។

ក្រុមរដ្ឋឥស្លាម ជ្រុលនិយម ISIS បានបញ្ចេញរូបថត និង វីដេអូនៃការប្រហារជីវិត Ahmed Basil Ramadan និង មនុស្ស ៧ នាក់ ដែលពួកគេចោទថា ជាមន្ត្រីប៉ូលិស ដែលបន្លំយក ព័ត៌មានឲ្យទៅ រដ្ឋាភិបាលប្រទេសអ៊ីរ៉ាក់។ នៅក្នុងវីដេអូ ក្រោមចំណងជើងថា ថ្ងៃនៃការជំនុំជំរះ គេឃើញ អ្នកទោស ទាំង ៨នាក់នោះ ស្លៀកពាក់ ក្នុងឯកសណ្ឋាន ពណ៌ទឹកក្រូច ដោយមាន កងទ័ព ក្រុមរដ្ឋឥស្លាម មុខបិទជិត ដោយម៉ាស់ ឈរនៅពីក្រោយ។

ក្រុមរដ្ឋឥស្លាម IS

ក្នុងចំណោម អ្នកទោសដែលក្រុម ISIS យកទៅប្រហារជីវិតនោះគឺមាន មេក្រុមម្នាក់ដែលមានឈ្មោះថា Hossam Salah Bnosh។ បើតាមការផ្សាយរបស់ បណ្តាញផ្សព្វផ្សាយរបស់ ISIS គឺលោក Bnosh និងគ្នីគ្នា៧នាក់ទៀតគឺជាមន្ត្រីប៉ូលិស ដែលចេញពីក្រុម Sunni Islam មកចូលក្រុមរដ្ឋឥស្លាម ISIS។ ក្រុមអ្នកទោសនោះ បានផ្តល់ ព័ត៌មានសំខាន់ ទៅរដ្ឋាភិបាល ក៏ដូចជា ទីតាំងគោលដៅ របស់ក្រុម ISIS ដែលអាចឲ្យរដ្ឋាភិបាលធ្វើការវាយប្រហារ ពីលើអាកាសមកបាន។

គួរបញ្ជាក់ផងដែរថា នៅក្នុងវីដេអូ និងរូបថត គេឃើញ អ្នកទោសទាំង៨នាក់ ចងភ្នែក និង ចងដៃទៅក្រោយ ហើយពួកគេ បាននាំយកទៅឆ្ងាយពីទីក្រុង នៅក្បែរទន្លេមួយ ដោយត្រូវបង្ខំ ឲ្យលុតជង្គង់ចុះ។ អ្នកទោសនិមួយៗ ត្រូវប្រហារជីវិត ដោយការ បាញ់ចំនួនមួយគ្រាប់ ចំក្បាល៕

អ្នកទោសត្រូវបានគេចងភ្នែក និងដៃទៅក្រោយមុនពេលប្រហារជីវិតដោយបាញ់១គ្រាប់ចំក្បាល


ដើម្បីសងសឹកឲ្យកូន លោក Basil Ramadanបានបាញ់សម្លាប់ ក្រុមភារវជន ISIS អស់ចំនួន ៧នាក់

ប្រភព៖ បរទេស

ដោយ៖ Roth

ខ្មែរឡូត